Tamu ih India rammi pahnih thah an si hnuah Myanmar mi pakhat cu Mohre ramri ah thah a si ve. Hivek ruangah ramri buainak a sosang sal ih, India lamin ramri an kharsal.
Tamu khawpi helnak lamzin ah Myanmar mi pakhat thi cia in July 14 ni ah a ruang an sar ih, nam in a hngawng an at. Mithi ruang cu Tamu pituh sizung ah luhpi a si ih, an cek fel hnuah thah a si tikhal an nemhnget zo.
Tamu ih India rammi pahnih thah an si ruangah ramri nasaten a buai ih, ramri ih um mipi pawlin ramri buai an tuar hleice. Ramri buainak a thazik thlang an tilai ah Myanmar mi pakhat thi cia in a ruang an sarsal ih, ramri a hnoksal.
Tamu le Mohre ramri ih mithi ruang an sarmi cu Aung Aung tiah theih a si ih, zoin an that? ziangruangah timi cu theih a si hrih lo. Tamu ih India rammi pahnih cu Tamu Pyu Saw Htee pawl thahmi a si tin mipi cun an sim. Ralhrang cun India rammi pahnih ih ruhro cu India lamah an kuat zo tin an sim.
Tuitum ramri ih Myamar mi thah a si thu ahcun khatlam khatlam in thu felfai an suah thei hrih lo. Tamu ih India rammi pahnih thah an si ruangah ramri buai cu a fel zik thlang nan, ramri ih Myanmar mi pakhat thah a si ruangah ramri a buaisal a si tin mipi cun an sim.
Kalaymyo Ah An Kap Aw Peh – Sagaing ramthen Kalaymyo Tahan vengah mipi cun July 15 , sun nazi 1 hrawngin puak awn phunphun an thei peh ih, Welesy sizung kiang le Nicia Taih lamin puak awn a thok tin an sim. July 14 , zan nazi 6 in nazi 8 tiang mipi cun Tahan veng sungah puak awn phunphun an rak thei zo.
July 15 sun ih puak awn ruangah ziangtluk siatnak a thleng timi cu felfai in theih a si hrih lo ih, Puak awn phunphun ruangah Bazar khal an khar thluh tin a kiangih um pawl cun an sim.
Tahan ih um pakhat cun “Nicia taih cu ralhrang pawl umnak hmun pakhat a si ih, a hlan khalah mipi ralkap lamin an rak kap rero zo. Tuitum ah Nicia taih lamin puak awn a thok ih, Wesley lamzin peng hrawng khalah puak theih ding a um. Kahawknak cipciar cu mipi ralkap lamin an than leh ko ding,” tin a sim.
Hakha Le Falam karlak Ah CDF Pakhat A Thi – Chin ramkulh Falam peng Dokthek khua le Hakha peng Chuncung khua karlak ih doawknak ah CDF Hakha sungtel pakhat Salai Biak Hnin cun ram le miphun hrang a nunnak a hlan tin mipi ralkap lam cun mipi theihternak an nei.
July 14 ah ralhrang ralkap le Chin raklap komkhawm pawl cu Dokthek le Chuncung karlak ah do aw an si ih, Ralhrang pawl cu Hakha peng Chuncung khua an lut fel zo. Ralhrang pawl cun July 14 zan ah Chuncung khua in inn 4 a urkang ih, July 15 ah Chuncung khua in inn hrekkhat an urkang bet.
Tutiang mipi lamin thuhla an theih dan vek asile ralhrang pawl cun Chuncung khua in inn 14 an urkang zo ih, innkang mittu an um lo tikah innkang zat a tam sinsin thei tin mipi cun an sim. Ralhrang ralkap pawl cu Chuncung in Hakha lam feh vivo tum an si.
Falam in an poksuak lai ahcun ralhrang mipum 200 hrawng an si tin an sim ih, lamzin tluan doawknak ah ralhrang thi an tam tin mipi ralkap lam cun an sim. Lamzin tluan doawknak ahcun mipi ralkap lam khalin mi pahnih an thi thlangih, CDF matupi sungtel pakhat le CDF Hakha sungtel pakhat an si.
Yangon Ah Veng Uktu An Kap – Yangon ramthen mayankung myone City mark kiangah veng uktu pakhat cu July 15 zingah meithal ih kah a si ih, a dinhmun felfai theih a si hrih lo.
Mayankung ih um pakhat cun “Tufang cu Manyankung lam boruak a sosang nasa. July 14 zan ah venglal cun ralhrang pawl a hruai ih, inntin an luhcilh vivo hnuah mino 16 an kai. An kaimi lakah ralhrang in an kaih hnuah an thlahsalmi khal an tel.
“Venglal cun thuhla felfai a zingzoi cia in a lang. A duhmi inn ah ralhrang pawl a luhpi ih, an kai hluahhlo. Kaihmi pawl cu tongnak caan le relfiangawknak caan khal an pe lo , an hruai hluahlo men. Hivek ruangah venglal cu an kap. Venglal kah a si tikah ralhrang pawl an thleng cupco ih, kiangkap ceknak an nei ciamco ih, kaihmi an neisal maw ti cu kan fiang hrih lo a si,” tin a sim.
Leave a Reply