AA In Chinmi 15 An Kai

Chin ramkulh Paletwa myone sungih Chinmi 15 pawl cu June thlasung ah Rakhine ralkap AA in an kai tin lailak Khumi Chin uktu IKACC cun thu an suah ih, AA hnenah an kaihmi Chinmi pawl thlah dingin an theihter.

IKACC cun “Chin ramkulh paletwa peng sungih Chinmi 15 hnakin tam pawl cu june thlasungah AA pawlin an kai ih, an kol hrih. Thuhla kan zingzoi ih kan theih dan vek asile AA kaihmi Chinmi 15 tlun pawl cu lo hnatuan mipi an si ih, AA in an kai ih, thu an suhnak ding san a um lo.

“Hivekin AA in Chinmi pawl an kai cu khat le khat zumawknak hloraltertu men a si ih, Khat le khat theihthiamawknak hlotertu khal a si. Curuangah kaihmi pawl thlah zalen dingin AA hnenah kan dil a si,” tin thu an suah.

IKACC hotu cun “Mit hmutu pawl hnenih kan theih dan vek asile AA in Chinmi an kaihmi pawl 15 hrawng an si zo. Mipi in AA harsatnak an pe ih an kai sipei maw timi cu felfai in kan thei hrih lo. Asinan, felfai zetih kan theihmi cu kaihmi zaten lo hnatuan ,Politics ih tel lo, daiten ummen hlir an si.

“AA khal dothlengnak ralkap an si tikah kaihmi cu an nei ko ding,Asinan kaihmi pawl cu thuhla an suhfel hnuah thlah zalen sal men ding an si. Cuti siloin reipi an kai ih, an kol ringring ahcun miphun khat le khat buainak thlentertu khal a si thei. Thusuh duh an nei a si ahcun an sut dingih thu an suh theh cun thlahsal men ding an si,” tin a sim.

Tamu Le Mohre Ramri An khar – Tamu ih India rammi pahnih thah an si hnuah Tamu le Mohre ramri cu duhduh feh theih nawn loin an khar hrih ih, khatlam khatlam in kiltu an um tin a kiangih um pawl cun an sim.

India rammi pahnih cu July 5 ah Tamu khawpi sungah thah an si ih, an ruang khal India lamah kuat loin ralhrang pawlin an urkang. India lamin ruang an ngah lo ruangah an thinheng tukih ramri ih ralhrang Check gate khal an urkang zo.

India rammi pahnih cu Pyu Saw Htee pawl ih thahmi an si tin PDF cun thu an suah ih, mipi khalin Pyu Saw Htee pawl ih thahmi an si an ti ve. Asinan, ralhrang pawl cun PDF pawl ih thahmi tin PDF pawl an rak puh ve.

Tamu ramri ih ttum India Commando pawl khal ramri ah umhmun khuar in mipi an kil ih, india rammi pahnih thihnak thubuai cu rampi aiawh palai veve in an rel rero lai tin mipi cun an sim.

Tamu ih um pakhat cun ‘Tu cun kan sumhawlnak a pit hrih siko. Mohre lamah thil kan zuar thei nawn lo ih, duhduh in kan va lut ngam nawn lo. Kannih hnakin seherh umsawn cu Myanmar ram buainak ruangah Mohre ih tlan Myanmar mi pawl an si. Duh vekin an suak ngam nawn lo ih, India mipi tih ah an relh rero.

“Ralhrang cun CDM tuah ruangah Mohre lamih um siseh Mohre bazar ih thilzuar theu pawl an hmu thei lo ih, cupawl harsatnak pek hrim an duh ruangah Inda rammi that dingin an kuthnuai Pyu Saw Htee pawl an fial hrim siko ding. Tutiang ahcun ramri boruak a tha thei hrih lo a si,” tin a sim.

Thuamhnaw Tthi Ting 2 Tlun Hna Nei Loin An Um – Ralhrang ralkap in rampi thuneihnak an lak hnuah Myanmar ramsungih thuanhnaw thi mipum ting 2 le thawng 20 pawl cu hna nei loin an um.

Hnatuan nei lo thuamhnaw thi lakin mipum ting 1 le thawng 80 tlun cu nunau an si ih, ting 2 hrawng cu mipa an si. Hnatuan nei lo hrekkhat pawl cu khua lamah an tlungih a umum tuan khal an um nan, hrekkhat nunau pawl cu taksa zuar in khawpi lamah an um cih.

Covid 19 natnak ruangah Myanmar ramsungih thuamhnaw thi company pawl cu an company an rak khar ciamco ih, ralhrang ralkap in rampi thuneihnak an lak hnu ahcun company ongsal ngam nawn lo an tam. Hrekkhat company pawl cu an bang lanta ih, hrekkhat cu boruak zir in dingsal tum khal an um.

Tuanvo neitu cun “Ralhrang in rampi thuneihnak an lak hnuah anmah dinpi lotu pawlkom cu an thiatbal hluahhlo ih, Myanmar Worker pawlkom khal ralhrang in an rak thiat. Cumi ruangah hnatuan nei lo bawmtu pawl khal an um nawn lo a si,” tin a sim.

Khuami 37 An Hlo – Ralhrang ralkap in rampi thuneihnak an lak hnuah Sagaing ramthen sungah doawknak a sosang tukih, doawknak ruangah khua tamzet cu khua ah um ngam loin an tlan.

Khua suahsan ih tlan lakin hrekkhat cu ralhrang ih kaihmi an um ih, hrekkhat cu an umnak theih nawn lomi khal an um. Tuini tiang Sagaing ramthen sungin Depayin le Ye Oo myone lawngah khuami 37 pawl cu khawiah an um, ziang an tuah timi an thuhla thei loin an hlo.

Mihlo pawl theitawk ih buaipitu mibawmtu pawlkom hotu cun “Ye Oo myone le Depayin myone sungin mihlo 37 an um zo. Ralhrang in meithal ih an kah ngahmi hriamhma ngah 26 khal kan tuamhlawm rero lai. Mihlo pawl cu khawiah an um, ziang an tuah, ralhrang in an kai sipei maw tivek tiang an thuhla theih a silo. ralhrang pawl ruangah khua suahsan ih tlan an si ih, an tlannak ah an hloh cih thluh a si,” tin a sim.

Sagaing ramthen sungah ralhrang cun a bur in mipi thahmi an nei hnuaihni zo ih, tuitum ih mihlo 37 pawl khal ralhrang in an kai ih, thupten an that sipei maw titu khal an um. Asinan, fiahnak zianghman an um hrih lo ruangah mihlo pawl cu theitawk in an thuhla an zingzoi peh rero hrih.

Mungzua Le Mandalay Karlak Ah Ralhrang 13 An Thi – Sagaing ramthen Mungzua le Mandalay karlak ih umhmun thar khuar ralhrang pawl cu Myaung Revolution Army in bomb puah in an do ih, ralhrang 13 an thi tin thu an suah.

July 8 zinglam nazi 6 hrawngah ralhrang mipum 30 hrawng cu mawtaw 3 in Mungzua le Mandalay karlak ah an feh ih, Sagaing in Mungzua an feh lam ah Myaung Revolution Army in bomb puah in an rak kap.

Cumi hnuah ralhrang pawl cu an mawtaw retin ke in an feh ih, MRA cun paditar bomb in an rak puah bet tikah ralhrang 5 an thi. Ralhrang nungdam pawl cun duhtawk in kiangkap an kap ciamco nan, MRA lamin bomb an kam ciami an puah bet tikah ralhrang 8 an thi bet tin thu an suah.

Ralhrang ralkap nungdam lai pawl cu Guipin khua tlawnginn sungah an lutih, an zaten mipum 17 lawng an si zo tin mit hmutu khuami pawlin an sim ve. Cumi ruangah mipi ralkap lamin doawknak ah ralhrang 13 an thi an timi cu a dik rori ko ding tin khuami pawl khalin an sim ve.

Neta ah ralhrang mawtaw pakhat cu Guipin khua tlawnginn ah an thleng betih hmundang ih ra ralhrang pawl an si.

Japan Prime Minister Hlun A Thi – July 8 zingah meithal ih an kahmi Japan Prime Minister hlun Abe cu sizung ah theitawk in tuamhlawm rero a sinan, a hriamhma tuar loin sizung ah a nunnak a cemfel zo.

PM hlun Abe cu Japan tlangsuak upa hrilnak hrang mipi hmaiah thusim a si ih, thu a simlai ah mi pakhat cun meithal in a kap ih, a hriamhma tuarsuak loin sizung ah a nunnak a cem. Abe cu 2006 kum ah Japan PM a rak tuan ih,damlonak ruangah reilote sung a cawl lawk nan, 2012 kum in 2020 tiang Japan PM a tuansal. Japan thuanthu ah Prime Minister nauhak bik le tuan reibik hminsin neitu a si.

Zinglam nazi 11:30 hrawngah thu a simlai mi pakhat in a kap ih, sizung ah zamrang zetin fehpi le tuamhlawm a sinan, zanlam nazi 5 ah a nunnak a cem. Abe kaptu Tetsuya ( kum 41 ) khal an kai zo ih, keimah in ka kap ko tin a phuang aw.

Tetsuya cun “Ka duhthu a sam zo ih, that dingin ka kap. Culo thudang zianghman a um lo. Ka duhthusam lo ruangah that ka si,” tin a phuang aw. Abe a kah hnuah Tetsuya khal tlan a tum nan, kilhimtu pawlin an kai ngah.