Premier league club Man United hmaitlan C.Ronaldo cun Man United hruaitu pawl hnenah club suahsan siannak pe dingin a dil ih, Club dangah lek a duh thu a simthei hai.
C.Ronaldo in Man United suahsan a duhnak san ah thuhla tampi a um ih, cumi lak ahcun Man United in player an lei thei hrih lo ruangah, Man United in Champions league an lek thei lo ding ruangah le Man United in laksawng an zuam thei a zum lo ruangah timi pawl an tel.
Pakhatnak ah C.Ronaldo hi kum 37 a kim zo ih, Man United ah a um hrih asile tui season sung cu Champions league a lek thei lo dingih, Champions league ih a sulhnu thatuk pawl a danglam thei. Cumi ruangah a hrang season khat sung Champions league lek lo ding cu a ruat ngam lo tin thuhla a suak.
Pahnihnak ah Man United in Coach thar an nei zo nan, tutiang player thar leimi an nei hrih lo ih, player thar an lei thei lo tlunah an lei tummi pawlah C.Ronaldo a lunghmui lo ih, team thatuk an si ding a beisei ban lo tin an sim.
Pathumnak ah tuih Man United player pawl thawn cun laksawng picang an cuh thei a zum lo ih, season hnih rori laksawng ngah loin a um ding a ruat ngam lo. Kan dung season ah C.Ronaldo telnak Man United in laksawng an rak ngah lo zo.
Hivek pawl ruangah C.Ronaldo in Man United suahsan siang dingin Man United hruaitu pawl a dil tin thuhla felfai zet a suak. Tuhrih ahcun C.Ronaldo lei dingih betu Club an um hrih lo ih, C.Ronaldo palai cun C.Ronaldo hrang club thar a hawl rero lai.
Man United in C.Ronaldo suah an siang asile Bayern Munich le Chelsea cu C.Ronaldo lei duhtu dingah ruah an si ih, a man le a hlawh ih zir vivo a si ding. Tu ah C.Ronaldo cun zarhkhat hrang Man United ah £400,000 a hlawh ih, hizat rori pe ngam an um zum a silo. Asinan, C.Ronaldo in a hlawh a ttum thei ve thung.
Thuhla netabik suak dan vek asile C.Ronaldo cun Man United hruaitu pawl hnenah amah dawrtu club an um asile suah siansak dingin a dil nan, Man United cun tuvek dinhmun ah C.Ronaldo zur an tum lo tin thuhla a um. Tuhi player pawl leiawk caan a si ih, ziangkim a danglam thei bangin, ziangkhal a thleng thei ve thung a si.
Leave a Reply