Tlawng Sayakyi Ruk A Si Hnuah Tlawngkai Ngam Lo An Tam

Rakhine ramkulh Maungtaw myone ahcun tlawng sayakyi pakhat le zirhtu pakhat ruk-hlo an si ruangah zirhtu tlawngkai ngam lo an tam.

Maungtaw myone Tinbaw hlah khua ih hramthok tlawng sayakyi le zirhtu pakhat cu Musilim tapung pawlin an ru ih, Myanmar tangka ting 1000 lole Bangladesh tangka ting 50 an dil. Tlawng sayakyi le sayamah rutu cu Bangladesh ih um Muslim tapung pawl an si tin an sim.

Bangladesh ah Myanmar ram in tlansuak Rohingya muslim tamzet an um ih, Rakhine thawn ramri a si. Bangladesh ah um cingin Myanmar ramsung Rakhine ramkulh sungah cangvai phah ralthuamkai khal an um.

Hivek ruangah Maungtaw myone sungih zirhtu hrekkhat pawl cu tlawng an kai ngam nawn lo ih, kan him lo tin tlunlam an theihter. Tlawngkai dingin lolak zin an zawh theu ih, hmunhla feh tul a si ruangah tlawngkai ngam lo cu an si.

Tlawnginn umnak khua ih um pawl cu an buai lo nan, hmundang khua ih feh tul zirhtu pawl cu tlawngkai ngam lo an si. Lamlak ah ruk le kaih an tuar ve ding an phangih, tuhrih ahcun tlawngkai loin an um.

Maungtaw fimzirzung hotu cun “Zirhtu lakin tlawngkai ngam lo an tum timi cu a dik ko. Duhphorhnak an tuah siloin kan him lo tin tlawng an kai ngam lo. Tlawng sayakyi le zirhtu pakhat ruk hlo an si ih,cumi ruangah zirhtu dang hrekkhat tlawngkai ngam lo an si.

“Taktak teih rel ahcun 2021 kum ihsin zirhtu hrekkhat an him lo. Zirhtu pawl an him theinak dingah kiltu kan ret vivo nan, haidaih lo ruangah kiltu nei lo tlawng tivek khal an um. Tuih tlawngkai ngam lo, kan him lo tipawl cu hmunhla ih tlawng feh tul, hramlak zin ih tlawng feh tul pawl an si,” tin a sim.

Tlawng sayakyi le zirhtu pakhat cu June 16, sun nazi 1 hrawngah lamzin an feh lai kaih an si ih, anmah kaitu pawlin an hruai cih. A hnuah ting 1000 kyats lole Bangladesh ting 50 in tlen uh tin thu an suah.

Tlawng sayakyi le zirhtu hlo cu mipi le ramri kil pawlin ni 3 sung theitawk in an hawl nan, an hmu lo. Ni 3 an hawlnak ahcun tlawng sayakyi le sayamah hawltu mipi pawl cu ralthuamkai hrekkhat in hramlak in an kap ih, an hawl peh ngam nawn lo.

Tlawng sayakyi le sayamah kaitu cu ARSA Muslim ralthuamkai pawl an si ko ding tin mipi cun an zum nan, tutiang cu ARSa lamin thu an suah hrih lo. ARSA cu Muslim ralthuamkai an si ih, Myanmar le Bangladesh ramri ah an um. Hivek ruangah Bangladesh ramri ih um Rakhine mipi pawl cu an um a nuam thei nawn lo.