Kan ram Myanmar harsatnak le buainak ruangah mi tampi cu ramleng feh dingin yangon le Mandalay an pan thluh ih, ramdang ah hlawhawk an tum.
Covid 19 natnak ruangah leitlun cu 2020 in a buai thluh ih, Myanmar khal Covid 19 natnak in a nuai ve tikah nasaten mipi an buai ve ih, Myanmar mipi lakin hnatuan nei lo tampi an um phah. Ramdang cu covid 19 natnak a zia-um hnuin an tungding aw sal lohli nan, Myanmar cu a theih ve lo.
2021 February 1 ah ralhrang ralkap cun ralthuam rinsan in rampi thuneihnak an la ih, Myanmar rampi a buai cih. A thok ahcun mipi in daiziar in lamzawh duhphorhnak an rak nei ih, ralhrang pawl mipi hnenah thuneihnak pesal dingin an rak dil. Ralhrang pawlin mipi dilnak an pom duh lo tlunah lamzawh duhphorhnak nei mipi pawl cu ralthuam hmangin an thekdarh ih, mipi lamin thi an um phah.
Cumi ruangah Myanmar mipi khal 2021 April thla in ralthuam an kai ve ih, ralhrang le mipi doawknak hram a thok. Ralhrang le mipi doawknak hram a thok hnu cun covid 19 sanlai vekin mi tampi hna an tuan thei nawn lo ih , hna nei lo an tam deuhdeuh.
Curuangah Myanmar ram mipi cu covid 19 natnak le ram buainak ruangah hna nei an tam tuk ih, mi tamsawn duhhrilmi cu ramdang feh ih hlawhawk a si. Ramsung ah hnatuan nei loin um ringring men a theih silo a theih dandan in ramleng feh dan ding an dap. Thailand, Malaysia le China tivek ah thupten feh tampi an um ih, Singapore, Japan, Korea le ram dangdang ah visa ih feh dil rero khal an um.
2022 August 5 zingih an buainak cu Yangon ah Japan feh theinak camibuai phi dingin cahnah lak an cuh aw ih buainak neuhneuh a suak. Mandalay khalah Japan feh theinak camibuai phi dingin cahnah lak cuhawknak ah an buai zo. Zinglam nazi 12 in Japan feh theinak cahnah lak hngakin mi tampi an pungkhawm zo ih, hmun an cuh aw ciamco. Tuanvo neitu lam cun mipum 5000 hrawng an si tin thu an suah nan, a hmunih um pawl cun mipum thawng 10 zik kan ban ding tin an sim ve.
Lamzin ah an tul aw, zung sangka kiangah umhmun an cuh aw, an sual aw, an el aw ih Japan feh theinak camibuai phi dingin cahnah ngah hmaisatu si an cuh aw. Hivek ruangah mipi kan pungkhawm tam tuk tin tuanvo neitu lam cun mipi zaten an tlungter thluhsal ih, online in dilnak thehlut a theih ding tin thu an suah.
Cuvek a si hnu ahcun a hmunih feh , caan reipi sung rak hngak rero zotu mipi lakin thinheng an um ih,buainak an tuah bet. Zung sangka an bauh siat, kiangkap thilri an tisiat ih, meikang tiang a suak. Cumi ruangah ralhrang pawl cun mi 10 hrawng an kai tin a hmunih um pawl cun an sim.
A hmunih um mino pakhat cun “Myanmar ih um cun kan hmailam a pit thluh zo. Min Aung Hlaing in kan hmailam hamthatnak pawl a siatsuah thluh zo. Nitin in thilman a kai ih, thaw nei cingin kan thi rero. Curuangah ramdang ih hlawhawk lo cu hril ding a um nawn lo. Japan ka feh thei lole Singapore, Malaysia tin feh rori ka tum a si,” tin a sim.
Tu cun Myanmar ah covid 19 ih buainak, ram buainak tlunah ramdang feh dingih cuhawk buainak tiang a thleng thlang. Myanmar hmailam thlirtu pawl tla cun Myanmar cu reilote sungah ASia ih farah bik ram an si mai ding tin an sim rero ve.
Mi tamzet ramdang feh tumin theitawk an suah rero laiah mipi ralkap pawl beidong lo ih, ralhrang do rerotu khal tampi an umlai ve. Ahleicein Sagaing ramthen sung hmun tinkim ah doawknak a sosang peh ih, Chin mipi tamzet umnak kalay peng sung khalah ni 4 peh in doawknak a sosang zo. Makui, Karen, Kaya le Chin ramkulh pawl khalah doawknak a um peh ringring. Mipi ralkap pawl dungsip men an tum lo ih, theitawk in ralhrang uknak doneh rori an tum ve.
Leave a Reply