Karen ralkap KNU in ralhrang sakhan pakhat Tih-baw Bu an lakmi ah ralhrang 11 pawl cu thih tih ah Thailand lamah an rak tlanih, Thailand palik pawlin an kaih hnuah Myanmar ah an kuat kirsal.
Mesauh thuthang cun “An zaten ralhrang 11 an si ih, an thilri phurtu mi 3 khal an tel. Doawknak ah sakhan suahsantu pawl an si ih, Thailand ah an lut. Thailand an luh hnuah Thailand ramri kil pawlin an rak kai ih, May 19, zanlam ah Myanmar ah an kuat kirsal zo.
“Thailand an ra luh tikah an top hnianghniang ih, kutdawh tla an bang. Thailand lam cun dai an rak bualter ih, tirawl an pek hnuah Myammar lamah an kuat kirsal. Sakhan humhim thei lo, sakhan suahsan an si tikah ralhrang hotu pawlin ziangtin an tuah ding timi cu kan thei ban ve lo,” tin an tarlang.
Karen ralkap KNU sungin KNLA ,KNDO le PDF pawl cun Myawaddy myone ih ralhrang sakhan cu may 17 in an do thokih, ralhrang lamin raldonak vanzam an hmang ciamco nan, may 18 nazi 10 hrawngah KNU ralkap komkhawm cun ralhrang sakhan an lafel.
KNU cun ralhrang sakhan an lakmi in ralhrang 6 nungdam in an kai ih, ralthuam tampi an laksakmi khal an pholang. Doawknak ih ralhrang thi pawl cu anmah ralhrang dang pawlin an lak tikah ralhrang thizat an fiah thei lo. Doakwnak ahcun KNU komkhawm ralkap lakin mi 3 cun ram le miphun hrang an nunnak an hlan ve.
Leave a Reply