Yangon Ah Nikhat Veikhat Lawng Rawl Ei An Um Thlang

Yangon Ah Ti A Lik – Bengal tipi ih thilsia hrang ruangah a kiangte Myanmar ram sungin Yangon, Ayeyarwaddy, Tanintharyi , Rakhine, Karen, Mon le pago pawl ah ruah a cen thei tin Myanmar nikua zohtiam pawlin thu an suah. August 17 zing ahcun Yangon ramthen ah ruah a sur ciamco ih Yangon khawpi sung hmun hrekkhat ah ti a lik.

Yangon ih um pakhat cun “Zan hnatuan ka si ih, zinglam nazi 7 hrawngah inn ka tlung. Lamzin ah ti a rak lik ih, lamzin ah kan tang. Duh vekin mawtaw a feh thei lo ih, zinglam nazi 9:30 tiang mawtaw sungah ka um hrih. Ruah a cen bet a si ahcun Yangon mipi hrang a ol lo zet dingih, ruah a han cih asile tilik khal a kang cih theu ve. Tuhrih ahcun sukso vak a ol lo ih, inn niam pawl cu an buai thluh zo,” tin a sim.

Yangon Shwepita ih um pakhat cun “Mizan ihsin ruah a sur zo ih, zanvar ruah a sur tikah S.Dagon, Shwepita, HLaingtaya, Insein ,S.Okalapah le Mingala Tuanggyut pawl cu ti a lik thluh. Inn niam pawl cu an inn hnuailamah tidai a lut thluh zo. Kannih kan inn khal zinglam nazi 2:30 hrawngah tidai a lut zo. Hivek cu Yangon ah kan tong dah lo.

“Hrekkhat cu tilik cing khalin rak suak an um ih, mawtaw siat khal a tam zo. Mawtaw niam pawl an buai hleice ih, duh vekin an feh thei lo. Rualpiza kan phone aw ih, kan suhawk tikah Yangon hmun tamsawn cu ti a lik. Ruahcen peh asile hitin kan tuar hrih dingih, ruah a han cun a zia-um cih mai ding a si,” tin a sim.

Yangon Ah Nikhat Veikhat Lawng Rawl Ei An Um Thlang – Yangon ramthen sungah thilri man a kai deuhdeuh ih, hnatuan nei lo an tam deuhdeuh tikah innsang hrekkhat pawl cu nikhat ah veikhat lawng rawl an ei thlang.

Ahleice in fangfai man, siti man le eiin man a kai tuk ruangah hna nei lo, hnatuan ding hmu pawl hrang lei an harsat tukih, nikhat ah rawl veikhat lawng ei phah an um zo. Innsang khat hrang nikhat rawl veikhat ei dingih thawng 10 kyats tal a ttul fawn, khawl cia sumpai neilo pawl an buai.

S.Dagon ih um pakhat cun “Fangfai man le siti man a kai tuk tikah kannih hnatuan nei lo hrang lei a ol lo. Cutikah rawl puar teih ei ding cu rel lo, nikhat ah rawnhru rawl veikhat fang kan ei. Fangfai man ol pikhat ah thawng 2 a si ih, siti seta ah thawng 1, arti pumhat ah 250 a si ih, kaungkuah telkhat ah 300 a man. Cutikah sa ei ding cu rel lo, rawl ei ding hrimhrim ah kan buai zo a si,” tin a sim.

N.Okalapah ih um pakhat cun “Payan innsak hnatuan ka si ih, kan tuannak kiangah bomb a puak. Cutikah ttuan peh thei loin kan cawl. Ralhrang pawl an ra ih, an cek. Cutikah duh vekin hnatuan a theih lo. Hnatuan lo cun sumpai lut a um zo ih, khawlcia nei lo, nitin hawl cop kan si tikah kan hrang a ol nawn lo,” tin a sim.

Hlaingtaya ih um pakhat cun “Lansuai ka si ih, bike in mi ka phur theu. Tu ahcun datsi man a kai tukih,burkhat 2500 kan pe. Datsi man a kai tikah miphurh man kan ttah ih, mipi in an to duh nawn lo. Cutikah datsi man hman kan ngah lo caan a um. Kan ngah sunsun ih kan ei. Hrekkhat innsang ih phungki tlawngih rawl zem ding bawh khal an tampi zo,” tin a sim.

N.Korea In Bomb Zamthei An Kap – US le S.Korea in raldo zirnak an neih tlang dingmi ah N.korea lam an lungawi lo tukih, N.Korea cun August 17 zingah bomb zamthei vei 2 an kapsuak.

N.Korea cun tipi parah bomb zamthei zohsinnak kan nei fel tin an sim. Tufang cu American khalin an nuclear an zohfel thluh hnuah bomb zamthei an neihmi pawl an zohfel rero ve.

US le S.Korea cu covid 19 natnak ruangah caan reipi sung raldo zirnak nei thlang thei loin an um ih, tu ah raldo zirtlangnak nei dingin a hlankhan timtuahnak an nei rero. N.Korea cun US le S.Korea in raldo zirnak an nei tlang cu an duh lo tukih, buainak an hawl, kanmah buaiter in tum tin an rak puh ve.

Biden in US president a ttuan hnuah US le N.Korea pehtlaihawknak a tha lo zetih, N.Korea lamsawn in US an hro rero zo. Kan dung khalah US tiang kap thei ralthuam kan nei tin N.Korea lam cun thu an rak suah.

Hivek boruak a silai ah Russia president Putin cun N.Korea thawn kan pehtlaihawknak kan hngetter sinsin dingih tuantlang tamsin kan nei ding tin a rak sim ve. US in Ukraine, Taiwan le S.Korea an humhim rero ruangah Russia ,China le N.Korea pawl khal tuantlang dingin biakawknak an nei rero ve.