AA In Chin Ralkap An Kap – Bangladesh ram ah ramkulh uknak ngah dingin Chinmi pawl an zuam rero ih, Kuki-Chin National Army an dingsuak. Kuki Chin Army pawl cu Arakan Army (AA) le Bangladesh ralkap in November 19 ihsin an kap tin’ Bangladesh ih um Chinmi pawl cun an sim.
Mizoram ih um Bawm Students’ Association MBSA cun “Bangladesh ih um Chinmi hnam 6 cun Bangladesh ah Chin State a hran ih nei dingin an dilnak a rei zo. Cucu, pilepu san ih an ram rori ah nautat hmuhsuam an ton ruangah a si. A thok ahcun a relten rel dingah Kuki Chin pawlkom KNDO din a si ih, KNDO cun Bangladesh cozah an be rero. Asinan, Bangladesh cozah cun chinmi pawl ih dilnak ziangah an siar lo ih, an ngaihsak lo. Curuangah zalennak le ram nei ve dingin Kuki Chin Army din a si.
“Kuki Chin Army din a si hnuin Chin ralkap pawl cun Bangladesh ih Chinram humhim vivo dingin theitawk an suah. Cuveten Bangladesh cozah cu hnam malte le miphun malte hmuhsuam zongin an cangvai ciamco ih, chinmi pawl a phunphun in harsatnak an pe. Hivekin Bangladesh ih chinmi pawlin ram nei dingih an zuam reronak ah hnamdang cun a phunphun in Chinmi pawl harsatnak an rak pe ve. Curuangah kahawknak a thlengih, Bangladesh ih chinmi pawl cu dinhmun harsa zetah an um.
“Bangladesh Army pawl cun Chinmi hrimhrim cu bazar ah thil lei an siasng lo ih, tlawngkai khal an kham. Bangladesh ralkap pawl cun Chinmi pawl cu Biakinn ih khawm khal an siang lo. Curuangah Bangladesh ih um Chinmi pawl cu an tlan rero. Hivek lawmmam ih Bangladesh cozah cangvaihnak cu kan mawhthluk tuk lawlaw. Kuki Chin Army pawl cun Arakan Army AA pawl tuanpi an tum nan, Bangladesh ralkap cun AA pawl remnak an rak tuahpi thup ih, AA le Bangladesh ralkap cun Kuki Chin Army pawl an kap. Kan unau AA in hivek an tuah duh men cu poi kan tituk lawlaw.
“Tu ahcun Parva le a kiangkap ah Bangladesh ih chin raltlan pawl an ra lut rero zo ih lamzin tlunah hrantang khal an um. Harsa zet an si ih, buainak phunphun an tuar. Bangladesh cozah in kan unau chinmi pawl a tuah dan cu minung le minung nautatawknak tin kan ruat. Bangladesh ih kan unau pawl tuarnak hi kan tuarpi tukih zokhalin theitawkin rak bawm cio uh. Mizoram cozah khalin tan in lakpi vivo dingin kan dil duh a si,” tin ca an suah.
Mizoram Students’ Union MSU cun “November 20,2022 ah Arakan Army AA cun Bangladesh army pawl an tuanpi ih Kuki Chin Army pawl an kap. Cumi ruangah Bangladesh ih um unau chinmi pawl cu hmunhim panin an tlan ciamco. Asinan, lamlak ah ramri ralkap le AA cun raltlan mipi khal an rak kham. Raltlan lakah kum upa le nauhak tampi khal an tel. Hivekin kan unau chinmi raltlan pawl zangfahnak nei lo ih tuahtu AA le Bangladesh Army cu kannih MZU cun kan mawhhtluk lawlaw. Bangladesh ih harsa tuar kan unau pawlin buainak zianghman nei loin Mizoram an thlen theinak dingah zohman rak hnaihnok hram hlah uh. Bangladesh ih harsa tuar kan unau pawl an him theinak dingah Mizoram cozah khalin a rang thei bikin tanla dingah kan phut a si,” tin ca an suah ve.
Bangladesh ih um Chinmi pawl cu a hranten ramkulh uknak ngah dingin Bangladesh cozah an dawr rero nan, Bangladesh cozah in ziangih an siar lo ruangah Bangladesh ih um Chinmi pawl cun ralthuam an kai ve ih, Kuki Chin National Army tin hmin an pe aw. Ralthuam an kaih hnu ahcun Bangladesh ralkap pawlin an kap ih, cumi ruangah Bangladesh ih um Chinmi pawl cu khua ah um ngam loin an tlan. Mizoram lamih tlan an tum tikah Bangladesh Army le Arakan Army cun lamzin ah an rak kham ih, AA le Bangladesh army cun Kuki Chin Army pawl an kap. Himi thu ah AA lam cun thusuah an nei hrih lo.
C.Ronaldo Le Man United An Then Aw – Leitlun bawhlung sit thiam an rel tinten a hming lang ringring thlang ding C.Ronaldo khal a kum a upat vivo bangin club thawn buainak neuhneuh an nei ih, November 22 zan ahcun C.Ronaldo le Man United kan then aw fel tin Manchester United club cun thu an suah.
C.Ronaldo khalin Man United thawn an thenawk fel thu a mipi pawl a rak simthei cih ve. Kaphnih casuahmi zoh tikah Kaphnih lungkim in C.Ronaldo ih contract an tawpter. Curuangah C.Ronaldo cu Man United player a sisawn lo ih, Man United in hlawh a pe nawn lo ding. Tu ahcun C.Ronaldo in club a nei lo ih, thlatang leiawk caan ah a lakin a duhmi club le amah duhtu club ah a lut thei ding.
C.Ronaldo le Man United buainak hi tui kum Season thok hlan ihsin hram a rak thok zo. Man United in Champions League an lek thei lo tikah C.Ronaldo cun Champions league lek thei team zoh a duh ih, club thar a hawl nan, club thar thawn remawknak felfai nei man loin bawhlung sitthiam pawl leiawk caan a rak cem. Cutikah C.Ronaldo khal phur lo zet cingin Man United ah a um peh. Man United ih a um peh hnu khalah ka fa a damlo tin Man United timtuahnak puai pawl ah a rak tel lo.
Tui season club bawhlung sit zuamawknak pawl lek thok a si ih, Man United Coach Ten Hag cun C.Ronaldo cu hmang tha duh loin thelhbawh tivek ah a toter men. Cutikah C.Ronaldo khal an coach parah a lungawi lo ih, puai cem hlan a suak, thelhbawh in luhter a si tikah caan a um nawn lo ti ih luh paih nawn lo tiang a nei. Cutin Man United coach le C.Ronaldo karlak ah buainak neuhneuh a um ih, Man United player lakin ram hrang lek dingih kawhmi pawl cu World cup lek dingah thlah an si.
World Cup lek dingih an fehsuak hnuah C.Ronaldo cun Interview a nei ih, cumi ahcun Man United parih a lungawilonak thu pawl a relsuak thluh. Man United in Coach lakluh an thiam lo, hmailam pan tumnak an nei lo, an thangso lo. Man City ah lut thei ka sinan, Man United sawn ah ka lut cingin zah ka silo. Coach Ten Hag in i zah lo vekin keikhal in ka zah lo ih, ka upat lo tin C.Ronaldo cun Man United thuhla a rel.
Cuveten Man United club hruaitu pawl meeting an nei hngal ih, C.Ronaldo ih contract titawp dingin thu an relcat. Cucu, C.Ronaldo khalin a rak cohlang ve ih, khaphnih lungkimnak in khat le khat thathen aw an si. Ziang club ah C.Ronaldo a lut ding timi cu theih a si hrih lo ih, tuhrih ahcun C.Ronaldo lalut duhtu club ah PSG le Chelsea an langsar. World cup theh hnu lamah C.Ronaldo cun a luhnak ding club tifel a tum. PSG ah C.Ronaldo a lut pang asile club pakhat ah Messi le C.Ronaldo kan hmu thei ding.
C.Ronaldo le Man United an thenawk hnuah Man United neitu cun Man United zuar a sian thu mipi theihternak an nei hngal ih, tuhrih tiang ahcun Man United lei dingih dawrtu an um hrih lo.
Champion Lai France In Nehnak An Co – 2022 FIFA World Cup group puai pawl lek peh rero a si ih, November 23 zing khalah group D puai hrang France le Australia an lek.
Puai an thok hnu minute 9 ah Australia lamin goal hmaihruai an thun ih, an phur tuk nan minute 27 ah France lamin an sit goal ve. Australia lam an remawk man hlan minute 32 ah France hrang Giroud cun goal a thun betih 2-1 ah caan hrek an cawl. Caan hrek neta sawn an thok hnu minute 68 ah Mbappe cun France hrang a sit goal ih, minute 71 ah Giroud cun France hrang a sit goal bet. Hitin France cun 4-1 in Australia an neh ih caan a cem.
Group D puai ah France in hmat 3 thawn hmai an hruai ih, Tunisa hmat 1, Denmark hmat 1, Australia hmat nei hrih lo tin an um. Frane hrang goal 2 thuntu Giroud cu Frane ram hrang goal 51 a thun thlangih France ram hrang sit goal tambik sinak cu Henry thawn an ttawm aw. Giroud in World cup ah goal dang a thun bet asile France ram hrangih sit goal tambik hminsin thar a tuah ding. Tuizan ih lek ding pawl le puai dang result cu zinglam thuthang ah kan phuang zo.
Leave a Reply