Tlangpar Ralthuamkai 6 An Tongaw

Tamu Ah Ralhrang Mawtaw Bomb An Puah – Sagaing ramthen Kalaymyo in Tamu lamih feh ralhrang ralkap pawl cu September 19 zinglam nazi 10 hrawngah Tamu PDF in Khawhmunuam kiangah bomb an rak puah.

Ralhrang pawl cun September 18 zan ah Kalaymyo suahsan in Tamu an rak pan. September 19, zinglam nazi9 9 hrawngah ralhrang ralkap cun Khuahmunnuam khua in inn 7 an urkang sak. Mipi inn an urkang sak hnuin ralhrang pawl cu Tamu an pan ih, zinglam nazi 10 hrawngah Tamu PDF in bomb an rak puah.

Tamu pDF sungtel pakhat cun “Kalay in ralhrang pawl an suak timi an theih veten Khawhmunnuam khua pawl cu khua ah um ngam loin khua an rak suahsan cia thluh. Cutikah mipi cu an him. Asinan, ralhrang pawlin Kawhmunnuam khua in inn 7 an urkang sak.

“Ralhrang pawl cu khawhmunnuam khua an urkang hnuin Tamu lam an feh betih, lamlak ah kannih Tamu pDF cun bomb kan rak puah. Bomb puak ahcun ralhrang thi an um rori ding nan, a zat kan fiah thei hrih lo a si,” tin a sim.

Pin Oo Lwin Ah Innsang Khat An That Thluh – Mandalay ramthen Pin Oo Lwin khawpi kiang Sikaa’ khua ih innsang khat member 5 pawl cu an umnak hmunah thah an si ih, mibawmtu pawlkom in an ruangt an buaipi.

Ruang buaipitu cun “September 18 zinglam nazi 11 hrawngah a si. Innsang palik, nubik le an fate 3 cu hmunkhat ah an rak that. An fate pakhat cu kan thlen ah a thaw a thaw thei lai nan, sizung kan fehpinak lamzin ah a nunnak a cem. An ar vulhnak hmunah an sungkua in thah an si ih, meithal siloin hriamhma kan hmu lo, nam ih dawhnak le ahnak hriamhma an si.

“Thuhla kan zingzoi dan vek asile kiangkap innhnen thawn khalin buainak an nei lo. Tu cu nauhak khal zuah loin an sungten thah an si tikah kan mangbang ngaingai. Tuhrih tiang ahcun zoin an that? ziangruangah timi a san khal kan thei hrih lo. Ruang zaten Pin Oo Lwin sizung ah kan ret zo ih, buaipi fel a si hnu lawngah kan phum thei ding a si,” tin BBC a simthei.

Raltlan Pawlih Eiin An Siatsak Thluh– Makui ramthen Yesagyo myone Yele Kyuan hmunram sungih raltlan pawl hrang bomnak fangfai, fang le eiin phunphun pawl cu ralhrang ralkap pawlin datsi an toih ih an urkang sak thluh.

Khuami pakhat cun “Ralhrang pawl kan khua ih an rat tikah kan tih tukih phungki tlawng ahcun kan lut thluh. Ralhrang pawl an thlen veten raltlan hrang bomnak an retmi fangfai , fang le eiin phunphun pawl cu lengah an suahter thluh ih, datsi an toih hnuah an urkang. An urkangmi pawl cu zohman khawm an siang lo ih, ruah a sur tukah a siat thluh men.

“Ralhrang pawlin September 1 in September 18 tiang Yele Kyuan hmunram sung an suamsam vivo phah ih, khua hrekkhat in inn khal an urkang sak. Curuangah raltlan an tamih, cumi hrang bomnak an retkhawmmi cu ralhrang pawlin an hmu thei lo. Rawl rori hivekin an tuah duh cu mak kan tituk lawlaw. Tu ahdcun ralhrang pawl khua in an suak thluh zo ih, an ra kiisal pang ding kan phang tuk a si,” tin a sim.

KNU In Ralhrang 51 An Thianfai – Karen ralkap KNU cun KNU hmunram 5-nak sungih ni 15 sung ralhrang ralkap thawn an doawknak thuhla cu mipi theihternak nei in ca an suah ih, ni 15 sung doakwnak ah ralhrang 51 an thi tin an tarlang.

KNU cun “September 1 in 15 tiang KNU hmunram 5-nak sungah kannih KNU ralkap KNLA le ralhrang pawl vei 68 kan do aw ih, doawknak ah ralhrang bawi telin ralhrang 51 an thi. Ralhrang 31 khal hriamhma an ngah ih, hriamhma ngah lakah ralhrang bawi khal an tel.

“Doawknak ah ralhrang le an tuanpi BGF pawl cun khuami pakhat an kap that ih, ralhrang pawl cun mipi umnak ah ralthuampi vei 32 an kap suak. Ni 15 sung kan doawknak ahcun kannih KNLA lamin miraltha pakhat kan can ih, hriamhma ngah miraltha 11 kan um ve a si,” tin KNU cun thu an suah.

SSPP Le Ralhrang An Kap Aw – Shan ramkulh nitlaknak lam Moemeik myone sungah ralhrang ralkap le Shan ralkap pakhat SSPP an kap aw ih, ralhrang 3 an thi tin SSPP lam cun thu an suah.

Khuami pakhat cun “Moemiek myone sungih cangvai SSPP pawl cu ralhrang ralkap pawlin suak dingin thu an pe. Curuangah Wan-ung khua dunglam tlanghram ah SSPP le ralhrang an kap aw. Doawknak ah ralhrang 3 an thi ih, ralhrang 5 in hriamhma a ngah tin thuhla felfai kan dong.

“Ralhrang pawlin SSPP suak dingin thu an pek tikah SSPP lam cun kan suak lo dingin tin an theihter cih ih, an kap aw. September 17 ah kap aw an si ih, September 18 ahcun ralhrang lamin mipum an labet ciamco. Curuangah ,doawknak picang suaksal thei dinhmun in a lang.

“2022, July thla khalah SSPP le ralhrang pawl Moemiek ah an rak do aw zo. Asinan, do aw peh loin an rak berem aw thei. Tuitum ahteh an berem aw thei pei maw kan thei lo. Khatlam ah SSPP hotu pawl le ralhrang hotu Min Aung Hlaing cu Naypidaw ah an tongaw rero ih, hilam ah an kap aw fawn thil umdan hi kan theithiam ve lo a si,” tin a sim.

Tlangpar Ralthuamkai 6 An Tongaw – Tlangpar ralthuamkai lakih mipum le ralthuam nei thabik ding an timi Wah , AA, MNDAA, TNLA , NDAA le SSPP pawl cu Wah ramsung ah an tongaw ih, thurel tlangnak an nei.

Pawlkom 6 zaten ralhrang thawn kap aw lo dingin NCA hminkhen ngan lo an si ih, NCA hminkhen ngan lo lakah KIA an tel lo. Tlangpar ralthuamkai 6 tongaw lakin SSPP, WAh le NDAA pawl cun NCA hminkhen an ngan lo nan, Min Aung Hlaing an tong zo thuang.

Cutilai in AA, TNLA le MNDAA pawl cun Myanmar rampi a buai hnuah Min Aung Hlaing in amah be dingin a sawm reromi an sinan, Min Aung Hlaing tong duhlotu an si. Tuitum ah ram buainak thuhla ah an cangvaih dan ding thuhla ah tongaw an si ih, an thurelmi cipciar cu mipi theih ah an phuang lo.

Thupibik ih an relmi ah tuitum ram buainak ih cangvaihnak dan ding timi a si. Tufang ah pawlkom 6 lakin AA cun Rakhine ramkulh sung le Paletwa peng sungah nasaten ralhrang ralkap an do rero ih, culo midang pawl cu a caancaan ah ralhrang do phah an si.

UN Sungtuan In Putin Ralrinnak A Pe – UN sungtuan Antonio Guterres cun Russia president Putin cu phone in a bia ih, buainak rehti a neih lole leitlun siseh Russia khalin nasaten eiin an tlaksam phah ding thu a simthei.

Russia cun 2022, February 24 in Ukraine a rak do thokih a thok ahcun Ukraine khawpi bik Kyiv tiang an rak kap. A hnuah Russia ralkap pawl cu Ukraine hmunlai lamin dung an sip ih, Ukraine nisuahnak lam sawn nasaten an do. Ukraine nisuahnak lamah Russia in hmunram lakmi an nei phah rero nan, an tum bangin Donbas ramthen pumpi an la thei cuang lo.

Hivek dinhmun ah Ukraine ram hmundang ih um Russia ralkap pawl cu an umnak hmunin dung an sip rero ih ,Ukraine ralkap pawlin Russia ralkap pawl rak luahmi hmun tampi an luahsal zo. Asinan, Ukraine nisuahnak lam ahcun Russia ralkap pawl an um hrih ih, buainak a dai hrih cuang lo.

Putin cun “Ukraine hmunlai lamih dung kan sip ruangah kan sung tinak a silo, kan tuah duhmi cu tampi kan tuah suak zo. Tu ah kan ralkap pawl cu Russia ah an tlung thluh tinak asilo ih, Donbas ramthen sungah an finkhawm aw sawn. An ngam le Ukraine pawl khal Donbas ramthen sung tiang ra haiseh la an thei mai ding a si,” tin Putin a tongsuak hrih.

UN sungtuan Antonio Guterres cun “Leitlun mipi harsatnak an tonlonak dingah le Russia mipi in harsatnak an ton sinsin lonak dingah doawknak cawlhsan a tul. Hivek dinhmunah Russia in doawknak an cawlhsan duh cuang lo asile leitlun in a rualin Russia hremnak pe uhsi. Buainak kan tifel a tul thlang a si,” tin Putin a rak simthei ve.

Russia in Ukraine an kah ruangah Europe ram tlunah US le Canada ram pawl cun Russia suak, Gas, Yinan le thilri phunphun an lei duh nawn loin Russia sipuahzi phih an tum. Asinan, China, India le Belarus ram pawlin Russia suak phunphun an leisak tikah Russia lamzin a tawp hrih lo. Hivek cu sipuahzi lamih an doawknak a si.