AA In Chin Khua Hrekkhat Ah Thlatin SIAH An Khong

Chin ramkulh Paletwa peng sung Pichuang uksuh ih um khua pawl cu AA in thlatin siah an dil ih, pek harsa an tituk zo. AA cun Pichuang uksuh ih khua pawl cu khua khatah thla khat ting 1 tin siah a dil hai.

Pichuang ih um pakhat cun “Kannih khua ahcun thla khat ah ting khat siah in ra khong theu. Asinan, tingkhat khal kan kim thei dah lo. Thawng 90 hrawng kan pe theu. Kan harsa khawm ih, an duhzat khal kan pe thei lo. Kanmai duhdan in pek kan tum lo nan, pek lo theih loin thu an suak tikah cawicop khalin kan pek caan a um,” tin a sim.

Paletwa peng, Rakhine ramri ih Chin khua Pichuang uksuh ahcun khua 9 an um. Picuang uksuh cu Rakhine ramri le Bangladesh ramri ah an um ih, AA in an umcilhnak a rei zo.

Khuami pakhat cun “Kannih khua cu inn 20 hrawng kan si ih, AA in ting 1 in khong. Innkhi 100 hrawng umnak ahcun ting 2 an khong. Khua tamsawn cu ting 1 ciar an khong ko. AA in hivekin siah an khonnak a rei zo. Ralkap pawl kan sim tikah pe men uh, buainak a tam maimai tin in rak sim theu. AA hnenih siah kan peknak kum 1 a kim thlang ding. Pichuang uksuh cu AA in an ciahneh tukih vah sukso ding khalah AA hnenah kan simthei theu sawn a si,” tin a sim.

Tamu Ah Lal Zaten Suak Dingin An Theihter – Tamu PDF cun Tamu District sungih khualal le venglal zaten an hna ihsin bang thluh dingah thu an suah ih, ni 10 sung lawng caan an pe.

Tamu PDF cun “Tu cun Tamu District sungah mipi uknak fehpi vivo thok a si ih, Tamu hmunram sungah khua, myone le District dinhmun tiangin uknak fehpi a si. Curuangah , ralhrang hnuai ih, khualal le veng uktu hnatuan pawl nan hna bansan dingin theihter nan si ih, ni 10 sung lawng caan pek an si.

“Hivek in thu kan suahmi nan thlun lo asile ralhrang dinpi, ralhrang tuanpitu ah kan lo ret dingih dankalh pawlkom hremnak vekin nannih khal kan lo hrem cih ding a si,” tin thu an suah.

Ralhrang Eiin Phurtu An Kap – Kaya ramkulh Demoso myone Myomah palik sakhan hrang eiin phurtu ralhrang mawtaw cu Demoso PDF in an kap ih, ralhrang 3 an thi tin thu an suah.

Demoso PDF cun “Myomah palik hrang eiin phur ralhrang mawtaw 2 an ra timi thu felfai kan theih tikah lamzin in kan rak bawh. Kan hmuntinnak zawn an thlen zawngah kan kap ih, annih lamin in ra kah ve tikah minute 30 tluk kan kap aw.

“Doawknak a sosan tikah myomah palik sakhan in ralhrang pawl khal kan lam an ra pan ih, eiin phur ralhrang pawl an bawm. Demoso ralkap hmunpi khalin meithalpi thawn in kap ih, Helicopter tiang an hmang. Cutikah kannih cu dung kan sip. Doawknak ah ralhrang 3 an thi a si,” tin thu an suah.

Ralhrang In An Sualpi Hnuah An That – Sagaing ramthen pale myone Taung khua ah kum 17 le kum 13 nute cu ralhrang ralkap pawlin an sualpi hnuah an that.

Ralhrang ralkap cun July 11 ah Tuang khua an rak luhcilh ih, kum kim lo nunau pahnih an kaih hnuah an sualpi ih an that. Culo midang mipi 3 khal an that bet. Ralhrang ih thahmi pawl cu ralhrang pawlin khua an suahsan hnu lawngah khua mipi in an hmu.

Khuami pakhat cun “Ralhrang pawl khua in an suah thluh hnuah khuasung kan lut ih, ralhrang ih thahmi ruang 5 kan hmu. Kum 17 nute le a nu’i ruang kan hmu hmaisa bikih, cumi hnuah kum 13 nute le a nui’ ruang kan hmubet. Cumi hnuah nunau ruang pakhat kan hmu bet.

‘Ruang 5 kan hmu ih, ralhrang in sungkua in thahmi an nei. An fale sualpi an si tikah an sungte pawlin zangfah an dil ih, an sungte pawl khal an that cih in a lang. Ruang 5 pawl cu mipi ralkap lakin sithiam pawlin zohfelnak an nei a si,” tin a sim.

Makui ramthen Sik Phyo myone Pai’ khua khalah ralhrang ralkap cun fate pahnih ih nu an kai ih, an sualpi hnuah an that. Ralhrang in an kaih hnuah an thahmi cu khua ih kirsal duak a si ih, ralhrang pawlin an rak kaih ngah tikah an thlah nawn lo.

Khuami pakhat cun “Kan khua ih ralhrang pawl an rat tikah kan zaten kan tlan thluh. Daw Hnin Wai cu thilri a theihhngilh ruangah khua ah a tlungduak ih ralhrang pawlin an rak kai ngah. Ralhrang pawlin an kaih ngah hnu ahcun an sualpi ih an that.

‘Ralhrang pawl cun khua sungih mipi thilri duhtawk in an cen ih, khua in an suak zo. Ralhrang pawl khua in an suah hnuah an thahmi ruang kan hmu. An sualpi ti a theihtheih tukih a kut le ke khal an khiak. Duhtawk in an sualpi hnuah an that in a lang. A ruang zoh ngam ding khal asilo,” tin a sim.

Kachin Ah Ni 3 Sung An Do Aw Zo – Kachin ramkulh Moemauk myone ah KIA le ralhrang ralkap pawl ni 3 sung an do aw zo tin KIA lam cun mipi an simthei.

KIA thuphuangtu ralbawi Nawbu cun “Ralhrang lamin ramri in nor tikah kannih in kan rak kham ih , kan do aw. July 10 in kan do aw thokih, ni 12 tiang kan do aw hrih. Doawknak a um tikah ralhrang hmunpi pawl cun meithalpi an hmangih, hlaral khalin in kap. Ralhrang le Pituhsit pawl an tantlang tikah doawknak a sosang vivo thei a si,” tin a sim.

Moemauk ih um pakhat cun “Doawknak a um tikah ralhrang mawtaw 6 an thleng bet. Ralhrang mawtaw pawl an kirsal tikah ralhrang thi le hriamhma ngah pawl an phurtlung. Mawtaw thlen theilonak hmun ahcun ralhrang thi pawl cu cawleng in an phur lai rori kan hmu. Naivai khua pawl cu doawknak ruangah hmunhim panin kan tlanih hrekkhat lo hnatuan laklawh pawl an um lai,” tin a sim.

Ralhrang Thi An Tamih ,Ralthuam Tampi An Laksak – Karen ramkulh Myawaddy myone Wawlay lamzin ah Karen ralkap KNU pawl cun July 12 ni ah ralhrang ralkap an do ih, ralhrang thi an tam tlunah ralthuam tampi kan laksak thei tin thu an suah.

KNU ralkap Cobra cun “July 12, zinglam nazi 6:20 hrawngah ralhrang ralkap thawn kan do aw ih, doawknak ah ralhrang bawi tampi telin ralhrang tam tuk an thi. Doawknak sulhnu thianfainak kan nei peh rero lai. Doawknak ah kannih lamin mi pathum hriam an ngah nan, an bese lo.

“Doawknak sulhnu kan thianfai tikah ralthuam tampi kan laksak thei. Ralthuam kan laksakmi pawl cu RPG bomb, bomb puak bomb, denpuah bomb, Bomb hawlnak , Phone 4, sumpai ting 20, cerek 5000, MA zunkhat,nam, phahlai, suahdur le thilri dangdang pawl an si,” tin thu an suah.

China In Thuanthu Zohthiam Dingin Japan An Simthei – Japan ram hrilawknak ih nehnak cotu LDP party cu China in lungawpinak an hlan hnuah thuanthu zohthiam in ram thansohnak lam buaipi dingah an forh.

China cun Japan hnenah “Kannih ram pahnih remnak kan neihmi ngai poimawh in hmailam pantu si hram uh. Ramri kan si bangin khat le khat rualrem aw zetin kekar ding kan si ih, Japan ram thansohnak dingah zuam uh. Kannih China cu Japan thawn tuantlang dingin kan man ringring.

‘Remdaihnak le daihnak ngai thupi uhla innhnen ram ngaihsak uh. Leitlun ramdang pawlin Asia ram tamzet an naih rero tikah thuanthu zoh in zir thiam a tul. Kiangkap ram le Asia ram pawlih rintlak si dingin zuam hram uh. Khat le khat zumawknak cu thiltha a si,” tin an simthei.

A hlan Japan cozah cu US thawn tuantlang an si ih, China in Taiwan a hrinhro thu khalah Taiwan lamtang in China do ding tiang rak hman tiatia an si. Hivek a si tikah China cun japan cozah thar hnenah US cu anmah Japan rak siatsuah zotu an sizia thuanthu zoh ih zir thiam dingin an theihter.

Be the first to comment

Leave a Reply

Your email address will not be published.


*