Ralhrang hotu Min Aung Hlaing in tlangpar ralthuamkai hotu pawl thu ka relpi dingih, remnak kan tuahoi ding a timi cu Palawng ralthuamkai TNLA lamin an zum lo thu mipi theihternak an nei.
TNLA hotu Ta Jut Ja cun “Thein Sein cozah le NLD cozah san ah mipi buainak a um lo ih,tlangpar ralthuamkai thawn remnak um dingin kan rak zuam rero. Cuvek caan khalah ralhrang an telih, remnak zianghman kan rak tuah thei lo. Tu ah Myanmar rampi a buai thluh zo ih, ziangtin tlangpar ralthuamkai le ralhrang lawngin remnak kan tuah thei ding?
“Ralhrang ih sawmmi lakah tlangpar ralthuamkai pawlkom 21 rori kan tel lo, NUG ralkap PDF pawl khal an tel lo. Hivek ruangah remnak taktak a um ding kan zum thei lo ih, Min Aung Hlaing tong duhtu lakah hminpe lo kan si. Tlangpar ralthuamkai pawlkom 10 men cun remnak tuah a theih lo ding.
“Cun, tuhi tlangpar ralthuamkai le ralhrang buainak lawng a silo, rampi in a buai ih, dothlengnak tuahtu mipi ralkap an um. Curuangah, tonawknak le thurelnak ahcun dothlengnak ralkap pawl khal sawm an phu, sawm tlak an si. Cuvek pawl tel loin remnak tuah a theih lo ding.
“Kannih TNLA cun mipi hriltlin cozah a din tikah remdaihnak hrang thu kan relpi sawn ding. Remnak tuah loin buainak a sosang vivo asile Myanmar rampi in kan tuar dingih, harsa biktu ding khal mipi kan si. Curuangah, ralhrang siseh, dothlengnak pawlkom pawl khal telin ramleng tuanpinak thawn thurelnak nei lohli ding an si,” tin a sim.
Ralhrang ralkap hotu Min Aung Hlanig cun Ziangtik hmanah CRPH, NUG le PDF pawl cu kan tong dah lo ding, kan be dah lo ding tin thu a rak suah zo ih, ralhrang thuphuangtu Zaw Min Tun khalin CRPH, NUG le PDF pawl kan hmuhnak ding san a um lo tin a rak sim rero zo ve.
Hivek a si tikah ziangtin pawlkom zate tel thluhnak thureltlangnak a um thei ding timi ruah tikah a thlithlam khal a lang hrih lo. Curuangah, kan ram buainak cu a buai vivo hrih dingin a lang. Ralthuam hmangin thah thluhawak theih a si fawn lo.
Mon Party Le Min Aung Hlaing Ih Thurelmi – Ralhrang hotu Min Aung Hlaing in tlangpar ralthuamkai hotu le party hotu pawl ka tong duh a timi ah pawlkom 10 in hmin cazin an pe ih, pawlkom 2 cun Min Aung Hlaing in a tong zo.
Min Aung Hlaing cun hmaisabik ah Shan aiawh in RCSS hotu a rak tong zo ih, cumi ahcun a hlan bangin Federal Democracy uknak thu a rak tiam men. Thudang pipa ciamco relmi an nei lo ih, Min Aung Hlaing in a bumcianak lamzin bangin a rak bumbet.
May 23 khalah ralhrang hotu Min Aung Hlaing le Montit pary hotusang an tongaw ih, cumi ahcun Min Aung Hlaing in a thuhlun hmangin thu a rak tiam lala men.
Min Aung Hlaing cun Montit party NMSP hotusang hnen ahcun “Ramkulh din duh dan nan dilmi cu nan dil vekin nan rak ngan cia thei. Federal Democracy uknak thu khal kannih cun a thleng tin kan lo tiam. Thuneihnak kan laknak san cu vote dik lo ruangah a si ih, 2023, August thla ah dik zetin rampi hrilawknak kan tuah ding. Cumi caan ahcun nehnak cotu hnenah thuneihnak kan hlansal ding a si, tin a rak simthei.
Montit party cun ralhrang hotu Min Aung Hlaing ih thurelmi an zum luailo lala ih, remdainak hrang pawlkom dinmi pawl thawn thureltlangnak an neih vivo ding thu khal an sim.
Leave a Reply