WHO Myanmar Hnatuan An Kap That

Leitlun harhdamnak pawlkom WHO Myanmar cun an hnatuan pakhat cu Mon ramkulh Mawlamyine khawpi ah kah that a si thu mipi theihternak ca an suah.

WHO Myanmar cun “June 8, zanlam nazi 5 hrawngah kan sungtel WHO myanmar ih hnatuan Myo Min Htut cu Mon ramkulh Mawlamyine lamzin ah an kap that. Myo Min Htut cu kan zungin inn lamah amai bike thawn tlung a si ih Thanlwin zin ah meithal in an rak kap that. Kan hnenah kum 5 sung WHO hrang Mawtaw mawngin hnatuan a si ih, a sungte pawl kan tuarpi tuk lawlaw a si,” tin thu an suah.

WHO Myanmar hnatuan a thih thuthawn pehpar aw in Mawlamyine pDF cun anmai thahmi a si thu ca an rak suah ve ih, an thannak san khal an tarlang.

Mawlamyine PDF cun “June 8, zanlam nazi 5:45 ah ralhrang bawi Aung Lin Dwe ih sungte nunau sualpi hmang Myo Min Htut timi cu Thanlwin lamzin ah kan kap that. Myo Min Htut cu mikhual cazin cek tikah hohatu a si ih, ralhrang thawn naih aw tuk le tuantlang an si. Cumen siloin CDM nulepa pawl khal a hro ringring. Kum kim lo nunau pawl cu a thlem hnuah nupa sinak a hmanpi ih video a laksak theu tivek kan theisuak. Hivek sualnak pawl a tuah ruangah kannih Mawlamyine PDF cun Myo Min Htut that kan si,” tin thu an suah.

Mytel Tower Kiltu Ralhrang Bawi An Kap That – Yangon ramthen Hleku myone ih Mytel Tower hngaktu ralhrang pawl cu June 7, zan nazi 12 hrawngah Yangon PDF pawlin an va kap ih, ralhrang bawi a thi tin an sim.

Yangon PDF cun “Mytel Tower cu ralhrang 5 hrawngin an kil ih Hleku myone Phuang Kyi khua kiangah a um. Ralhrang pawl an ihthah laifang ah kannih cun kan kap ih, ralhrang bawi a thi a si,” tin mipi an theihter.

Ralhrang lam cun “Ralhrang bawi thi cu June 10 vuinak an nei ding. Ralbawi thi Ye Win cu pension zik thlang a si. Tuvek boruak ah man zianghman nei lo Tower kil in caan a rak hmang ve ih, an kap that.

“Kannih ralkap sung ahcun raldo dingih thlahmi pawl khal an lungawi thei nawn lo ih, man nei lo tower kil tivek khal an phur lo. Asinan, tlunlam thusuak el ngam a si lo tikah phur lole paih lo cingin tuah a si,” tin a sim.

KNU In Ralhrang Mawtaw An Kap – Mon ramkulh KNU hmunram sung Kyaik Htu myone ah thangzang mipum khawl aw ralrhang pawl cu KNU pawlin an rak kap ih, Ralhrang 10 an thi tin KNU cun thu an suah.

Ralhrang mawtaw cu June 8 ah Pago in suak a si ih,Thadung lam panin a feh vivo. Mon ramkulh Thasung peng sungah KNU in hmunram an nei ih, an ralkap tampi khal an um. Anmah dotu ding ralhrang pawl an ra timi an theih tikah KNU cun lamlak ah ralhrang mawtaw an rak bawh ih, Kyauk Htu myone sungah an kap.

KNU cun “Ralrhang mawtaw kan rak kap ih, ralhrang 10 an thih tlunah ralhrang 15 hrawng hriam ngah an um a si,” tin thu an suah.

Tlawng Sayamahkyi An Kap That – Sagaing ramthen Watlet myone Bote khua ah lailak tlawng sayamahkyi le a naunu cu CDM tuah pawl an hnaihnok ringring ruangah an kap that.

Lailak tlawng sayamah kyi Daw Moe Moe Khaing le a nau Kiza Khaing tei pahnih cu innsung an umlai ah an kap that. Watlet PDF khalin Sayamahkyi le a nau cu anmai thahmi a si thu ca an rak suah ve ih, an thahnak san khal CDm tuah pawl an hnaihnok ringring ruangah tin mipi an simthei.

Khuami pakhat cun “Sayamahkyi Moe Moe Khaing le a nau cu kan khua ih ralhrang an rat tinten phur zetin an rak hmuak ringring ih, ralhrang pawl ei ding khal an timtuahsak ringring. CDm tuah pawl an hro ringring ih, ralhrang hnenah an hek theu. Tlawng sayamahkyi le a nau ruangah ralhrang cun kan khua in CDm tuah zirhtu 7 an kai zo a si,” tin a sim.

Watlet PDF cun “Vei tampi ralhrang hnuaiah hnatuan lo dingin le CDM tuah pawl hro lo dingin ralrinnak kan pe rero zo nan, ralrinpeknak an thlun duh lo ruangah a takin hremnak kan pe ih, kan ret fel lawlaw a si,” tin mipi an simthei.