Ralhrang Pawl Hakha Lam An Pan Thei Hrih lo – Falam in Hakha lam feh ralhrang ralkap pawl cu tuini July 14 zing tiangah Hakha lam an pan thei hrih lo ih, Dokthek le Chuncung karlak ah an um lai tin kiangkap ih um pawl cun an sim.
Asinan, Hakha ih ralhrang hmunpi cun Chuncung kiangih um ralhrang pawl hrang lamzin sialsak in Ralhtuampi thawn Chuncung khua kiangkap an kap ciamco. Ralhrang ralkap pawl cu Falam in Hakha feh vivo tum an si ih, ziang an tuah ding timi felfai cu tuini tiang anmah ralhrang siseh mipi ralkap lam khalin an than hrih lo.
Ralhrang pawl cun June 29 ah Kalaymyo in saklam Chinram an rak pan ih, July 6 ah Falam an thleng. July 7 ah Falam an suahsan in July 8 in mipi ralkap pawl thawn lamzin tluanah an do aw thok. Tu ah ralhrang ralkap le mipi ralkap pawl cu zarhkhat tluk an do aw thlang. Tuih dinhmun Chuncung ramri ih um ralhrang pawl khal mipi ralkap pawlin an bawh ringring ih, doaw phah rero an si.
Yangon Mipi Fimkhur Dingin Theihter An Si – Yangon ramthen myone phunphun ih cangvai Burma Dragon Army cun Yangon ramthen sungah nasa sinsin ih an cangvaih ding ruangah yangon ih mipi pawl cu ralhrang naivai ah um lo dingin an theihter.
Burma Dragon Army hotu cun “Yangon ramthen sung myone zaten ralrinnak pek an si. Thupi cu kan cangvaihnak in dal lo dingin ralhrang umnak hmun naih hlah haisehla ralhrang kiangkap ah mipi um hlah haiseh timi cu kan duhmi a si.
“2022 April thla hrawngah kan sungtel hrekkhat mipi ruangah kaihmi an tam. Curuangah Yangon suahsan in hmundang ah zirnak kan nei bet lawk. Asinan, June thla in Yangon ah kan ra kirsal zo ih, June thla ahcun vei 2 lawng kan cangvai man. Tui July thla thar ah yangon kan umcilh sal ih, nasaten cangvai vivo tum kan si,” tin a sim
BDA pawl cu Yangon ramthen sungin N.Okalapah, Bahan, Hlaing, Shwe Pita, Hlaing Taya, S.Dagon le Dagon myotit pawl ah July 10 in an rak cangvai thok zo. An cangvaih dan tlangpi cu raltlang umnak ah bomb puah, ralhrang zung le Check Gate tivek ah bomb puah an si ih, a tuldan ih zir in meithal hman caan khal an nei.
A tufang Yangon hmun tinkim bomb puak theih ding a um ciamco sal ih, ralhrang ralkap in an tuar bangin mipi lakin thih phah tivek khal an rak um. Hivek ruangah BDA cun mipi cu ralhrang naivai ah um lo dingin an theihtermi a si.
Palaw Ih Doawknak Ah Ralhrang 10 An Thi – Tanintharyi ramthen Palaw myone sungih doawknak ah ralhrang 10 an thi tin Palaw PDF cunJuly 14 zingah thu an suah.
July 13, zinglam nazi 4 hrawngah palaw myone Pawatkung khua ih umhmun khuar ralhrang ralkap pawl cu Palaw PDF le an tuanpi pawl in an kulh ih an kap ciamco. Zinglam nazi 4 in an do aw thokih, sun nazi 12 tiang an do aw. Nazi 8 sung nasa zetih an doawknak ah ralhrang 10 an thi ih, mipi ralkap lamin mi 3 an thi ve tin Palaw PDF cun an thusuahmi ahcun an tarlang.
Palaw PDF thuphuangtu cun “Ralhrang ralkap lam an mipum a rak tamih, kanmah lamin mi 3 an thi phah ve. Kan miraltha pathum lakin mi pahnih cu ralhrang lamin Sniper in an kap that. pakhat cu ralthuampi in a tlak ngah ih a nunnak a cem. Ram le miphun hrang nunnak hlantu kan miraltha pathum pawl cu upatnak kan pe ih, an sungte pawl khal kan tuarpi tuk lawlaw. Kannih a nungdam lai pawl cun ralhrang ralkap kan do peh vivo ding a si,” tin a sim.
Palaw ah doawknak a sosang ih, mipi cu doawknak kiangkap ah um lo dingin le doawknak hmun hrial dingin an theihter. Ziangahtile, ralhrang pawl cu minung thinlung khal pu nawn lo an si tikah an kiangkap ih an hmuhmi mipi pohpoh an kai ih, duhduh in mi an that tam zo. Cumi ruangah mipi cu fimkhur dingin theihter an si.
MNDAA le Ralhrang An Do Aw – Shan ramkulh Mongo hmunram sungah Kokang ralkap MNDAA le Ralhrang ralkap pawl doawknak a sosang ih, mipi cu Mongo hmunram sung feh sukso hrih lo dingin an theihter.
MNDAA le ralhrang ralkap pawl cu July 12 zingin an do aw zo ih, July 14 zing tiangah an boruak a dai thei hrih lo. Doawknak cu ralhrang ralkap pawlin hmunram an nor ruangah tin MNDAA lam cun an sim.
MNDAA thuphuangtu cun “Ralhrang lamin kan sakhan in ra naih vivo ih kan theih ruangah lamzin in kan rak do. Thuhla umdan felfai zetin kan zingzoi hmaisa ih cumi hnuah kan kap. Doawknak ah ralhrang lam thi an um ding nan a zat kan fiah thei hrih lo. Kannih MNDAA lam cu kan him a si,” tin a sim.
Ralhrang ralkap cun June thlasung khalah Shan ramkulh Mongo le Muse myone sungih um MNDAA sakhan an rak naih zo ih, MNDAA thawn an rak do aw. Cumi hnu July thla ah ralhrang pawlin MNDAA lam an nor betih do aw an si.
Palik Sungkua Pawl Suak Lo Dingin Thu An Pe – Sagaing ramthen Khin Oo myone ah ralhrang palik bawi pakhat cu bomb puah a si ih, sizung fehpi a sinan a thi thotho. Hivek ruangah palik pawl cu an tuanvo , an caan a kim lo ahcun palik hmun suahsan lo dingin an theihter.
July 7, zinglam nazi 8:30 hrawngah Ralhrang palik bawi Min Chit Thu cu lamzin ah bomb puah a si ih, hriamhma naa tuk a ngah. Palik bawi Min Chit Thu cu Helicopter in an phur ih, zamrangten sizung an luhpi nan, a thi thotho.
Hivek ruangah ralhrang palik cun thu an suah ih. a tul lo ahcun palik le an sungte pawl cu hmunleng ah feh lo dingin le palik hmun lawngah um khiokhi hai dingin an theihter.
Ralhrang palik zungpi cun “Palik bawi Min Chit Thu cu lamzin ah bomb puah a si ih, zamrangten sizung fehpi a sinan, a nunnak a cem. Hivek ruangah palik sungkua le palik pawl cu umnak ding hmun kan tinak hmunah um cio dingin theihter nan si. Nan caan a kim lo ahcun lenglam ah suak hniaihniai hlah uhla. Himi cu palik zate ih thlun dingmi thusuak a si,” tin ca an kuat vivo.
Ralhrang In Sri Lanka Bom An Tum – Ralhrang ralkap cun a tufang nasaten buai Sri Lanka ram bomnak pek an rak tum ve ih, Sri Lanka mipi hrang fangfai kuat an tum.
Ralhrang pawl cu Sri Lanka bom dan ding thuhla thawn pehpar aw in July 13 ah meeting an nei ih, Sri lanka mipi hrang fangfai ton 1000 tlukih rit kuat dingin an rel. Sri Lanka mipi hrang fangfai kuat dingmi ziangtin an lei ding, ziangvek fangfai an kuat ding tivek buaipitu dingah tuanvo an pe aw.
Kan dung khalah Sri lanka ram ih Myanmar Embassy palai cun ralhrang hotu Min Aung Hlaing a rak be zo ih, cumi tum ahcun Sir Lanka ram bom thei dan ding an reltlang. Tu ah ralhrang pawl cun a takin Sri Lanka mipi bomb an tum ve.
Sri lanka ram cu nasaten an tlasia ih , an ram sungah datsi, yinan, Gas, eiin le sivai phunphun lei ding a harsa tuk zo. Hivek ruangah rampi huapin duhphorhnak an nei ih, an ram president le Prime Minsiter bangin an phut.
President bik cun Sri Lanka ram a suahsan zo ih, president in bannak ca khal a thehlut zo tin hlutdaw lam cun an sim. Tu ah hlutdaw cun a rangthei bikin rampi hrilawknak tuah an tum. Hivek dinhmun ah duhphorhnak nei mipi pawl cun nasa sinsin in duhphorhnak an neih peh ruangah ralkap le palik lam an hrolh aw thlangih, Sri Lanka ram cu martial law an phuang hrih.
An ram buainak a sosang tukih, hrilawknak an tuah thei taktak pei maw? an ram buainak a felfai thei pei maw tikhal theih a si hrih lo.
Leave a Reply