Zaw Min Tun A Dam Lo – Ralhrang thuphu\p-3 gtu Zaw Min Tun a dam lo ih, ramdang sizung ah a tuamhlawm aw tin ralhrang sunglam thu a suak.
Ralhrang thuthup phuangtu cun “Ramdang ah Zaw Min Tun a tuamhlawm aw timi cu a dik ko. October zarh netabik ah a feh ih, zarhkhat tluk a rei. Ralhrang hotu pawl an dam lo asile Thailand lole Singapore an feh tlangpi. Asinan, ralhrang in rampi thuneihnak an lak hnu ahcun Thailand an feh tlangpi thlang. Ziangahtile, Singpore cun ralhrang uknak lakmi an pom tuk ve lo tikah Ralhrang pawl cu Singapore an feh tuk nawn lo.
“A natnak bik rel a silo nan, natnak a nei tam tin kan thei. Ramdang tiang feh in a tuamhlawmawk tikah natnak picang a si dingah kan ruat. Natnak tenau cu Nipidaw ah an tuamhlawm aw thei. Tu ah amah Zaw Min Tun cu Nipidaw a thlengsal zo nan, a damfel hrih lo tin kan thei. Zung khal a kai hri lo,” tin a sim.
Zaw Min Tun ih damlo thu ah thu tampi a um nan, a fehnak ram le a natnak cu felfai in theihfeng a si hrih lo. A dam lo ih, ramdang ah a tuamhlawm aw timi cu felfai zetin an fiah zomi a si.
Ralhrang In CNA Sakhan An Hel – Chin ramkulh Thantlang peng ih Chin ralkap CNA sakhan cu November 2, zinglam nazi 11 le sun nazi 12 karlak ah ralhrang ralkap vanzam cun vei 3 tluk a hel tin a kiangih rak hmutu pawl cun an sim.
Khuami pakhat cun “Ralhrang pawl ziang an duhsan ti cu kan thei lo. Vanzam awn kan theih tikah kan zoh ih, ralhrang vanzam cun CNA sakhan kiangkap vei 3 tluk a hel. Cumi hnuah ralhrang vanzam cu Kalaymyo lamah a kirsal.
“Kalaymyo lam thuhla kan suh tikah Kalaymyo in vanzam a zam suak lo tin an sim. Cutikah ralhrang vanzam cu Mungzua in Thantlang lam a zam cih in a lang. Ralhrang pawl ziang an duhsan timi cu kan rakap pawlin zingzoinak an nei cih ko ding,” tin a sim.
Phone Bill Tiang Ru Ralhrang – Ralhrang ralkap cun mipi thilri phunphun an ruksak theu tlunah phone bill tiang an ruksak tin phone bil an ruksakmi pawl cun an sim.
Khualtlawng pakhat cun “Hakha in Yangon kan feh ding tikah kan phone in ceksak thluh. Phone in ceksak ding tikah Passworld in phelhter thluh ih, an sakhan sungah reipi an cek theu. Cumi ahcun phone bill ruksakmi an nei theu. Kan rualpa phone bill thawng 20 nei khal an cek theh ahcun phone bill thawng 5 lawng a tang.
“Phone an cek tinten Phone bill an ruksak cu a si hmel lo. Phone bill an neih lo caan ah mipi phone an cekmi pawl ih phone bill an ruksak. Cutikah khualtlawn ding cun phone bil tampi thuncia khal a fuh nawn loin a lang. Kan san hi a se tuk lawmmam, kan thilri lawng siloin kan phone bill tiang an ru thlang,” tin a sim.
Mara Army In CNA An Mawhthluk – Mara Army hrampi MATC meeting an nei ih, cumi ahcun hotu thar an hrilawk thu an tarlang tlunah CNA an mawhthluk thu khal an tarlang.
Mara Army cun “October 28 le 29 ah meeting kan nei ih, palai zaten komkhawm mipum 46 kan kim. Meeting ahcun hotu thar kan hril ih, a tufang Mara hmunram sungih thilthleng pawl khal kan rel. Ahleice in Mara mipi kan him theinak ding, khat le khat lungrualten ke kan kar tlang theinak ding le Federal Democracy uknak kan din theinak ding pawl kan rel.
Mara Army MDF hi Mara khua 44 sungin mipi 86% lungkimnak thawn kan dinmi a si ih, 2021, January 28 le 29 ah mipum 275 in meeting kan rak nei zo. Cumi ahcun CRPH le NUG daan vekin Mara hmunram nei dingah CDF Mara le Mara Army kan rak kom aw ih, Maraland Defence Force MDF tin hmin kan pe aw. Cumi hnu ihsin MDF cu Mara hmunram sungih thuneitu bik a si.
“CDF Mara hmangin CNA le ZZLMS pawlkom cun Mara hmunram luah an tumih, NUG daan vekin tlawng kan phuanmi pawl khal in hnaihnok tlunah kanmah Mara karlak ah buainak an suakter. CDF Mara tiaw pawl cu Mara mipi ih hrilmi hruaitu an silo ih, Mara mipi duhdan thlun loin mahte suak pawlkom an si.
“CNA le ZZLMS tanpinak in CDF Mara cun Mara Army dinpitu Ngaphaipi khua mipi pawl an hrem ih, khua an rak luhcilh. Hivek cu dothlengnak daan pahbal a si ih, thluak neilo cangvaihnak a si. Ngaiphaipi khua ih buainak ah remnak tuah tum loin CDF Mara le CNA cun khua mipi pawl cu an duh lo cingin hminkhen an nganter ih, mipi duhdan siloin anmai duhdan sawn in thil an tuah. Asinan, kannih Mara army pawl cu Ngaphaipi khua mipi pawl kan dinpi ringring dingih an hrang theitawk kan zuam ding.
“Kannih Mara Army cu Mara mipi duhdan vekih dinmi a si ruangah Mara karlak ih buainak khal ralthuam siloin a relten rel ih remnak tuah duhtu kan si. Mara karlak buainak ah remnak tuah tum loin dunglam ah ralthuam rak pe ih,buainak luarter sinsintu pawlkom nan um. Curuangah kannih Mara buainak ah midang tel nawn lo dingin kan lo theihter.
“Tu ihsin thokin Mara Army siannak tel lo cun zokhal Mara hmunram sungah ralthuamkai pawlkom dang nan lut thei lo. Thusuahmi nan thlun lo ih, nan lut pang asile buainak a thlen tikah nanmah in tuanvo nan la ding. Kannih Mara Army siseh MATC khal Mara hmunram remdaihnak tuah duhtu hrangah beaw dingin sangka kan ong ringring a si,” tin thu an suah.
Ralhrang In Hngaktah Inn An Kharsak – Mandalay ramthen Pikyi Takhon myone ih hngaktah innpi cu PDF pawl thawn nan pehparaw tin ralhrang pawl cun an kharsak.
A kiangih um pakhat cun “November 2, zan nazi 6 hrawngah a si ih, Christian pawl ih dinmi hngaktah tlawng le PDF pehparawknak nan nei tin ralhrang pawl cun an kharsak. Ralhrang pawl an tam zetih nauhak pawl thilri an thiarter hnuah an dawisuak. Tu ah nulepa nei lo, hngaktah nauhak pawl khawiah an um tikhal kan thei lo. Zan sim hnuah nauhak pawl an dawisuak ih, khawiah an it ding tikhal kan thei lo.
“Thuhla kan ton dan vek asile hngaktah tlawng le PDF nan pehparaw tin an tlawng an kharsak. Ralhrang pawl ziangtin an cangvai vivo ding ti cu kan thei lo. Zan sim hnu tiang ahcun hngaktah tlawng kotah fawm hruh loin kiltu an um. Cutikah mipi hrang feh ngam ci a si hrih lo. Ralhrang pawl cun innpi an khar thu ca an tar ih,zohman in naih lo dingin thu an suah a si,” tin a sim.
Ralhrang In Raltlan Pawl An Dawi – Rakhine ramkulh Buti Tuang myone sungih raltlan mipum 2600 hrawng cu ralhrang pawlin raltlan umnak hmunah um an siang nawn lo ih, khua ah tlung uh tin an dawi.
Raltlan buaipitu cun “Tuitum in raltlan pawl suak dingih an dawinak veili a si thlang. Vei hnih an komkhawm ih an sim ih veihnih dang cu anmah ralhrang pawl raltlan umnak hmunah an feh ih,an dawi. Raltlan pawl cu ralhrang umnak hmunah um an silo ih phungki tlawngah um an si. Cucu, an hmu thei lo ih, an dawi rero men. Hivek cu rampi cozah le ralkap pakhat ih tuah ding a silo,” tin a sim.
Ralhrang ih dawi reromi raltlan pawl cu tuitum ram buainak ruangah tlan an silo ih, 2019 kum AA Le ralhrang doawk ruangah tlan an si. Inn le lo suahsan ih tlan an si tlunah inn siat tampi an um ih, inn nei naw lo an tam. Curuangah ralhrang pawlin an dawi rero nan tlunnak ding nei nawn lo ruangah buai an si.
Leave a Reply