Bangladesh In Myanmar Palai Nun An Sim

CNDF In Palik Zirhnak An Neih – Chin miphun humhimtu CNDF cun avei khatnak hrang palik zirhnak an nei ih, tluangten an thehsuak zo thu mipi theihternak an nei.

Ralhrang ralkap in rampi thuneinak an lak hnuah Falam peng le kalay kabaw lamih Chin mipi humhim dingin rak dingsuak CNDF cun Commando zirhnak cu an rak nei rero zo nan, tuitum ah avei khatnak hrang palik zirhnak an pe ih, Falam peng ah mipi palik an um thok thlang ding.

CNDF cun “CNO ih kaihhruainak in CNDF ih zirnak hmunah avei khatnak palik zirnak cu August 22 in September 3 tiang neih a si. Palik zirnak ahcun mipum 71 hnenah zung ih cangvaihnak ding, daan le thubuai tawlrel dan ding tivek pawl zirh an si. CNDF hnuai ih palik zir theh pawl cu Falam peng CNDF hmunram sungah mipi palik dinhmun in hna an tuan thlang ding a si,” tin thu an suah.

Bangladesh In Myanmar Palai Nun An Sim – A tufang Rakhine ramkulh sung le Bangladesh ramri ah ralhrang ralkap le AA doawknak a sosang tukih, kan dungah AA cun Bangladesh ramri kiangih ralhrang sakhan pakhat an rak lak sak zo.

Bangladesh ramri ih ralhrang le AA doawknak a sosan tikah ralhrang cun ramri lanin Bangladesh lamah ralthuampi an rak kapsuak ngah pangih, ralhrang vanzam khal Bangladesh ramri sung lanin an zam sual theu. Hivek ruangah Bangladesh lam an thinheng tuk thlangih, zarh khat sungah Myanmar palai veithum an ko zo ih, nun an sim.

September 3 ah ralhrang pawlih kahsuakmi ralthuampi cu Bangladesh lamah a tla ih, Bangladesh lam cun zamrangten Myanmar palai an ko hngalih, thu an sut. August 28 khalah ralhrang kahsuakmi ralthuampi cu Bangladesh lamah a rak tla zo ih, Bangladesh cun ralhrang palai an rak ko zo thotho. Tuitum ah Bangladesh cun ralhrang palai cu Bangladesh lamah ralthuampi tlater nawn lo dingin, ralhrang vanzam Bangladesh lamah zamter nawn lo dingin an theihter ih, neta ah a thlengsal pang asile a tul vekih an cangvaih ding thu an rak simthei.

Bangladesh ramdang palai kabir cun “kan ramih ralthuampi veihnih a tlak thu ah ralhrang palai kan rak ko zo ih, tuitum ah ralhrang vanzam cu ramri lanin kan lamah a zam. Hivek ruangah Myanmar palai kan kosal. Hivekih ralhrang pawl cangvaih dan cu kan mawhthluk tuk rori ih, neta ah thleng nawn lo dingin kan duh a si,” tin a sim.