Ralhrang ralkap cun June 2 in ramsung hmun tinkim ah tlawng an phuan ih, Chin ramkulh myone 9 lakin myone 7 khalah ralhrang ralkap cun tlawng an phuan thu an than.
Chin ramkulh sungih ralhrang tlawng phuanmi ah Mindat khal a tel ve ih, Mindat CDF cun ralhrang phuanmi tlawngah tlangkai lo dingin mipi le tlawngta pawl an theihter.
Mindat CDF cun ” SAC ralhrang in dik lo zetin rampi thuneihnak a lak tikah cozah hnaṭuan pawl CDM tuah dingin kan rak sim ih,ralhrang hnuai ih hnatuan cu hremnak kan pek ding thu kan rak than rero zo. Asinan, thenkhat cu ralhrang thawn hnatuan tlang kan hmu ih, tui kum hrang tlawng an phuan.
“Kannih CDF Mindat cun ralhrang thawn tuantlang pawl cu hremnak pe loin ralrinnak lawng kan pe rero men ih, cuvek a si tikah thenkhat pawl cu ralrinpeknak ngaihsak loin ralhrang thawn an tuantlang peh.
“Curuangah, tu ihsin ralhran thawn tuantlang pawl cu a takin Mindat CDF in hremnak kan pe thlang dingih, ralhrang hnuai ih zirhtu hnatuan pawl cu naa zetin hremnak kan pe ding. Mipi khal ralhrang phuanmi tlawngah fale tlawngkaiter lo dingin kan lo simthei duh ih, cumi kan lo simtheihmi lung loin ralhrang hnuaiah nan fale pawl tlawng nan kaiter thotho asile siatnak a thlen tikah kannih CDF Mindat cun tuanvo kan la lo ding a si,” tin thu an suah.
Ralhrang In Chinpa An That – Ralhrang cun Chin ramkulh, Kanpetlet ih um Ki Tam ( kum 29 ) cu a nau thitumnak hrangah Saw peng ah vok a va hawl ih a tlunlam Kanpetlet check-gate ah ralhrang pawlin an kai.
Ralhrang pawlin a phone sungah CDF ralkap pawl ih zuk a um tin an kai ih hmuan sungah an kap that.
Khuami pakhat cun, “Pu Ki Tam cu Kanpetlet check-gate ah ralhrang pawlin an kai. A phone sungah CDF ralkap zuk an hmuh ruangah an kai ih an kap that. Tutiang a innsang pawlin a ruak khal an ngah hrih lo” tin a sim.
Ralhrang in Pu Ki Tam an kai timi an theih veten a innsang pawlin an zingzoi hngal ih, ralbawi an suh tikah Pu Ki Tam cu an kap that zo. A ruak khal an phum zo tin an rak sim. Pu Ki Tam cu Mindat khuasuak a si ih a nupi le fanau pahnih thawn Kanpetlet khua ah hmuan tuah in um an si.
PDF In Ralhrang 6 A Thihcilh – Mandanlay ramthen, Singu peng le Mataya peng ih mipi ralkap sakhan cu June 3 ah SAC ralhrang in lamzin 4 in an luhcilh.
Ralhrang pawl mipi Sakhan an thlen hlanah ralthuampi le meithal in mipi sakhan umnak cu an kap ciamco ih mipi ralkap lam cu ralthuam le mipum thazang in an daihawk lo ruangah dung an sip.
Ralhrang pawlin PDF sakhan an luhcilh laiah PDF ralkap pakhat Zero Two (02) timi cu sakhan ah hriamtuar in a tang. PDF hriam ngah cun Bomb pahnih a keng ih a rualpi pawl sakhan suahsan dingin a auh ciamco hai.
PDF ralkap Zero Two (02) cun a kenmi bomb hmangin ralhrang pawl a rak puah ih ralhrang 6 hnakih mallo a thihcilh. Miraltha PDF pakhat ruangah midang pawl cu an rak tlansuak man ih,zohman tuahmawh aw um loin an him.
Cumi hnuah ralhrang pawl an kirsal ih, lamzin ah PDF pawl in mine an rak kam. PDF kammi mine puak ahcun ralhrang tam zet an thi tin PDF cun thu an suah.
Singu PDF hotu cun “Mina phur motor cu tu le tu an feh leuhleuh ih, motor parah thisen a li hnenhnen. Cumiruangah ralhrang tam zet an thi ding tin kan ruat. Kan rualpi miraltha pakhat ruangah kannih midang pawl him thei kan si ih, upatnak kan pe a si,” tin a sim.
Ralhrang In Palik 10 An Kai – Makui ramthen Makui myomah palik zungih palik hnatuan pawl cu ralkap thawn an buai hnuah ralhrang pawlin an kai ih, thu an sut rero lai tin thuhla theitu pawl cun an sim.
Magui ih vanzam ralkap pakhat cu May 31 ah Makui palik sakhan ah a feh ih, palik bawi thawn an buai. Cumi ruangah palik pawl cun vanzam ralkap pakhat cu an bor ih,an kai. Cuvek thu an theih veten vanzam ralkap bawi le a kuthnuai cu palik sakhan ah an feh cih ih, an ralkap an va tlen.
Palik pawl ih kaihmi ralkap cu a kut an khit ih, a kut khihnak an phelh veten a thinheng dai thei lo cun a hmai ih palik bawi to a thong hngal. Cumi ruangah palik pawl cun vanzam ralkap cu an bor ciamco ih,kut an thlak bet. Hivek in palik le ralhrang an buainak cu an lakin mipi lamtang pawl cun mipi media an pe ih an darh thluh.
Hivek ruangah Makui palik sakhan in palik 10 tlun cu ralhrang pawlin an kai ih, thuhla an sut rero hrih. Thuhla an suhmi cu ziangruangah ralkap thawn nan buai tilam si loin zosi nan lakah mipi lamtang timi sawn a si.
Khuami pakhat cun “Makui palik sakhan in palik 10 tlun cu ralhrang pawlin an kai ih, thuhla an sutfiang rero lai. An kaihnak sanbik cu ralhrang thawn an sualawk ruangah siloin palik lamah mipi lamtang an um rori ding tin ralhrang pawl cun an ruat. Cumi kai ngah tumin palik 10 tlun kai an si,” tin a sim.
Leave a Reply