Thawngtla Phur Ralhrang Mawtaw An kap

Thawngtla Phur Ralhrang Mawtaw An kap – Mandalay ramthen Amarahpura ah thawngtla mi 8 phurtu ralhrang mawtaw cu mipi ralkap lamin an kap ih,ralhrang palik an thih tluanah thawngtla 2 an tlansuak thei tin mipi ralkap lam cun thu an suah.

Amarahpura PDF cun “September 29 , zinglam nazi 9 hrawngah Mandalay ramthen Amarahpura ah thawngtla pawl phurtu ralhrang ralkap mawtaw cu kannih mipi ralkap komkhawm in lamlak ah kan rak kap ih, a hmunah ralhrang pahnih an thi. Thawngtla an phurhmi pakhat khal hriamhma a ngah ve. Thawngtla 8 an phurhmi pawl cu mawtaw kan kah veten an tlansuak hngal nan, thawngtla 6 cu ralhrang pawlin an kai ngah ih, thawngtla 2 cu an tlansuak lanta.

“Thawngtla tlansuak pahnih cu kannih mipi ralkap lamin hmunhim ah kan kuat hngal ih, an thuhla cipciar neta ah kan thlah leh ding. Thawngtla phur ralhrang mawtaw kan kah tikah ralhrang pawl an thinphang tukh lamzin tinkim an cek ciamco a si,” tin thu an suah.

Ralhrang Meithal Zun 7 An Laksak – Mandalay ramthen Min Gyan myone Piubwe Sanpia khawlal inn ah ralhrang pawl an um timi thei in PDF pawl cun an va kap ih, ralhrang le khawlal pawl an tlansuah thluk tikah meithal zun 7 an laksak.

September 29, sun nazi 1 hrawngah PDF cun khawlal ih um ralhrang pawl an kap ih, ralhrang le khawlal pawl an rak tlansuah man ruangah thi an um lo nan, an ralthuam meithal zun 7 la man loin an tlan thluh ih, PDF lamin ralhrang meithal zun 7 an laksak.

Khuami pakhat cun “Thuhla kan theih dan a bangaw ruri lo nan, thudik pakhat cu PDF pawlin ralhrang pawlih meithal zun 7 a laksak thei timi cu a dik rori. Hrekkhat in ralhrang pawl hmundang ih zu an in sungah an meithal pawl thingkuang sungah an thup ih, cucu PDF pawlin an laksak tin an sim. Hrekkhat cun PDF pawlin khawlal inn an kah ruangah ralhrang le khawlal pawl ralthuam la man loin an tlan ih PDF lamin an meithal zun 7 an laksak tin an sim. Ziangasikhalle , PDF pawlin ralhrang meithal zun 7 an laksak thei tikah lungawiza ngaingai a si,” tin a sim.

Ralhrang Sibawi 2 An Thi – Shan ramkulh Nankham khua ah ralhrang sibawi pahnih le ralhrang bawi pawlih tonak mawtaw ah mipi ralkap pawlin bomb an deng lutih bomb puak ah ralhrang sibawi pahnih le ralhrang bawi 2, an zaten mi 4 an thi tin mipi ralkap lam cun thu an suah.

September 29, zan nazi 7 hrawngah ralhrang hmunih ralhrang sibawi pahnih le ralhrang bawi pahnih pawl ih tomi mawtaw a puak ih, a hmunah ralhrang sibawi pahnih le ralhrang bawi pakhat an thi. Ralhrang bawi pakhat dang cu hriamhma naa tuk a ngah ih, sizung an fehpi cih nan, sizung a thlenpi hnuah a thi thotho.

Ralhrang mawtaw sungah mipi ralkap lamin bomb an deng lut fuh tukih mawtaw cu laktlak nawn loin a puak ih, an kang vutvo. Ralhrang mawtaw kang cu a puak phahphah ih kiangkap mipi in an mit ngam lohli lo. Neta ah ralhrang mawtaw kang an mit thei nan,ralhrang 4 an thi phah thotho.

Typhoon Noru Thlisia Ruangah Mi 5 An Thi Zo – China sea ihsi ruak Typhoon Noru thlisia cun Philippines, Vietnam le Laos ram pawl a nuai hnuah September 28 ahcun Typhoon Noru thlisia in Thailand ram a nuai ve ih mi 5 an thih phah zo.

September 29 ahcun Thailand ram District 4 rori in thlisia an tuar ih, ti a lian. Thlisia ruangah inn a cim, thingkung a tlu ih, mi 5 an thi zo. Thlisia hrang ruangah ti a lian phah ih,tilik ruangah mi tamzet an umnak hmun suahsan in hmunhim an pan rero ve.

Thlisia le tilian ruangah inn 29 a siat zo ih, hmunram eka ting tlun a siat zo. Lamzin 200 hrawng khal tilian ruangah a siat phah ih, hriamhma ngah an tam. Thailand ram nikua zohthiam pawl cun September 29 in October 4 tiang Thailand ram sungah thlisia a hrang thei ih, ruah a cen thei tin mipi ralrinnak a rak pe cia. Cumi ruangah mi tampi him phah khal an um.