Ralhrang ralkap cun ramsung buainak ruangih an kaihmi lakin thihdan pekmi tam tuk an nei zo ih, cumi sungin mi 4 pawl cu a takin kan that thlang ding tin thu an suah. Ralhrang in kan that ding ti ih thu an suahmi ah 88 tlawngta hotu Jimmy le NLD palai Phyo Zeyar Thaw khal an tel ve.
Hivek a si tikah leitlun ramdang le pawlkom phunphun cun nasa ten ralhrang an mawthluk ih, atthlakza zianghman tuah lo dingin an theihter. Ramsung pawlkom phunphun khalin nasa ten ralhrang pawl ralrinnak an pe ve ih , thihdan an pekmi pawl an that taktak asile phuba an lak cih ding thu an sim.
Ralhrang thuphuangtu Zaw Min Htun cun “Tu ahcun zangfah dilnak tiang kan thleng thluh zo ih, thawnginn tuanvo neitu hnenah kan ap thluh zo. kan rettha ding kan ti cun ,kan ngaithiam salnak ding zianghman a um lo. Curuangah, kan rettha ding timi cu thufel zo a si,” tin a sim.
NLD Central sungtel U Kyaw Htwe cun “Ralhrang in thihdan an pekmi lakin mi 4 that dingah thu an suahmi cu dothlengnak tuahtu mipi pawl thanau dingin an tuahhrim a siko. Hivek thubuai cu a sangsang ten feh vivo ding a si ih, rampi uktu hnen tiang thleng ding a si. Rampi president ih relcat dingmi a si ih, ralhrang in a takin an tuah taktak asile ramsung ramleng ah an hmai a bal deuhdeuh ding a si,” tin a sim ve.
Ralhrang ralkap cun that dingin thu an suahmi 88 tlawngta hotu Jimmy le NLD palai Phyo Zeyar Thaw cu Yangon hmun pakhat ah ralthuam tampi thawn kan kai ngah. Yangon ih PDF pawl hotu an si tlunah mi tampi that zotu an si tin an thuhla an rak suah. Cumi ruangah thihdan pe an si ih, tu ahcun that taktak dingin thu an suah.
Ralhrang ralkap midang pahnih that dingih thu an suahmi cu Yangon Hlaingtaya vengih buainak ruangah ralhrang in an rak kaihmi Hla Myo AUng le Aung Thura Zaw an si. Annih pahnih khal ralhrang in mithat thubuai an tuahsak hnuah thihdan an pekmi an si.
NUG cozah in vuanci Aung Myo Min cun “Kannih cun ralhrang ralkap ih fehpimi ziangkim kan zum lo lawlaw. Democracy diltu pohpoh ral ah an suah. Curuangah,annih ih pekmi daan kan cohlang ve lo. Ralkap cu ralkap an si ih, rampi laireltu an silo. Hivek cu leitlun daan pahbalnak a si,” tin a sim ve.
Ralhrang in thihdan an pekmi lakin mi 4 kan that ding ti ih thu an suah hnuah UN,USA le France ram pawl cun nasa ten ralhrang an mawhthluk ih, an feh dan cu leitlun dankalh a si tin thu an suah rero nan, ralhrang cun UN, USA le France ram pawl ih thusuahmi cu zamrang ten an let ve ih, daan kan neihmi cu ramsung mipi zate parah bangrep in kan hmanmi a si tin an simthei ve.
Ralhrang ralkap cun 1976 , June 26 ah Chin tlawngta hotu Salai Tin Maung Oo an rak thlaithat ih, cumi hnuah Myanmar ram lairelnak sangbik cun thihdan an pekmi a takin thahmi an nei nawn lo. Tuitum ah ralhrang in mi 4 pawl a takin an that asile kum 46 hnuah Myanmar ah thihdan pekmi a takin an thahsal caan a si ding.
India In Ralhrang Ramdang Vuanci Palai An Sawm Lo – ASEAN sungtel le India cozah tonawknak ah India cun ralhrang ramdang vuanci palai an sawm lo ding thu an sim. Meeting cu India ram ah tuah ding a si ih, inntek cun ASEAn sungtel pawl meeting kai dingin a sawm hai.
Myanmar khal ASEAN sungtel an sinan, ralhrang ramdang vuanci cu sawm a silo. Hivekin India cun ralhrang ramdang vuanci an sawm lo nan, Meeting ah India ram ih Myanmar Embassy palai cu meeting ah a tel men thei tin thu a um thohtho. Cumi a rem lo asile India cun ramdang vuanci zung ih hnatuan silo, vuanci dang zungin mi pakhat khat a sawm men thei. Neta ahcun Myanmar tokham an lawngter thei khal a si tin BBC cun a tarlang.
Myanmar ram a buai hnuah India cu ralhrang dinpitu tin leitlun theih a si ih, leitlun a hmaisong ruangah ralhrang ramdang zungin palai an sawm ngam lo tin mi hrekkhat cun an sim. Anmah India ramsang vuanci zungin palai cu ralhrang in rampi thuneihnak an lak hnuah Myanmar ah a rak tlawng zo ih, Min Aung Hlaing thawn an rak tongaw. India cu China vek langpang tukin ralhrang an tannak an langter duh lo ih, tuanpi tho ih, khatlam pawl lungawi zawng tuah phah tum khal an si tin Myanmar politic thiam pawl khalin an rel ve.
American In N.Korea An Hro – Tui kum sungah nasan ten bomb zamthei kap puak rerotu N.Korea cun avei 7-nak Nuclear bomb zohfel an tum tin thuhla a suak ih, US cun N.Korea cu ralrinnak an rak pe ve cih.
US ramdang vuanci zung cun “Ralrinnak kan pe rero cingin, N.Korea in Nuclear zohsinnak an nei thotho asile kan tuanpi Japan le S.Korea pawl thawn kan thungrul hngal ding a si,” tin thu an suah.
American cun Nuclear thu ruangah N.Korea cu natak in hrem dingin UN ah an thehlut rero zo nan, American ih thehlutmi cu China le Russia in an thuneihnak veto power hmangin an rak hlonsak ringring. Hivek cingin N.Korea in Nuclear an buaipi thotho asile UN khalah N.Korea hrem thei dan kan buaipi dingin kan tuanpi pawl thawn kan thungrul ding a si tin US UN palai khalin a sim ve.
Leave a Reply