Sagaing ramthen Tamu peng sungih doawknak ah ralhrang 25 an thi tin Tamu PDF cun mipi theihternak an nei. Tamu PDF komkhawm le ralhrang ralkap pawl cu June 22 in 23 tiang ni 2 peh in do aw an si.
Tamu PDF cun “Kannih Tamu PDF komkhawm le Task Force pawl cun June 22 , zinglam nazi 10:30 in Tamu peng Pantar khua ih um ralhrang ralkap le Pyu Saw Htee pawl kan do thok. Nasaten kan doawk laiah ralhrang mawtaw 2 dang cu doawknak hmunah an ra.
“Pantar khua ih um Pyu Saw Htee pawl khal khua sungah tanhmun an khuar ih, in kap. Khuasung mipi umnak ah tanhmun rak khuar cia an si. Zanlam nazi 4:20 tiang kan do aw ih, doawknak ah ralhrang ralkap le Pyu Saw Htee komkhawm 25 an thi ih, hriam ngah tampi an um.
‘Kannih mipi ralkap komkhawm pawl dung kan sip lai ah kan miraltha 5 hriam an ngah ve. Nikum doawknak ah kan miraltha pakhat Pantar khua ah a rak thi ih, cumi phuba laknak ah tuitum ah ralhrang ralkap le Pyu Saw Htee pawl do kan si.
“June 23, zanlam nazi 5 hrawng khalah kalay le Tamu lamzin tluanah ralhrang mawtaw bomb kan puah ih, ralhrang mawtaw pahnih a siat. Ralhrang cun laika 13 le ralhrang mawtaw pakhat an hmang. Mawtaw pakhat ah ralhrang 20 hrawng an to ding. Ralhrang mawtaw bomb kan puah ngahmi ah ralhrang thi an um rori nan, kan himnak hrang a zat fiah man loin dung kan sip a si,” tin thu an suah.
Kalay le Tamu karlak ih doawknak ruangah ralhrang pawl cun Tamu lamzin ih Yanlinphai khua in inn 4 an urkang sak ih, tlunlam thusduak a si tin ralhrang pawl cun khuami pawl an simthei.
Khuami pakhat cun “Ralhrang pawlin ziangruangah kan khua an urkang timi a san kan thei lo, ralbawi cun tlunlam thusuak in kan urkang tin in sim. Nan khua ah PDF pawl lutsuakter hlah uh, curuangah him lo nan si tin in sim. Culo a san zianghman kan thei lo,” tin a sim.
Ralhrang ralkap cun 2021 kum sung khalah Yanlinphai khua in inn hrekkhat an rak urkang zo ih, mibang lo mi pakhat an thah tlunah mipi tangka 30 lenglo an rak laksak zo.
Tu ahcun ralhrang ralkap in khua sungih inn hrekkhat an urkang ruangah khua mipi pawl cu khua ah um ngam loin an tlan thluh. Tamu PDF le ralhrang doawknak thuhla ah Tamu PDF sungtel hrekkhat cun doawk laiah ralhrang 8 an thi , 15 an thi tin media an rak simthei phah rero ih, tuitum ah doawknak ralhrang 25 an thi timi cu official in ca an suahmi a si.
PDF Ralthuam leinak Ding Ting 250 A Eisak – Thailand ram, maha Chai Samut vengih um Yan Naing Oo timi cun PDF pawl ih ralthuam leinak ding tangka ting 250 kyats lenglo a eiral sak ih, amah cu biak theih loin a um.
Dawei PDF pawl cun Thailand ih um Yan Naing Oo hnenah an hrang meithal leisak dingin an bia ih, tangka an kuat. Tangka an kuatmi ting 250 kyats lenglo cu Yan Naing Oo in meithal leisak duh loin a rak eiral sak men.
Dawei PDF hotu cun “A hlanah meithal leisak dingin kan rak bia ih,tluangten meithal kan cahzat in rak leisak. Tuitum cu avei hnihnak PDF komkhawm 6 in meithal leisak dingin tangka kan kuatmi a si. Caan a rei tuk zo ih, kan biak thei nawn lo ruangah kan tangka pawl a eiral siko tin kan ruat.
‘Amah kan be thei silo, kan mangbang tukih, cumi ruangah a thuhla mipi theihter kan si. Tu ah kan thusuahmi a rak thei asile meithal leinak ding tangka kan kuatmi cu mipi thawhkhawmmi tangka a si ruangah meithal a lei thei lo asikhalle tangka tal in kuatsal dingin zangfah kan dil duh a si,” tin a sim.
Ralhrang Bawi Caw In A Saih That – Sagaing ramthen Khin Oo myone Myakan khua ah ralbawi pakhat cu caw in a saih that tin ruang vuinak ih tel mawtaw mawngtu cun mipi a simthei.
Ralhrang bawi bohnih cun lo ih thlahmi caw tuaite thatuk a hmu ih, mawi a ti tuk ruangah caw cu a cul rero. Culaifang ah cul ngaih lo caw tuaite cun ralhrang bawi a saih ngah ih,a tilmu rori ah a saih ngah. Ralhrang bawi cu zamrangten sizung fehpi dingin mawtaw ah an san ih ,a an pursuak. Asinan, sizung thlen hlanah ralhrang bawi cu mawtaw sungah a nunnak a cemfel tin mawtaw mawngtu cun Mizimma thuthang a simthei.
Sagaing ramthen Khin Oo myone sung khalah mipi ralkap le ralhrang ralkap pawl doawknak a sosang ngaingai ih, ralhrang cun mipi ummen khal an kap that phah. Hivek ruangah ralhrang pawl cu ansia an tuar siko ding tin khuami pawl cun an sim.
Ralhrang Thi 11 An Vuiliam – Sagaing ramthen Khin Oo myone Kantit dunglam ah Khin Oo khua in suak ralhrang ralkap palik pawl cu June 22, zinglam nazi 9:30 hrawngah Khin Oo PDF pawlin lamlak ah rinloparal in an rak kap ih, mawtaw sungih to ralhrang palik 11 an thi thluh.
PDF cun ralhrang palik pawl ih meithal zun 11 khal an laksak thluh ih, himdam ten dung an sip. Ralhrang palik 11 thi pawl cu June 23 ah a bur in vuiliam fel an si ih, Kantit khua kiangkap ah ralhrang pawl hro an suang ciamco tin khuami pawl cun an sim.
KHuami pakhat cun “A ni ah ralhrang thi 11 pawl ih ruang an va phur thluh zo. Ralhrang thi ruang an phurh lai khalah ralhrang tamtuk le Pyu Saw Htee pawl cun lamzin tluan an kil ih, duhtawk in meithal an kap phah. Khua sung khalah ralhrang pawl an khat thluh. Hivek ruangah mino pawl cu an relh rero,ziangahtile ralhrang pawlin an duhduh mi an kai theu.
“Mawtaw ih to ralhrang palik zaten an thih thluh tikah ralhrang pawl an tuarna tukih, maksak zetin cangvai thei an si. Makui ih PDF 12 thah an si hnuah Kannih Khin Oo PDF pawl khalin ralhrang palik 11 an that cih. A hlan ahcun ralhrang an that asikhalle a ruang an langter duh dah lo nan, tuitum cu PDF 12 thi pholang an si ruangah ralhrang palik thi 11 pawl ih ruang khal langter an si,” tin media a simthei.
Daw Suh Kyi Amah Lawng An Khum – Ralhrang ralkap cun an kaihmi Daw Aung San Suh Kyi cu amai inn ah ret nawn loin Naypidaw thawnginn sungah an khum zo thu ca an suah ih, Daw Suh kyi cu thawnginn sung inn pakhat ah kilte 3 thawn amah lawng ret a si tin sihni pawl cun an sim.
Ralhrang in rampi thuneihnak an lak veten Daw Suh Kyi an rak kai hngal ih, thubuai tampi an tuahsak. Ralhrang ralkap cun thubuai 6 hrang Daw Suh cu kum 11 sung thawngtla dingin hremnak an pe zo ih, thubuai 13 cu Court ah an rel peh rero hrih.
Ralhrang ralkap in Daw Suh Kyi an kaih tikah a umnak Naypidaw innpi ah a hnen-um pawl thawn an rak kil men. Daw Suh cun amai innpi ahcun umpi 8 a nei. Tuitum ah Daw Suh Kyi hnen-um pawl cu thawnginn sungah hruai luh an si ve lo ih, amah Daw Suh Kyi lawng thawnginn sung inn pakhat ralhrang pawlin an khum. Daw Suh cu thawnginn sung palik nunau 3 in an kil.
Daw Suh Kyi thawnginn sungih an khumnak san cu Min Aung Hlaing thupek a si ih, Min Aung Hlaing cun thawnginn sungin Daw Suh Kyi thlah zalen a tum nawn lo tin ralhrang lam tongkam a suak. A hlan khalah Daw Suh Kyi cu ralhrang pawlin an rak kai rero zo ih, Insein thawnginn sungah reilote sung khum a rak si dah nan, innpi ah kiltu nei (acechuk ) in khum a rak si theu. Asinan, tuitum ahcun Min Aung Hlaing cangvaih dan a danglam tuk ih, Suh Kyi khalih ton dah lomi a thlengter. Tu ah Suh Kyi cu Naypidaw thawnginn sung inn pakhat ah amah lawng khum a si ih, palik nunau 3 in an kil.
Leave a Reply