Ralhrang Thu Ah UN An Lungrual – December 21 ah UN Security Council cun ralhrang thuhla an relsal ih, tuitum ahcun palai 15 zate lakah dokalhtu um loin lungrualten thu an rel thei.
A hlanih ralhrang rak dinpi ringringtu India, China le Russia pawl cun mi tamsawn lungkimnak an dokalh ngam ciah lo nan, ralhrang nor dingin an lungkim cuang lo ih, vote pe duh loin ram 3 an um. Hivek ruangah Russia, China le India pawl cu Myanmar thuhla ah an hmin a se hrih. Ahleicein Myanmar ramri India hi mawhthluktu an tam lawlaw.
Tuitum ih ralhrang thu an relmi cu UK lamih thuburmi a si. UK cun a hlan khalah ralhrang thu rel dingin thu a rak bur rero zo nan, a hlan ahcun Russia le China in Veto Power an neihmi hmangin mi tamsawn lungkimmi an rak el ringring. UN Security Council ah ram 15 pawl ih palai an um ih, cumi ah US, France, UK, Russia le China pawl cu Veto power nei an si. Veto Power nei pawl cun UN Security Council palai 15 pawl ih thurelmi, mi tamsawn lungkimmi khal Veto power an neihmi hmangin an el thei.
UN security Council cun 2006 kum ihsin ralhrang thu an rak buaipi thok ih,lungrualten ralhrang an rak nor thei dah lo. 2017 kum ah ralhrang ralkap in Rakhine ramkulh sungih Rohingya pawl an rak dawisuak, an that ciamco ih, ralhrang pawl cangvaihnak cu a thang. Curuangah UN Security Council cun 2017 kum ihsin ralhrang pawl thuhla an buaipi sinsin.
2021 , February 1 ah ralhrang cun ralthuam rinsan in Myanmar rampi thuneihnak an la ih, duhduh in Myanmar mipi an dekcok ih an that ciamco. Cutikah UN Security Council cun nasaten ralhrang thu an buaipi ih, vei tampi ralhrang thuhla an rel. Asinan, China , Russia le India ram pawl ruangah UN Security Council pawl cun thu hmunkhat an suah thei lo.
2022, December 21 ahcun China , Russia le India pawlin vote thla duh loin an um ruangah UN Security sungtel palai 15 lakin palai 12 pawl cun lungrualten ralhrang nor dingin lungkimnak an nei thei.
UN Security Council in lungrualten ralhrang thu an pekmi cu “Ralthuam hmangin mipi parah cangvai nawn hlah uh, ram buainak a rangthei bikin tifel uh, ram buainak ruangih kaihmi zaten thlah zalen uh, ASEAN thawn remnak nan tuahpi 5 pawl a takin pitlin uh tin UN Security Council cun ralhrang pawl an theihter.
UN pawlkom sungpi ah Security Council pawl hi humham nei bikih lubik an si ih, an cangvaih tikah hmuar a nei bik ti khalin an sim. Culo, UN member sungtel le UN Human Right pawlkom pawl cun vei tampi ralhrang pawl nornak le mawthluknak an nei rero zo. Tuitum cu UN Security Council in lungrualten ralhrang pawl a nor vei khatnak a si ih, kum 74 sungah UN Security Council in lungrualten ralhrang thu an relmi vei khatnak khal a si.
UN Security council in avei khatnak lungrualten ralhrang pawl an nor thei nan, Myanmar mipi lungawinak a kim cuang lo ih, ralhrang pawl cu a nor ih nor men loin hremnak pe cih dingah an duh.
China palai cun “Myanmar buainak thuhla ah kannih in tithei ciamco kan nei lo. Kan thinphanmi ih kan seherh tuk ve. Asinan, kan duhdan le duh vekin zamrangten buaipi theih a silo. Kannih relmi pawl hin Myanmar ram buainak a rem thei taktak lo. Myanmar ram buainak rem theitu taktak cu anmah ramsung ih um pawl lawng an si,” tin a sim.
Russia palai cun “Myanmar ram buainak hi kannih UN Security in duhduh in rak relsak men ding kan silo. Ziangahtile, Myanmar ram buainak in UN Security Council a tibuai ban lo. Curuangah, kannih UN Security Council pawl hi Myanmar ram buainak ah rak hrolh aw buai ciamco ding kan silo,” tin a sim ve.
Myanmar UN palai U Kyaw Moe Tun cun “Tuhi UN Security Council in lungrualten thu a fehpimi vei khatnak a si ih,hmuar a nei vivo ding. Khatlam ah NUG le dothlengnak pawlkom pawl khalin kan nor vivo dingih hmailam kan pan vivo mai ding a si,” tin a sim.
NUG cun “Kannih NUG cun UN Security Council ih thusuahmi cu lungawi soparten kan hmuak. Ahleicein UN Security Council thurelnak ih vote petu nan zate parah kan lungawi. UN Security Council in thu a suah bangin a takih thleng ding khalin zuam dingah kan sawm duh. Hivekin UN Security Council in lungrualten thu an suah thei timi cu hmailam pannak cikhat a si.
“Thubuai ahcun Myamar mipi diknak le dilmi kham lo dingin le ngaihsak dingin, tuahsak dingin tivek pawl a tel ih, kaihmi pawl thlah zalen thluh ding timi khal a um. Myanmar ram buainak ruangih harsa pawl bomnak lut khal khamtu le daltu nei loin tluangten bomnak an pek thei ding thu khal a tel. Ralhrang le ASEAn in remnak an tuahmi 5 pawl pitlin theinak dingah UN Security Council khal cangvai ve dingin kan sawm duh.
“Kanmah lam duhdan in kan rel asile tuitum UN Security Council ih thusuahmi pawl hi kan beisei vek a silo ih, kan ruah lomi thu a tampi. Curuangah, kannih NUG cun UN Security Council hnenah tu hnakin hmuar nei sawn in cangvai dingah kan dil duh. Kannih Myanmar mipi cun ralhrang uknak cimit ding kan duh ih, Federal Democracy uknak din duh kan si ruangah cumi hrang ramleng bomnak kan tul ih, in bawm dingin kan lo sawm.
“Kannih Myanmar mipi cun kan duhmi hrang a takin kan cangvai rero. Lamzawh duhphorhnak kan nei ih, ralhrang pawl kan nor peh rero. Hivekin ralhrang pawl kan donak khalah bomnak kan tul. Tuih thu nan suahmi khal Myanmar ram buainak ah kan hrang karbak pakhat thuthar a si ih, hmailam khalah nasa sinsin in ralhrang thuhla in ralsak dingah kan lo sawm. Kan duhbikmi cu Myanmar mipi ih nunnak, neihsiah le inn awl humhim ding le Myanmar ram buainak tifel ding a si ih, cumi hrang UN Security Council pawl raltha zetih cangvai dingin kan lo duh a si,” tin NUG cun thu an suah.
Min Aung Hlaing A Umlai Ah Bomb An Puah – Ralhrang ralkap hotu Min Aung Hlaing khal December 21 zingah Mawlamyine in Yangon a thleng ih, Yangon a thleng um hnu December 22 ah pDF pawlin bomb an rak puah tin an sim.
Federal Attack Force cun “December 22 , zinglam nazi 6 hrawngah Min Aung HLaing ah duty tuah ralhrang pawl umnak ah bomb kan puah. Bomb kan puahmi ah ralhrang thi an um le um lo kan fiah thei lo. Tuitum ah kanmah lawng siloin kan tuanpi pawl thawn ralhrang umnak hmunah bomb puah kan si,” tin a sim.
December 21, zan nazi 9:55 hrawng khalah Yangon Dogon myotit ah Mother Son Yangon Force pawlin ralhrang gate bomb an puah ve nan,ralhrang thi an um le um an fiah thei lo thu an sim.
Ralhrang Palai 3 Thailand An Thleng – Thailand in Myanmar thuhla thawn pehparaw in meeting an tuah dingmi ah ralhrang palai khal an rak sawm ve ih, December 22 zingah ralhrang palai 3 khal Thailand an thleng ve.
Thailand thleng ralhrang palai pawl cu U Wana Maung Lwin,Ko Ko Hlaing le KanZaw pawl an si. Tuitum Meeting ah Thailand cun ASEAN sungtel pawl khal an sawm nan, Indonesia, Singapore, Philippines, Brunei le Malaysia pawl cu tel an tum lo tin thu a suak.
Tuitum Meeting hi ASEAN meeting a silo ih, Thailand in a duhmi pawl sawm in Myanmar thuhla an rel dingmi meeting a si. Meeting ahcun Thailand aiawh, Cambodia aiawh le Laos aiawh pawl khal an thleng zo. Meeting ih tel le an relmi pawl cu neta ah an phuan leh zum a si.
Taliban In Nunau Phunsang Kai An Kham – Afghanistan ram ih cozah kaitu Taliban pawl cun an ram sungah nunau phunsang tlawngkai an sian nawn lo thu an suah ih, a takin an fehpi hngal ding thu khal an tarlang.
Taliban in hivekin thu an suah ruangah Afghanistan mipi lungawi lo cun lamzawh duhphorhnak an nei nan, lamzawh duhphorhnak nei mipi pawl cu Taliban pawlin ren lo zetin an kap ciamco men.
Ziangruangah Taliban in nunau pawl phunsang tlawngkai an siang lo timi a san cu mipi theihternak an nei ih, an biaknak ruangah a siko ding titu an tam. Taliban cun thu kan suah hlansung cu unau pawl phunsang tlawng nan kai lo pei tin mipi an theihter.
Leave a Reply