Yangon ramthen Kyauk Tada myone Anawyatar lamzin ah bomb a puak ih,hriam ngah mipum 9 an um tlunah mi pakhat a thi tin buaipitu pawl cun an sim.
May 31, zanlam nazi 3 hrawngah bomb a puak ih, Yangon khawpi sungih bomb puak ah thuhla a tam, khat le khat an mawhthluk aw thluh. Hriam ngah pawl cu zamrang thei bikin sizung ah fehpi an si. Bomb puak thuhla ah ralhrang ralkap le NUG an el aw ih, an puh aw.
Ralhrang thuphuangtu Zaw Min Tun cun “Zoin bomb an puah timi cu mipi zapi theih a siko. Yangon le Mandalay mipi umnak ah zopawl in bomb an puah? Hivek tuah dingin zoin an forh tikhal a fiang. NUG vuanci pakhat thusuak ruangah hivek thleng a si.
“Tlawng phuan tikah nauhak in an tuar asile tuanvo an lak lo ding thu khal an suah. Yagon le Mandalay ah dankalh pawlkom pawl thianfai rero an si ih,umnak ding an neih lo tikah hmunpicang tivek ah bomb an puah theu. Curuangah, mipi kan simtheih duhmi cu hivek dankalh pawlkom pawl cu kanmah thawn theitawk in do uhsi timi a si,” tin RFA a simthei.
NUG cozah cun “Yangon mipi tamnak hmunah bomb a puak ih, hriam ngah tampi an um phah timi kan thei. Kannih NUG cozah cun mipi tuar ding zawngih cangvaihnak kan duh lo hrimhrim ih hivek ih cangvaitu pawl cu kan mawhthluk tuk lawlaw. Ralhrang ralkap pawl cu mipi tuar ding zawngin cangvai an si ruangah Pyu Saw Htee le tuitauh tivek pawlkom tiang an din ih rapthlak tukin an cangvai.
“Hivek in ralhrang rlakap pawl an cangvaihnak cu mipi ralkap le tlangpar ralthuamkai pawl an mawhthluk duh ruangah a si ih, an cangvaihnak cu mipi ralkap le tlangpar ralthuamkai pawl ih cangvaihnak vekin langter an tum ringring, Cucu, tlangpar ralthuamkai le mipi ralkap pawl an mualphoh duh ruangah a si. Curuangah, thuhla felfai sawn thei dingin ,theitawk kan suah vivo ding a si,” tin thu an suah.
Yangon ih bomb puak thawn pehpar aw in Yangon PDF pawl ih thusuah a um ih, cucu mipi ralkap dang pawlin an cohlang lo. Ralhrang le an kuthnuai pawl cangvaihnak a si ih, mipi ralkap thangsiat duh ah pages lem an din ih, PDF pawl thangsiat hrimin thu an suahmi a lem a si tin an sim ve.
Hriam ngah pawl buaiptu pakhat cun “Yangon khawpi ih bomb puak ruangah mipi 10 hriam an ngah ih,hriam ngah lakah besia an tam. Sizung ih thleng hriam ngah 10 lakah bese deuh pahnih an um ih, pakhat sawn a thi zo. Bomb puaknak hmunah ralhrang pawl an thleng cih ih, cumi hnu khalah bomb a puak bet tin kan thei. Asinan, neta bomb puak ahcun hriam ngah an um thu kan thei nawn lo a si,” tin BBC a simthei ve.
Ralhrang 12 An Thi – Sagaing ramthen Myaung myone sungih mipi inn nawkkangtu ralhrang pawl cu htah-masi khua ih umhmun an khuarnak ah mipi ralkap pawlin an do ih, ralhrang 12 an thi tin Myaung PDF cun thu an suah.
Myaung PDF hotu cun “Hmuntin ah mipi inn nawkkangtu an si ih, hmundang ah feh in mipi inn an nawkkang vivo tum. Culai fangah kannih mipi ralkap komkhawm pawl cun hmun 2 ah then aw in kan rak do. Doawknak ah ralhrang 12 an thi fel ih, kannih lam in miraltha pakhat kan can ve.
“Kan umnak lamih an rat theinak dingah ralthuampi in vei 3 kan kap hmaisa. Kan zum vek ciahciah in minute 15 hnu ahcun kanlam ah ralhrang ralkap pawl an ra. Kannih cu ralring zetin umhmun kan rak khuar ih, kan lam pantu ralhrang pawl cu kan rak bawh. Hmainortu ralhrang 15 an retih, cupawl dungah ralhrang dang an ra bet.
“Hmainor ralhrang pawl cu remcang zetin kan rak kap, bomb kan puah ih, ralhrang 12 an thi. Himi tum ahcun kan dinhmun a thasawn ih, neh zetin kan do thei. Asinan, ralthuampi thawn in kap ciamco ih, kan humhim aw thei nawn lo. Cutikah dung kan sipih, kan miraltha pakhat kan can ve a si,” tin a sim.
Leave a Reply