UN Palai le Min Aung Hlaing An Tongaw

UN Palai le Min Aung Hlaing An Tongaw – Myanmar ih tlawng UN Myanmar palai Noeleen Heyzer cun August 17 ah ralhrang hotu Min Aung Hlaing a tongih, thureltlangnak an nei.

Tonawknak ah ziangthuhla an rel timi cu cipciar in theih thluh a silo nan, ralhrang thuphuangtu Zaw Min Tun cun UN le Myanmar pehtlaihawk that dan ding kan rel tin Media pawl a simthei. Amah UN Myanmar palai Noeleen Heyzer cu Myanmar ram buainak ah remnak um dingin Myanmar ah feh a si ih, ralhrang hnenah dilmi tampi a nei.

UN Myanmar palai Noeleen Heyzer cun Myanmar ram buainak ah buainak ih tel Daw Suh tlunah hotu dang pawl khal ton thluh a duh ih, ram buainak ruangah kaihmi pawl thlah zalen thluh dingin ralhrang hotu Min Aung Hlaing a dil. Asinan, ralhrang lam cun kaihmi hrimhrim cu ramdang palai le ramleng palai thawn kan tongawter thei lo tin thu an rak suah rero zo ih, UN Myanmar palai khalin Daw Suh Kyi a ton thei zum a si lemlo.

UN cun “Ralhrang hotu Min Aung Hlaing kan ton ruangah ralhrang UN in ralhrang cozah kan cohlang tinak a silo. Myanmar ram buainak ah ralthuam hmangih cangvaihnak reh dingin, harsa pawl bomnak pek tikah buainak um lo dingin tivek pawl kan rel a si,” tin thu an suah.

UN Myanmar palai Noeleen Heyzer cun Christine thlengin 2021 October thla ah Un Myanmar palai hna a rak kai thok ih, tuitum cu UN Myamar palai a si hnuah Myanmar a tlawn vei khatnak a si.

FIFA In India Hremnak An Pe – Leitlun ih bawhlung thuneitu sangbik FIFA cun India cu FIFA hnuaiah tel thei nawn lo dingin hremnak an pe ih, tuhrih ahcun India cu FIFA theihpimi a silo.

FIFA in India hremnak a pek ruangah October thla ih tuah dingmi FIFA Under 17 Women World Cup ah India ah an lak thei sal lo dingih hmundang ah an tthawn ding. India bawlung team hrimhrim khal FIFA hnuai zuamawknak ah a tel thei hrih lo. Cumen si hrih loin India in FIFA hnenih sumpai an donmi khal an dong nawn lo hrih ding.

FIFA in India hremnak an pek tikah an hremnak san khal an simthei ih, India ih thlun dingmi khal an theihter. FIFA in India a hremnak san cu bawhlung thuhla ah India Supreme Court a hrol aw. FIFA daan ahcun ram pakhat sungah Bawhlung thuneitu pawlkom an um ciar ih, cumi cu Bawhlung thuhla ah ram pakhat ih thuneihnak sangbik neitu an si tin a um.

Asinan, India ahcun India Bawhlung pawlkom hrang hrilawknak thubuai ruangah Supreme Court cun India bawhlung pawlkom hruaitu lakah Supreme milesa an retih, Bawhlung thu ah Supreme Court lam an tel. Cucu, FIFA in an duh lo ih, India ramsungah Bawhlung thuneitu sangbik pawlkom felfaiten nei dingin a theihter. FIFA ih theihtermi India lamin an thlun fel tikah hremnak phelhsal ding an si.