Tlangpar Ralthuamkai In China An Cohlang – Saklam tlangpar ralthuamkai pawlkom FPNCC sungtel pawl cun Myanmar ram buainak ih China an tel cu an cohlan thu an sim. FPNCC ahhin KIA, AA, TNLA, Wah, SSPP, MNDAA le NDAA pawl an tel.
FPNCC pawl cu March 15 le 16 ah Wah hmunram ah hmunkhat ah tongaw ih thurel tlangnak an nei. Thurel catnak an neihmi pawl cu mipi theihternak an nei ih, cumi ahcun Myanmar ram buainak ih China an tel mihi kan cohlang ti’n an tarlang tel.
FPNCC cun “Kannih tlangpar ralthuamkai pawlkom 7 pawl cu Wah hmunram ah kan tongaw ih thurelnak kan nei. Cumi ahcun kan sungtel pawlkom 7 pawlih hotu le palai pawl kan telkim thluh. Meeting ahcun Myanmar ram buainak le covid 19 natnak ruangih mipi tuarnak pawl kan rel ih pawlkom pakhat tin hmuhdan khal kan hlawm aw.
“Pawlkom pakhat teten kan dinhmun kan fel hnuah rem tulmi pawl kan rem ih, khat le khat karlak ah buainak um lo dingin kan relkhawm bet. Myanmar ram buainak ah kannih tlangparmi pawl cun Federal Democracy uknak din kan duh. Hivekin uknak din kan tum tikah ka nthagzang le neihnak kan hmansuah a tul.
“Covid 19 natnak kan tuar laiah Kan hmunram ciar sungih mipi harsa pawl bawm thei dingin bomnak in petu China parah kan lungawi timi khal kan sim duh. Covid 19 natnak hnuin China thawn kan tuantlang sinsin ih, kan hmunram sung harhdamnak, sum tuahnak le thildang ziangkim khalah China thawn kan tuantlang vivo ding. Pawlkom dang in bawmtu pawl par khalah kan lungawi.
“Myanmar ram buainak ah remdaihnak um dingin theitawk suahtu China ih cangvaihnak hi kannih tlangpar ralthuamkai pawlkom 7 pawl cun kan cohlang. Khat le khat zum aw sinsin dingin tuantlang vivo ding thu kan relkhawm hnuah meeting kan khar a si,” tin thu an suah.
China thawn tuantlang tlangpar ralthuamkai pawlkom 7 lakin Kachin ralkap KIA, Kokang ralkap MNDAA le,Palaung ralkap TNLA pawl cu ralhrang ralkap do rerotu pawl an si ih, SSPP, NDAA le Wah pawl cu ralhrang an do lo. AA hi cu ralhrang an do ciamco lawk nan, tutak fangah ralhrang thawn do aw ve lo an si. Kan dungah China palai cun tlangpar ralthuamkai lakin KIA, AA, MNDAA le TNLA pawl an rak be zo ih, ralhrang hotu Min Aung Hlaing khal China palai cun a bia.
Chin, Russia Le Iran Pawl Raldo An Zirtlang – Leitlun Communist ram picang pathum China, Russia le Iran ram pawl cu lungrual zetin hmunkhat ah raldo zirtlangnk an nei ve.
Chin, Russia le Iran ram pawl hi March 15 ihsin raldo zirtlangnak an rak nei thok zo ih zarhpi ni tiang raldo zirtlangnak an nei ding. Ram pahnih cu Gulf Of Oman ah raldo zirtlangnak nei an si.
Ram pathum raldo zirtlangnak an neih cu China in leitlun theihternak an nei ih, kan ram pathum in tampi kan thansoh phah ding tin an sim. China, Iran le Russia ram pawl hi 2019 kum khalah raldo zirtlangnak an rak nei zo.
Ram pathum pawl hi ral dinhmun ah tuantlang, remawknak nei an si ih, Russia in Ukraine an domi khalah China le Iran cun Russia an dinpi ih ralthuam tiang an pe. March 16 khalah Ukraine ralkap pawl cun Russia thawn an doawknak ah China tuah Drone pakhat kan kap tla tin thu an suah. Leitlun Democracy ram pawl an tantlang rero bangin Communist uknak ram pawl khal an rak tangtlang rero ve.
UN Ah Ralhrang Pawl Cangvaihnak Pholang – March 16 ih UN palai tonkhawmawknak ah Myanma UN palai U Kyaw Moe Tun cun ralhrang pawl cangvaihnak cu hmuh theih zuk hmangin a pholang ih meeting ka palai pawl a zohter hai.
U Kyaw Moe Tun cun “Ralhrang pawl hi minung covo daan an pahbal timen a si nawn lo. duhtawkin mipi a that ih , a bur ih mipi an thahmi a tam zo. Ralhrang in rampi thuneihnak an lakmi khal kum 2 a kim zo ih ralhrang pawl cangvaih dan khal a luarkai deuhdeuh. Royingya miphun par lawngah siloin Myanmar mipi zate parah ralhrang pawl rapthlak tukin an cangvai. Hivek a si vivo ahcun Myanmar mipi in an tuar cawk lo ding.
“Myanmar ram buainak hi party pakhat le ralhrang buainak men a silo. Ralhrang in daan pahbal in thuneihnak an la ih fehpi vivo an tum. Tutiang ahcun ralhrang cun mipum 3130 pawl cu ralthlak tukin an that zo ih, an lu an tansak. Ralhrang in an thahmi lakah thawnginn sungih an hrem thatmi tivek khal a um. Hivek men a si hrih lo, ralhrang pawl cun tlunzuang raldonak in mipi inn thawng 62 an puah siat zo.
“Ralhrang ruangah Myanmar mipi 1.6 Million tluk an tlan zo ih, mipi 18 Million tluk cu bomnak pek tul tuk dinhmun ah an um zo. Ralhrang in a bur ih vei 64 mi an that zo ih, cumi ahcun mipi 766 an thi. Mithi lakah nauhak 62 an tel. Tuikum sung lawngah ralhrang cun Sagaing le Shan ah a bur in mipi an that zo. Cucu, an zuk le video kal kan nei thluh.
“Tuih kan ram buainak khal Poltics hmuhdan bangaw lo men ruangah a silo. Ralhrang in rampi thuneihnak an lak hnuah ralthuam hmangin mipi an dekcok an that ih cumi ruangah mipi lam khal duhhril ding dang kan nei lo ih, ralthuamkai phah kan si. Tu ah ralhrang pawl cun hrilawknak tuah an tumih a lemmen a si ruangah kannih mipi cun kan pom lo. Zalennak Democracy hrang cangvai kan si,” tin a sim.
Leave a Reply