Ralhrang ralkap in rampi thuneihnak an lak hnuah an kai ih, thubuai tampi an tuahsakmi Daw Aung San Suh Kyi cu June 22 ,2022 ah Naypidaw thawnginn ah khum a si tin buaipitu pawl in media an simthei.
Thuhla theitu cun “Thuhla kan theih dan vek asile Naypidaw thawnginn sungah Daw Suh Kyi an khum ding timi kan theihnak a rei zo. Naypidaw thawnginn sungah inn pahnih sak thar a um ih, president Win Myint le Daw Suh umnak ding tin an sim.
‘Tuini ah Daw Suh cu Naypidaw thawnginn lamah an kuat. Thawnginn sungah kiltu a nei pei maw? umpi a nei thei pei maw? tivek cu zianghman kan thei lo. Ralhrang lamin ziangtin an tawlrel tikhal in simthei hrih lo a si,” tin a sim.
Ralhrang ralkap in rampi thuneihnak an lak hnuah Daw Suh Kyi cu thubuai 19 an tuahsak zo ih, thubuai 6 hrang kum 11 thawngtla dingin hremnak an pe zo. Tu ah thubuai 13 rel peh rero lai a si hrih. Thubuai rel peh dingmi pawl cu Naypidaw thawnginn sung Court ah rel peh a si ding tin a sungte pawl cun an sim.
Ralhrang In Mipi 2000 Tlun An That Thlang – Ralhrang ralkap in rampi thuneihnak an lak hnuah mipi 2007 an that kim zo tin hminsin tuahtu AAPP cun June 22 ah thu an suah.
AAPP cun “Ralhrang in 2021, February 1 ah rampi thuneihnak an la ih, cumi hnuah mipi 2007 an that zo. 2022,june 22 ah ralhrang cun Kachin le Sagaing ah mipi 7 an that. Hitin , ralhrang in rampi thuneihnak an lak hnuah mipi an thahmi 2007 a kim.
Ralhrang cun rampi thuneihnak an lak hnuah mi 14237 an kai zo ih, cumi sungin mi 3042 an thlah zo. Mi 11174 pawl cu ralhrang kutah an umlai ih, cumi sungin mi 1190 pawl cu hremnak an pe zo. Ralhrang in hremnak an pekmi ah nauhak 2 an tel ih, mi 115 pawl cu thihdan an pe zo a si,” tin thu an suah.
AAPP in mipi thi an hminsinmi pawl cu buainak ih tel lo, mipi rak ummen ralhrang pawl ih thahmi le ralhrang ralthuampi tlak ruangah thi pawl an si.
Tlawngta 3 Le Mipi 20 An kai – Rakhine ramkulh Myuak Oo ah ralhrang ralkap cun tlawngta 3 le mipi 20 pawl June 22 zingah an kai ih, AA thawn an dinhmun a sosang deuhdeuh.
Khuami pakhat cun “Zinglam nazi 8 hrawngah AA in ralhrang 3 an kai tin thuhla kan thei. Cumi ruangah ralhrang pawl cu zankhua in khua sungah an hel. Zinglam ah tlawngkai ding tlawngta 3 cu ralhrang in an rak kai ve ih,khua sungah phone an cek ciamco.
“Phone sungah AA hla, AA zuk tivek nei pohpoh cu an kai vivo. Ralhrang cun an kaihmi pawl cu mawtaw sungah an khum vivo ih, tlawngta 3 le mipi 20 hrawng an si. Tutiang ahcun kaihmi pawl hmin cazin felfai in kan thei hrih lo.Hivek ruangah mipi cu tih in kan um ih, dawr nei pawl khal an dawr an ong ngam lo a si,” tin a sim.
June 20 ah AA cun ralhrang 3 an rak kai ih, June 21 ah ralhrang pawl cun Myauk Oo khua sungah an cek ciamco ih, June 22 zingah tlawngta 3 le mipi 20 hranwg an kai.
Rakhine ramkulh Pukpa khalah AA cun ralhrang palik 3 le ralhrang ralkap 4 an rak kai ih, cumi ruangah ralhrang pawl cun khuami 10 hrawng an rak kai zo. Hitin Rakhine ramkulh sungah AA le ralhrang an kai aw ciamco ih, an boruak a sosang deuhdeuh cu a si.
Zirhtu Pawl Hlawh A Tlanpi – Ayeyarwady ramthen, Myaung Mya peng myone fimzir zung ih cazi pakhat cun tlawng sayagyi, saya/ma pawl ih khualtlawnnak ding sumpai ting 200 lenglo a la ih a tlanpi tin khuami pawl cun media an simthei.
Myone fimzir zung ih cazi (1) pakhat cun tlawng sayagyi le sayamagyi pawl hrangah an thla hlawh suah ti um loin a kaihtang rei tukih, tlunlam in an ko. Cuvek dinhmun khalah a feh duh cuang lo ih, neta ahcun sumpai thawn a tlan timi an theisuak.
Thuhla theitu cun “Cazi nu ih hmin rellan a si lo. Amah in sumpai a kol tikah maltete in a rak hmang. A hmanmi le sumlut sumsuak a kaih thei lo ih a tlansuak a si bik. Sumpai a tlanpi zat hi ting 200 lenglo a si ding. Tlawng saya pawl cu thla hlawh an don lo ruangah an thinheng tuk zo. Thubuai le an tuahsak ngan lo tikah hlawh nei lo ih hnatuan vek an si,” tin a sim.
Ralhrang in tlawng an phuan tikah tlawng hmin pe tamnak bik hi Ayeyarwady ramthen a si ih Myaung Mya peng cu tlawnginn zaten tlawng an phuan thluhnak hmun a si.
China In US A Tongkhum – US le nitlankak lam ram pawl cun China cu ram zalen lo, media zalen lo, mipi ukbet tin an soisel ih, China lam daiten ummen duh loin US le nitlankak lam ram pawl an kap ve.
China hi leitlun Democracy ram tuanpi loin an um ruangah Democracy ram pawl cun China umdan an ngaih lo zetih, a phunphun in China an soisel. Asinan, China cun Democracy ram pawl cu a hmin men lawngih zalen, a takah hmuh ding um lo tin an dinhmun an relsak ve.
China ramdang thuphuangtu Wang Wenbin cun “Zokhalin ramdang thuhla an rel tikah an duh vekin an phorh mualpho thei. Cuvekin an tuah tikah an lungawi thei ngaingai. US hin ram hrekkhat hremnak a pe theu ih, an dung an thlun theu.
“Kan rel duhmi cu Democracy ram ti aw pawl khal an ram sungah zalennak hmuh ding a um lo ih, anmah khal ramdang buaitertu an si. Ramdang thu ah an tel, an hrolh aw ringring ih, buainak suakter sawn an si,” tin leitlun a simthei.
Leave a Reply