AA Hnenah Zirnak Nei Mara Army – Mara Amy tiah theihhlawh Maraland Defence Force MDF pawl cu AA hnenah ttum hrih rori raldo zirnak tluanten an nei thei tin mipi theihternak an nei.
AA hnenih zirnak nei Mara Army pawl cu mipum in 150 an si ih, thla 4 sung zirnak an nei. Thla 3 sung hramthok ralkap sinak an zir ih, thlakhat sung tuamhlawmawknak lam an zir. Thla 4 sung AA hnenih zirnak an neihmi cu December 6 ah an thehsuak.
AA hnenih zirnak an neih sungah Mara Army lamin mi pakhat cangsualnak in a thi. AA hnenih zirnak an neih ruangah AA thawn an pehtlaihawknak a tha ih, tulsammi thildang khal in bawm phah thei ko ding tin Mara Army hotu lam cun an sim.
Mara Army tuanvo neitu cun “Tu ahcun AA hnenih zirnak kan neihmi kan theh fel zo ih, kan tulsammi thildang ralthuam khal AA lamin in bawm thei dingah kan ruat. Uknak tha lo ralhrang do khal in bawm ding leh ko ding tin ruahsannak kan nei. Ralthuam in bawm thei ding asile CNA hnen khalah raldo kan zir leh ding.
“Kannih Mara Army hi ralhrang uknak do dingah, Mara mipi nunnak le neihsiat humhim sak dingah, Mara mipi in hmunram kan neih ve theinak dingah le Mara mipi loram pawl koailahim dingah Mara Army din kan si,” tin a sim.
Ralhrang In Paletwa Tipar Zin An Ong – AA le ralhrang kap aw hrih lo dingin remawknak an tuahmi cu Paletwa lamin hamthatnak an rak nei ve. Ralhrang cun thla 3 sung Paletwa tipar zin an phihmi cu AA thawn kap aw lo dingin remnak an tuah hnuah Paletwa tipar zin khal an ong.
Paletwa ih um pakhat cun “December 3 in Paletwa tipar zin ih feh lawng a suak thokih a ra kirsal zo. Thilri phunphun le mipi ei ding phunphun a phur tlung. Paletwa tipar lamzin hi thlatel an kharmi a si ih, an on zo tikah mipi tulsammi ziangkim kan ngah thei thlang ding tin kan ruat. Tipar lamzin an khar ruangah thilri man a kai tuk man ih, thenkhat tla cu lei ding um lo tiangin a cem. Tu ahcun thilri a thleng rero thlang,” tin a sim.
Raltlan buaipitu pakhat cun “Khatlam zawngih kan ruat asile mipi hrang siseh raltlan pawl hrang khalah a tha. Kannih khalin raltlan pawl hrang thaten thilri kan phur thei thlang ding. Mipi tulsammi khal a cah thei dingih lei ding a um thlang ding. Thilri man pawl khal a tlasal dingih mipi khalin lei ding an nei thlang ding. Thlatam zet sung khar a si tikah kan harsa man tuk a si,” tin a sim ve.
AA le Ralhrang cun ziangtik tiang um loin kap aw hrih lo dingah remawknak an tuah. AA le ralhrang kap aw lo dingin remnak an neih ruangah mibawmtu pawlkom pawl khalin Rakhine ramkulh sungah bomnak an pe theisal tin an sim.
Bomb Cangsualnak Ah CDF Pakhat Thi – CDF hualngoram sungtel pakhat cu bomb cangsualnak ah a thi tin CDF Hualngamram cun mipi theihternak an nei.
CDF Hualngoram cun “Kan sungtel Lalrawngbawla cu Demcember 5 ah bomb cangsualnak in a nunnak a cem. Kan sungtel Lalrawngbawla hi ram le miphun hrang theitawk ih hnatuantu pakhat a si ih, upatnak kan pe.
“Tu ahcun kan hnenah Lalrawngbawla a um nawn lo ih, in fehsan zo. Curuangah kannih le lalrawngbawla cu pehparawknak kan nei nawn lo ih kan sungtel a sinak in kan suah zalen fel. Lalrawngbawla na duhnak lamzin feh thlang aw, a cem hrih lomi dothlengnak cu kannih a nungdam lai pawlin kan ron pehzom vivo ding a si,” tin thu an suah.
Mungzua Ah Ralhrang 8 An Kap That – Sagaing ramthen Mungzua khua luhnak ih umhmun khuar ralhrang ralkap pawl cu Mungzua PDF in December 5, zinglam nazi 10 hrawngah an va kap ih, ralhrang 8 an thi tin thu an suah.
Mungzua PDF cun “Tuitum ah kanmah lawng siloin Golden Eagle, Black Dragon, Ranger Army le tualsung PDF pawl thawn komkhawm in ralhrang umhmun khuarnak kan kap. Ralhrang lamin in rak kap ve ih, kan PDF lamin miraltha pakhat cun ram le miphun hrang a nunnak a hlan.
“Doawknak ah ralhrang 8 an thi. Cumi ruangah ralhrang cun duhduh in kiangkap an kap ciamco ih, mipi pahnih an kap that ngah. Doawknak ih mipi an thih phah ruangah poi kan ti ngaingai ih, siattong innsang kan tuarpi tuk. Kan miraltha pakhat khal PDF hrang tangkai ngaingai a siih, in fehsan men tikah kan ui lawlaw. Kannih a damlai pawl cun theitawkin ralhrang uknak kan do vivo ding a si,” tin mipi theithernak an nei.
CCTV In Min Aung Hlaing An Kil – Ralhrang hotu Min Aung Hlaing hi puai ngaina tuk ti ih an rel zo bangin tu khalah Yangon Mingaladung ralhrang tlawng theh puaiah feh a tumih a fehnak lamzin tluan cu amah kilnak dingah CCTV a retter thluh zo.
Ralhrang thuthup phuangtu cun “Yangon Mingaladung ih ralhrang tlawng theh puai ah Min Aung Hlaing a feh tum. Cumi hrang a kuthnuai pawl cu amah kilhimnak nasaten a tuahter. A fehnak ding lamzin tluanah CCTV a retter thluh ih ralhrang pawl lamzin ceknak an nei rero zo.
“Thupten Yangon feh tum a si ih,a fehnak lamzin tluanih CCTV a bunter khal mipi theihter a duh lo. CCTV a retternak san ih lang cu lamzin tluan an zohfel vivo theinak dingah siko ding. Thih cu a tih zetih thupten a vak cing khalah amah kiltu ding ralkap tampi a ret ringring a si,” tin a sim.
Ralhrang Ruangah ASEAN Palai Thu A Thleng – ASEAN in Myanmar palai ih an ruatmi Cambodia ramdang palai Prak Sokhonn cu avei thumnak Myanmar feh dingin a um nan, ralhrang pawl ruangah Myanmar a feh dingmi a thulhsal.
ASEAN in Myanmar ram buainak an tawlrelmi ah Prak Sokhon hi ralhrang pawl dawrtu dingah an ruat. Tu ah ASEAN palai a sinak a cem zik thlangih, a caan cem hlanah Myanmar a tlawng tum. Asinan, ralhrang pawlin tlawngta 7 le mino 4 dang thih dan an pek bet ruangah ASEAN palai ih ruah dan a silo tukih Myanmar a tlawn ding cu a thulhsal.
ASEAN palai in Myanmar a tlon dingmi a thulh cu ralhrang biak duhnak an nei nawn lo tinak a si ih, kum thar ahcun ASEAN palai thar ruat ding a si thlang.
ASEAN cun theitawkin Myanmar ram buainak cinfel an tum rero nan, ralhrang lamin ASEAN ih dawrnak an ngaihsak lo tikah ASEAN khal ralhrang parah an beidong thup zet thlang. Myanmar buainak ah remnak um dingin ASEAN cun ralhrang hotu Min Aung HLaing an rak ko ih, lungkimnak 5 an rak tuahpi. Cumi khal tuini tiang ralhrang lamin pakhat hman an pitlin hrih lo ih, ralhrang pawl cangvaih dan ah ASEAN pawl an beidong zet ve thlang.
World Cup Quarter Final Ah Portugal Lut – 2022 FIFA World CUp sungsuak puai netabik cu December 7 zingah lek a si ih, Portugal cun 6-1 in Switzetland an sop hnuah 2022 FIFA World Cup quarter final an lut.
Portugal hrang Captain C.Ronaldo a lut hngal lo ih, COach in thelhbawh ah a toter hmaisa. C.Ronaldo aiih lut Ramos cun Portugal hrang goal 3 a thun ih, tuitum World Cup ah hattrick tuah hmaisabik a si. Portugual dunglam Pepe Kum 39, dunglam dang Guerreiro le hmaitlan Leo pawlin POrtugal hrang goal 1 ciar an thun.
December 6 zan ah World Cup sungsuak puai hrang Spain le Morocco an lek ih,goal um loin an duhtawk aw. Caan pekbet khalah an sit goal thei lo veve ih, Penalty an sit. Penalty ah Morocco cun 3-0 in Spain an neh. Spain Player 3 pawl ih sitmi cu Morocco kawlkil in a khamsak thluh. Nehnak co Morocco le Portugal hi quarter final an do aw ding.
Hitin 2022 FIFA World Cup sungsuak pawl an lek thluh zo ih, quarter final an lek dan ding khal a fiang thluh zo. Quarter final ah Argentina vs Netherlans , Croatia vs Brazil, Morocco vs Portugal, England vs France tin an lek ding. December 9, Myanmar caan nazi 9:30 lawngah quarter final puai hmaisabik an lek thok dingih Croatia le Brazil an lek ding a si.
Leave a Reply