Tedim Ih Doawknak Ah Mipi Ralkap Thu A Hmun Lo

Tedim Ih Doawknak Ah Mipi Ralkap Thu A Hmun Lo – Chin ramkulh Tedim peng Taingen check Gate ih ralhrang pawl kah an si tikah ralhrang pawl cun mipi 20 an kai ih,ralphaw ah hmang tahrat in Kalaymyo lam an pan.

Ralhrang in ralphaw ih mipi an hman ruangah CDM Siyin cun mipi an tuar ding an phangih, mipi an tel ahcun ralhrang kah an duh lo. Asinan, dothlengnak pawlkom dang cun mipi 20 hrawng hruaitu ralhrang pawl cu kalaymyo thlen hlanah an rak kap thotho.

Cumi thuhla ah CDM Siyin cun “Taingen in kalay lamih tlung ralhrang pawl cun ralphaw ah mipi an hmang timi theih a si. Mipi hruaitu ralhrang pawl mualpi an thlen zawngah dothlengnak pawlkom pakhatin an rak kap. Cumi ruangah ralhrang hruaimi mipi lakin hriamhma ngah an um phah.

‘Taingen cu kan hmunram a si ih, kan hmunram sungah kanmah theihter loin neta ah duhduh ih ralhrang kap nawn lo dingin kan lo theihter duh. Kanmah theihter loin kan hmunram sungah duhduh in cangvai nan um asile mipi ralkap khat le khat karlakah theihthiamawklonak a um thei.

“Mipi an um timi thei cingin ralhrang pawl kaptu pawlkom cu kannih CDM Syin in kan mawhthluk tuk. Neta ahcun kan hmunram sungah ralhrang pawlin mipi an hruai asile rak kap nawn lo dingah kan lo theihter duh ih, nan kap thotho asile ziang pawlkom nan sikhalle kan lo theithiamsak nawn lo ding a si,” tin thu an suah.