Tamu ih India rammi pahnih thah an si thu ah ralhrang thuphuangtu Zaw Min Tun cun Media thusuhnak a letih, kannih thah a silo tin a sim.
India rammi pahnih cu July 5 ah Mohre in Myanmar ramsung Tamu ah an rak feh ih, sun nazi 1 hrawngah Tamu tlawnginn kotah Pyu Saw Htee pawlin an rak kap that. India rammi pahnih an thih thu ah Tamu ih um mipi pawl cun ralhrang tuanpi Pyu Saw Htee pawl ih thahmi an si tin an sim.
Ralhrang thuphuangtu Zaw Min Tun cun “July 5, sun nazi 12 hrawngah Tamu khawpi Sawbua vengah mi pahnih thah an si tin thuhla kan dongih, Tamu ih kan ralkap pawl cun zohfelnak an nei cih. Kan ralkap pawlin zohfelnak an neih ahcun mithi ruang an va hmu ih,meithal in kah that an si.
“Zamrang zetin kiangkap ceknak an nei ih, mi pahnih bike ih phur aw cu zamrang zetin an tlan suak. kan ralkap pawl cun mithi ruang pahnih cu Tamu sizung ah an phur ih, cekfelnak an nei. Tamu palik sakhan ahcun mithat thubuai ngankhum a si. Cumi hnuah mithi pahnih cu zo an si tin theitawk kan zingzoi ih, ruang latu an um lo ruangah July 6, zinglam nazi 7 ah kan urkang men a si,” tin a sim.
Tamu ih um pakhat cun “Tamu Sawbua veng cu Pyu Saw Htee pawl tamnak hmun a si. Kannih mipi hman Sawbua veng ahcun sun hmanah kan feh ngam lo. Ralhrang pawl cu phungki tlawng ah le ralhrang hmunah an um. PDF pawl khal an feh zik lo, ziangahtile feh sehla an rak kulh dingih an kai cih ding. Curuangah India rammi thattu cu Pyu Saw Htee rori an si ding tin kannih mipi cun kan pom fel. Ralhrang cun thluak an hmangih, an kuthnuai Pyu Saw Htee pawl an fial hrim khal a si ding,” tin a sim.
Tamu PDF cun “July 5, sun nazi 1 hrawngah Tamu ih feh duak India rammi pahnih cu ralhrang kuthnuai Pyu Saw Htee pawlin an kap that. Ralhrang pawl cun ramri ih India mipi le myanmar mipi rualremten kan um an duh lo, Mohre ih Myanmar raltlan pawl hahdam teih an um ding an duh lo, Ramri ah zalen zetin sum tuah an duh nawn lo. Cumi ruangah ralhrang pawlin Tamu ih lut India rammi pahnih that dingin an kuthnuai Pyu Saw Htee pawl an fial.
“Myanmar mipi lawng siloin ramri ih ramdangmi khal duhtawk ih that men ralhrang pawlih cangvaih dan cu India cozah ziang an siar lonak khal a si. Ralhrang thuphuangtu Zaw Min Tun cun India rammi pahnih cu kanmah PDF thah vekin a rel. Asinan, cucu thuphan a si ih, ralhrang cun thudik lo thanter an tum. Pyu Saw Htee pawlin India rammi pahnih an thah tlunah an sumpai le sui thilri khal an laksak tel.
“Ralhrang ralkap cun fiahnak a langsuak ding an phan ruangah ruang pahnih cu India lamah an kuat duh lo ih, Pyu Saw Htee hotu Maung Lay Win le a kuthnuai pahnih Zaw Ye le Phoe Sein pawlin India rammi ruang pahnih an urkang. Kannih Tamu PDF cun ralhrang siseh an kuthnuai Pyu Saw Htee pawlih cangvaih dan khal kan mawhthluk tuk lawlaw. Siattong innsang lam cu kan tuarpi tuk lawlaw a si,” tin thu an suah.
Ralhrang ralkap le India palik biakawk dan vek asile July 6, zinglam nazi 8 ah ruang kan lo pe ding tin ralhrang lam cun India palik pawl an simthei nan, a caan kimih ruang an pek lo ruangah India mipi pawl cu an thinheng ih, ramri ih ralhrang check Gate an urkang. Tukhalah ramri boruak a dai thei hrih lo ih, Mohre ih bazar kai, thilzuar, sum tuah Myanmar mipi pawl cu an eiin hawlnak a tawp thluh hrih.
Leave a Reply