Thailand In Ralhrang Sumpai An Cawh

Ralhrang Sakhan An Do Ih, Ralhrang 35 An Thi – Sagaing ramthen Indaw myone ah KIA, Katha PDF le Indaw PDF pawl tangtlang cun ralhrang sakhan an do ih, pyu Saw Htee, palik le ralhrang komkhawm 35 an thi tin thu an suah.

Indaw PDF cun “Sagaing ramthen Indaw myone ih Meza palik sakhan cu July 10, zinglam nazi 3 hrawngah kannih Indaw PDF, Katha PDF le KIA pawlin kan do ih, Pyu Saw Htee ,Palik le ralhrang komkhawm 30 an thi. Ralbawi telin ralhrang ralkap pawl ih ruang 10 cu anmah ralhrang pawlin zanlam nazi 2 hrawngah an phursuak ih, Kanbalu ah an ret. A dang palik le Pyu Saw Htee ruak pawl khawiah an ret ti cu felfai in kan thei hrih lo.

“Kannih lamin pDF pakhat a thi ih, PDF 3 hriamhma an ngah. Sakhan kiangih um mino pakhat cu ralhrang ralkap pawlin an kap that ngah. Zinglam nazi 8 hrawngah Meza palik sakhan bawm dingih ra ralhrang ralkap 30 tonak mawtaw pakhat khal lamlak ah bomb puah in kan do ih ralhrang 5 an thih tlunah hriamhma ngah tampi an um. Hriamhma ngah lakin thi umbet thei an si.

“Lamzin ih thi ralhrang pawl cu anmah ralhrang pawlin kiangkap ah an phum cih. Doawknak kiangih datsi phur mawtaw pakhat khal a puak. Asinan, mawtaw mawngtu cu a thi lo a si,” tin thu an suah.

Indaw ahcun ralhrang ralkap le mipi ralkap komkhawm pawl an doawknak a rei zo ih, doawknak a sosan ruangah mipi ralkap cun mipi khal lamzinpi zawh lo dingin theihter an si.

PDF In Nauhak Pakhat An Kap That Ngah – Tanintharyi ramthen launglone myone Waisi khua ih Pyu Saw Htee pakhat U Kyaw Hein cu July 9 ,zinglam nazi 11:20 hrawngah Launglung PDF pawlin thianfai tumin an va kap ih, nauhak pakhat an kap ngah.

Pyu Saw Htee sawn cu inn dunglam in a tlansuak thei ih, a nupi le nauhak an umpi sawn hriamhma an ngah. PDF pawl cu inn sungah lutin Pyu Saw Htee nupi ih hriamhma an tuamsak ih, nauhak cu ziang na cang tin an suh tikah nauhak cun ka tha tin a rak sawn. Curuangah PDF pawl cu an tlan. A hnu July 10 lawngah nauhak nute a thi timi pDF pawlin an thei ih, ngaihthiam dilnak thu an suah cih.

Luanglung PDF cun “Pyu Saw Htee U Kyaw Hein kan kap ih, nauhak tap thawm kan thei. Cutikah meithal kap nawn loin kan zohfel hngal ih, U Kyaw Hein cu inn dunglam in a rak suak. A nupi ke ah kan kap ngah ih, a kiangah nauhak kum 7 mi a it kan hmu. Nauhak nute cu na tha maw tin kan suh tikah kan tha tin in sawn ih, kannih cun kan fehsan.

“July 10, zinglam nazi 5 hrawngah nauhak nute cu meithal kahnak hriamhma in a thi timi thuhla kan thei ih, kan mangbang tuk rori. Thuhla kan zingzoi tikah nauhak nute kan rak kap ngah ih, a caan khelin tuamhawm a silo ruangah a thi. A san cu Pyu Saw Htee dang pawlin sizung ih feh ding an rak kham.

‘kannih cu mipi kilhim dingin thutiam kan si ih, thuhla felfai kan theih hnu lawngah kan cangvai theu. Asinan, hivek in cangsualnak kan nei ih, rulhsal theih lomi siatnak a si. Hivek ruangah kan riahse tuk lawlaw ih, mipi siseh nauhak nulepa khal thinlung takin ngaithiam kan lo dil. A nulepa khal kan be zo ih, an duhdan vekin ziangkim tuah dingah thu kan tiam a si,” tin thu an suah.

US Palai In Myanmar Mino Pawl An Tong – Thailand ram ih thleng US ramdang vuanci Bliken cun July 10 ah Thailand ih Myanmar mino 6 pawl a tongih,nazi 1 sung thureltlangnak an nei.

Myanmar mino pawl cun a tufang ralhrang ralkap pawl ih dinhmun , ralhrang pawl ih daan pahbalmi le ramsung buainak pawl tivek cu US ramdang palai hnenah an simthei ih, ram buainak ruangah Myanmar mipi harsa pawl bom dan um thei dingin an dil. Mino pawl cun bomnak in pe ding asikhalle ralhrang pawl siloin tlangpar ralthuamkai hotu pawl hnenah pe uhla mipi hnenah a thlengsawn ding tin an simthei bet.

US ramdang palai khalin Myanmar mipi siseh Myanmar ram buainak khal kan hngilh dah lo ih, kan lo thei ringring. Nan lamah kan ttang ringring ih, mipi harsa pawl bawm dan ding kan tawlrel rero tlunah ralhrang pawl khal kan nor rero tin Myanmar mino pawl a simthei.

Thailand In Ralhrang Sumpai An Cawh – Ralhrang ralkap vanzam Thailand ramri sungih a zam ruangah Thailand cun ralhrang hnenah tangka kuan dingin an theihter.

Karen ramkulh Myawaddy myone sungih doawknak ah ralhrang raldonak vanzam cu June 30 ah Thailand ramri sungah an rak zam ngah pang. Cumi ruangah ralhrang pawl cun Thailand hnenah ramri kan lan ih, in ngaithiam uh tin ngaithiam an rak dil zo. A thok ahcun Thailand lam khalin ‘kan lo ngaithiam’ tin an rak sim nan, tu ahcun ramri lan man tangka kuan dingin an theihter.

Thailand ram humhimnak vuanci sangtu Chaichan cun “Tu cun ramri ah duty vanzam 2 kan retih ramri kilhimnak an nei. Kilhimtu vanzam tlunah ramri ahcun commando ralkap khal kan retih ,leihnuai khalah ramri kiltu hngetkhoh zetin kan ret bet.

“Myanmar ralkap in ramri an lan ruangah theihternak ca kan kuat zo ih, ramri lan man tangka in pe ding khalin kan theihter. Thailand ih Myanmar Embassy palai khal kan ko ih, thuhla umdan kan simthei zo a si,” tin a sim.

Ralhrang ralkap cun KNU hmunram sungah PDF ,CDM le NUG palai pawl an um tin a do ciamco ih, do peh vivo an tum tin thuhla a suak. Ralhrang pawl cun KNU hmunram sung donak ah raldonak vanzam, tank, meithalpi le ralhtuam phunphun an hmang.

Sri lanka Mipi In President Inn An Luhcilh – Thla tamzet sung buai zo Sri Lanka mipi pawl cun July 9 ah an ram president Inn, Prime Minister inn le cozah innpi pawl an luhcilh ih, inn sungah duhtawk in an cangvai ciamco.

President bik Rajapaksa tei sungkua cu mipi tih ah thupten an tlansuak ih , lawngpi an to ih an relh. President bik a tlansuah hnu cun mipi pawl cu duhtawk in President inn sungah an cangvai ih,president tili khalah dai an bual luihlo. Prime Minister inn khalah mipi pawl duhduh in an um ve.

Sri Lanka mipi cun an ram sumpai tlaksiat tuk ruangah an ram hruaitu pawl cu duh loin lamzawh duhphorhnak an neihmi a si ih, Politic party zaten telkhawm in rampi hruaitu ding din kan duh tin an aupi. Mipi pawl a thlatel in lamzawh duhphorhnak an neih tlunah cozah innpi pawl tiang an luhcilh hnu ahcun president le Prime Minister khal an hna ihsin an ban ding thu mipi an theihter zo.

President Rajapaksa cun July 13 ah ka sinak ka bansan ding tin a phuangih, Prime Minister Ranil khalin a tokham a fehsan ding thu a phuang zo.

A tufang Sri Lanka ram ah Datsi, yinan ,eiin, thilri le Gas hman ding an harsa tuk ih, an ram sumpai nasaten a tlasia. Hivek ruangah mipi cun lungrualten an ram uktu pawl an dokalh ih, an hna ihsin bang dingin an phut. Tu ahcun an ram hruaitu pawl khal an hna in ban an tum thlangih, mipi duhdan vekin cozah thar din tum a si.

An ram a tlaksiat tuk zo ruangah mipi duhdan vekin cozah thar an din thei pei maw tikhal felfai in theih a si cuang lo. Rampi huapin duhphornak an nei ih, beidong loin rampi huap duhphorhnak an neih tikah an cozah hruaitu pawl khal an sinak men humhim rero loin mipi tampi duhphorhnak ruangah an sinak bansan dingin thu an suah fel zo. Ziangtin Sri Lanka ram an tungding aw ding, ziangtin rampi a feh ding timi cu felfai in theih a si hrih lo.

Hivekin President, Prime Minister le cozah hnatuan pawlin an ban ding thu an suah tikah party komkhawm cun a rangthei bikin hrilawknak tuah an tumih, hlutdaw palai pawl hnenin president thar an hril ding. Mipi cun hivek fehpi an tummi a si ih, ziang an bang vivo ding timi cu theih a silo.

US An Paih Tiang Kan Do Aw Ding Titu Russia – Russia cun Ukraine an donak ah USA le NATO cu a phenih cangvaitu an si ih, US in doawknak an paih sung cu Ukraine ramsung ah kan do aw vivo ding tin thu an suah.

US cun Ukraine hnenah ralthuam thar an kuat thu leitlun an simthei ve ih, US thu an suah hnuah Russia in US tihrim in thu an rak suah ve. Russia in Ukraine an do hnuah US cu Ukraine bawmtu bik an si ih, hmailam khalah bom vivo an tum hrih.

NATO member sungtel dang khalin Ukraine an bawm phah nan, US tlukin an bawm lo. US cun ralthuam phunphun in Ukraine an bawm zo ih, bawm peh vivo an tum. Hivek ruangah Russia cun US an paih sung cu Ukraine ramsung ah kan doaw ding tin thu an rak suah ve.

US bomnak ruangah Russia cun duh vekin Ukraine an do thei lo ih, Ukraine lam an ttang tento thei ringring. US ruangah Russia cun Ukraine rampum si nawn loin Ukraine nisuahnak lam lawng an do phah ih, Dobas ramthen sung zalennak pek an tum. Cukhal US cun rem an ti cuang lo ih, Ukraine tanpi in theitawk an suah. Curuangah Ukraine le Russia ram doawknak cu rei a awh hrih dingin a lang.