Kalay Ah Lampang Zetin Rukru An Tam – Ralhrang ralkap in rampi thuneihanak an lak hnuah Kalaymyo ah rukru an tam deuhdeuh ih tu ahcun rukru pawl khal langpang zet le ngam tukin ruk an ru vivo thlang tin’ Kalaymyo ih um pawl cun an sim.
August 17 ah Chin ramkulh Tedim peng in Kalaymyo Hmunlai ih feh pakhat cun Hmunlai a thlennak dawr kotah a bike a ret sungih cumi menah a bike an rak ruksak man. Amah cun “Dawr hmaiah bike ka retih, ka kiang ahcun dawr ih sii lei mino pahnih an thleng ve. An feh rualin bike tawh ka kalhmi cu ziangtin simaw an phelh ih, an mawng cih, Zamrang zetin kan pan nan, a rak tlan man. Mit hmu rori ah ka bike in ruksak,” tin a sim.
Kalaymyo sungah a bur ih rukru , mi pahnih thum kop aw tivek an um ih, midang thilri an ruk tlunah lamzin ih sukso vak khal an thilri an lonsak caan a tam. Taungphila inn pakhat sung khalah mi pahnih an lutih, inntek tei an hrinhro hnuah an suithil le tangka an laksak ih,an tlan.
Tahan khalah nunau pakhat midang inn sungah a lutih tidai ka thun duak ding tin a dil hnuah innsung ih phone charge mi pahnih a laksak ih a tlanhlo cih. Inn gate tawh kalh rori khal bauh siat ih rukru khal an tam ih, bike retnak ih bike hlo khal a tam deuhdeuh. Hivek a si tikah mipi khat le khat bom aw ton dingin an sim rero ve.
PDF In Ralhrang Kammi Bomb 78 An Phorhsuak – Sagaing ramthen Salinkyi Myone letpantuang’ Taung ih darsen tuahnak hmun kiangah mipi ralkap Myauk Yamar PDF cun ralhrang kammi bomb 78 an phorhsuak thei tin’ August 19 zingah an pholang ih mipi an simthei.
Myauk Yamar PDF thuphuangtu Ko Khant cun “Bomb puahnak bik kan phelh hnuah bomb kan sarmi 78 pawl cu kan rettha. Harsa zetin kan phelhsuak thei ih, anmah ralhrang ralkap pawl donak ah kan hmangsal ding.
“Ralhrang in China thawn tuantlang in darsen an tuahnak hmunpi a si ih, mipi ralkap lamin kan naih theilonak dingah a kiangkap ah bomb an kam thluh. Cetzung ahcun anmah ralhrang ralkap siseh, Pyu Saw Htee pawl khal umhmun an khuar theu.
“A hlan khalah cetzung ah zohman hnatuan lo dingin ralrinnak kan rak pe rero zo ih, an thlun lo ruangah bomb in cetzung kan rak deng zo. Cumi rangah ralhrang pawlin a kiangkap ah bomb an kam hluh. Asinan, tu ahcun ralhrang pawlih bomb kammi tamsawn kan thianfai thei. Bomb 78 ka la thei ih, bomb dang a umlai ding tin’ kan ruat.
“Bomb an kammnak hmunah lo hnatuan an um ih, mipi inn thawn khalin a nai aw. Curuangah mipi cu fimkhur teih um dingin kan cah duh. Bomb kammi dang a umlai dingih kan ruah ruangah mipi an him theinak hrang kan hawl peh vivo ding a si,” tin a sim.
Yangon Ah A lakih Zemmi Rawl Bawh An Tam – Myanmar ram buainak ruangah lo hnatuan thei lo,dawr tuah thei lo, thilzuar thei lo, hnatuan ding nei lo an tam deuhdeuh ih, Sagaing ramthen sung ahcun raltlan kutdawh khal an um zo.
Tu ah yangon mipi lakin farah vengah nikhat veikhat rawl ei an um zo ih, Yangon khawpi hmun tinkim khalah rawl zemmi bawh an tam deuhdeuh. Siti le thilri man ol deuh ih zuarnak hmun khalah mipi an khat.
Khawpi ti tikah mibawmtu pawlkom le innsang tirhsiang tivek an rak um ih, Yangon hmun hrekkhat le phungki tlawngah a lakin rawl zem an um. Tu ahcun a lakih rawl zemnak hmunah a hngaktu mipi an tlar aw tam tuk ih, siti man ol ih, zuarnak khalah mipi an tlar aw thluh. Thenkhat cu a lak rori ih, zem thei lo 500kyat man rawl dawr tivek khal an ong.
A lakih rawl zemtu pakhat cun “Covid 19 natnak ruangah nasaten mipi kan buai ih, ram buainak in a thlun. Curuangah mipi cu kan harsa tuk lawlaw. Hivekin mipi kan harsat laiah cozah rinsan ding kan nei lo. Cozah rinsan ding kan neih lo tikah mipi khat le khat kan bomawk thiam a ttul hrimhrim a si,” tin a sim.
Leave a Reply