Yangon Ah Bus An Daih Aw Lo – Yangon khawpi sungih tlan ringring YBS bus lakin hrekkhat cu CNG Gas an neih nawn lo ruangah tlan thei nawn lo an tam deuhdeuh ih, mipi cu Bus to ding haidaih aw loin an um.
July 22 zanlam khalah YBS Bus hrekhat tlan thei loin an um ih, hnatuan feh, zungkai , bulpak thilthu ih vak pawl tlunnak ding nei lo tampi an um phah.
“Kei cu payan hnatuan ka si ih,khawpi sungah Bus ka to asile 300 kyat ka pe ih, khawpi leng hrang bike man 700kyat thawn 1000 kyat in inn thlen a theih. Nikhat ih ka ngahzat cu 10000 kyats a si. Bus a remcang lo asile Taxi hman a tul dingih, taxi cun 5000 kyats a tul. Cutikah ziangtin ka khawl aw thei nawn ding, ziangtin 10000 cu ka khop nawn ding? Hivek a si vivo ahcun ka hrang lamzin a pit rori ding a si,” tin Payan hnatuan pakhat cun a sim.
“Kei cu Yangon khawpi sungah cepnep zuar in sumpai hawl ka si ih, Taxi tonak ka nei lo. Rualpi pawl cu Yangon khawpi sungih um an si tikah ke in tlung thei khal an um. Kei ka hrang ahcun ke ih tlun a theih fawn lo, Taxi sang thei ka si fawn lo, zan simpi tiang Bus hngak in caan hman a ttul. Ziangtin ke ka kar vivo ding tikhal ka thei nawn lo a si,” tin Yangon ih thilri zuar pakhat cun a sim ve.
“A hlan ihsin dawr ah mawtaw Gas a har ti cu kan thei zo. Asinan, a reilo dingih a remcang lohli ko ding tin kan ruat men. Tu ahcun a luarkai deuhdeuh ih, sun ihsin gas thun dingih tlar aw khal vanthat le zanlam lawngah kan ngah thei. Hivek ruangah Bus to theu pawl zangfah an um ngaingai ih, Taxi hmang men dingin kan simmi khal an tam tuk a si,” tin YBS bus mawngtu pakhat cun a sim.
“Hivekin Gas a har ding timi cu tuanvo neitu pawlin an thei cia ko ding. Asinan, kannih Bus mawngtu pawl simtheih kan silo tikah mipi khal an buai thluh. Hivek harsatnak a um ding cun tuanvo neitu pawlin in simthei cia ding an si. Cutin mipi lam khalin thuhla an thei cia dingih mipi buainak a dem tuk ding. Tu cu zianghman simthanawk ciami a um lo tikah kan zaten kan buai thluh a si,” tin YBS Bus mawngtu pakhat in a sim ve.
Hivek in Yangon ih YBS Bus malte lawng an suah thei tikah mipi an buai tukih Bus to dingin an hngak, an cuh aw thlang. Bus to ding nei lo mipi pawl cu mibawmtu pawlkom pawl cun an mawtaw in an phur rero ve.
“kannih cu mipi bawmtu kan si bangin harsa mangbang ih um mipi pawl bawm dingin kan man ringring. Curuangah lamzin sukso harsa pawl cu a lakin kan phur. Ramsung Gas dinhmun a that hlansung cu theitawk suah in mipi hrang kan zuam vivo ding a si,” tin mibawmtu pakhat cun a sim.
Ralhrang Ih Kaihmi A Tlansuak – Ralhrang ralkap in anmah dokalhtu ti ih an kaihmi pakhat cu Insein thawnginn sungih an khum hnuah July 20 ah Court ah an fehpi ih, a tlansuak thei.
Insein Court ih sihni pakhat cun “Thudik a siko thawnginn ihsin Court ah thurel dingin palik pawl cun an rak hruai. Palik pawl an fimkhur lo deuh si ding mawtaw in an ttum hnuah Court lam panih an fehnak ah a tlansuak. A tlan veten an dum cih hngal nan, tutiang an kaisal hrih lo ih, palik pawl cu an buai ngaingai a si,” tin a sim.
Hivekin thawngtla pakhat a tlan ruangah Insein thawnginn sungih thawngtla kil palik lakin palik hrekkhat pawl cu kaih an si ih, an thlahsal hrih lo tin palik sungte pawlin an sim ve. Thawngtla tlansuak cu a himnak dingah a hmin le a umnak thup hrih a si.
SSPP In Ralhrang Thupek An Thlun Duh lo – Shan ramkulh Maisoe myone Hlaingnai’ khua kiangih SSPP sakhan pathum cu hmundang ah tthawn dingin ralhrang ralkap in an rak simthei ih, SSPP lam cun ralhrang thupek vekin an sakhan an tthawn thei lo thu ralhrang an simthei.
SSPP ralbawi Saibung Han cun “Kan sakhan 3 ruangah ralhrang pawl an buainak ding san a um lo. Cumi tlunah kan sakhan cu kum tampi kan luah zomi an si. A hlan khalah kan sakhan in rak siatsuah dah. Curuangah ralhrang hnenih kan simtheihmi cu thil fate menah buainak hawl hlah uh, remdaihnak buaitertu an si ban lo tin kan simthei. Ziangahtile , kan sakhan cu kan himnak hrang thupi zet an si,” tin a sim.
Ralhrang ralkap cun june thlalam ihsin SSPP sakhan 3 tthawn dingin a rak simthei zo ih, sim bangin nan tthawn lo asile kan lo kap ding tin an rak ti. Tu ah SSPP lamin sakhan an tthawn thei lo thu an sim tikah doawknak picang a suak pei maw? remawknak an tuahsawn pei maw timi cu felfai in theih a si hrih lo.
Pyu Saw Htee le Ralhrang 30 An Thi – Sagaing ramthen Sagaing myone Cuaipung khua ih ralhrang ralkap le Pyu Saw Htee umnak Sakhan cu Sagaing PDF in July 22 zingah an kap ih, ralhrang ralkap le Pyu Saw Htee 30 an thi tin PDF hotu cun a sim.
“Ralhrang le Pyu Saw Htee an umkhawm timi kan theihnak a rei zo. Cuaipung khua cu Pyu Saw Htee khua tin a lar. Curuangah, an ralrin lo lai zingpit ah kan kap ih, a thok ahcun ralhrang le Pyu Saw Htee 9 an thi tin mipi kan rak than zo.
“Cucu, doawk lai ih thi felfai kan hmuhmi pawl an si ih, neta ah khuami pawl hnenin le anmah Pyu Saw Htee lam thusuak kan theih dan vek asile an sakhan bomb kan puah ih kan kah betnak ah ralhrang ralkap le Pyu Saw Htee 30 an thi tin kan theisal.
“Nazi 2 sung doaw kan si ih,hmundang in ralhrang ralkap an thlen bet tikah dung kan sip. An sakhan pakhat kan urkang sak. Doawknak ah kannih lamin miraltha pakhat kan can ve a si,” tin a sim.
Myanmar Ah Raltlan Ting 11 An Kim – Ralhrang ralkap in rampi thuneihnak an lak hnuah Myanmar ah raltlan an tam deuhdeuh ih, tu ahcun Myanmar ih raltlan zaten ting 11 an kim tin hminsin tuahtu pawl cun an sim.
Raltlan ting 8 zik cu ralhrang in rampi thuneihnak an lak hnuah khua ah um ngam loin tlan an si ih, ralhrang in rampi thuneihnak an lak hlanah Myanmar ah raltlan ting 3 hrawng an rak um cia. Myanmar ram sungih Raltlan zaten kom tikah raltlan ting 11 an kim.
Ralhrang in rampi thuneihnak an lak hlanih raltlan pawl cu tlangpar ralthuamkai le ralhrang doawknak ruangah tlan an si ih, ralhrang in rampi thuneihnak an lak hnu ahcun ramsung hmun tinkim ah doawknak a um ih, cumi ruangah tlan an si.
Ralhrang in rampi thuneihnak an lak hlanah Rakhine, Kachin , Karen le Chin ramkulh thlanglam pawl ah raltlan an rak um cia ih, ralhrang in rampi thuneihnak an lak hnu ahcun Sagaing ramthen, Tanintharyi ramthen, makui ramthen, Kaya ramkulh le Mon ramkulh pawlin raltlan an um thluh. Tuih raltlan hmin cazin an lakmi pawl cu a langten tlansuak men siloin reipi hramlak le khua dangih um zo pawl an si.
Southeast Asian Ih Farah Bikah Myanmar – Ralhang ralkap in rampi thuneihnak an lak hnuah Myanmar cu ziangkim ah a ttumsuk vivo ih, tu ahcun Southeast ASEAN ram ih farah bik ah Myanmar a um.
Southeast ASEAN ah ram 11 an um ih, ram 11 pawl cu mipum tamdan ih zir in Indonesia, Philippines, Vietnam, Thailand, Myanmar, Malaysia, Combodia, Laos, Singapore, East Timor le Brunei ram pawl an si.
Myanmar cu mipum tamlam ah panganak dinhmun an luah thei nan, Southeast ASEAn ram 11 lakin ram farah bikah Myanmar a um. Southeast ASEAn ahcun Singpore an lian bikih, Brunei , Malaysia, Thailand, Indonesia, Philippines, Vietnam, Laos, Cambodia le East Timor pawlin an thlun ih Myanmar cu hnuaita bik ah a um.
Myanmar le Singapore ih thlauawknak cu a let 46 rori a si ih, Thailand le Myanmar khal a let 5 rori in an thlau aw. Mipum malte East Timor rori khal Myanmar tlunah an um. Ralhrang in rampi thuneihnak an lak peh hrih ruangah Myanmar cu a tlase deuhdeuh dingah ruah a si.
Sri Lanka Ralkap An Cangvai – Sri Lanka in president thar hrang Rajapaksa an nemhnget hnuah Sri lanka ralkap pawl cun duhphorhnak nei mipi pawl cu ralthuam hmangin an dawisuak ve thlang.
Sri Lanka ram tlansiat ruangah mipi cun April thla lamin duhphorhnak an rak nei zo ih, mipi duhphorhnak ruangah Sri Lanka president khal a sinak in a rak bang zo. President bik a ban hnu ahcun president thar hrilnak an neisal ih, president thar ah Prime Minister hlun Rajapaksa an hril.
Mipi cun prime Minister Rajapaksa khal an ram hruaitu dingah an duh lo ih,president dingah an hril bet tikah mipi lungawi loin lamzawh duhphorhnak an nei peh. Cucu, Sri Lanka president tharih thupeknak ruangah lamzawh duhphorhnak nei mipi pawl cu ralthuam hmangin an thekdarh thokih, an ram buainak a sosang sinsin.
President thar an nei nan, president thar cu mipi duh lomi thotho lak a si tikah, mipi lam an lungkim thei lo ih, lamzawh duhphorhnak nei peh thotho an si.
Leave a Reply