CDF Paletwa In AA Thawn An Karlak Thu An Relfiang

CDF Paletwa In AA Thawn An Karlak Thu An Relfiang – CDF Paletwa le AA an buai , an karlak boruak a tha lo tin mipi thenkhat cun thu an rak suah ih, cumi thuhla thawn pehparaw in CDf Paletwa cun simfiangnak an nei cih.

CDF Paletwa cun “CDF Paletwa pawl AA hnenah raldo zirnak an nei tin thlahtu nan um. Thenkhat cun Paletwa peng sung Tan Htaung myoneah CDF Paletwa le AA an buaia, an karlak boruak a tha lo tin an rak thlah ve.

“Kannih CDF Paletawa hi CJDC sungtel kan si ruangah raldo zirnak ding hmunah kan buai lo ih, AA hnenah raldo kan zir dah lo. Paletwa peng sung khalah AA thawn buainak kan nei lo. Dothlengnak ih tel pawlkom veve kan si. Curuangah, CDF Paletwa ih thuhla duhduh in rak than hram hlah uh.

“Chin ramkulh Paletwa peng hi NUG cozah, ralhrang le AA pawl khalah hmun thupi tuk a si. India in kaladan tiva thawn pehparaw in sumdawnak tuah ciamco an tummi le Paletwa peng sung khal a tel. Curuagnah kaladan hmang tiva tluanih thuneihnak neitu cu India thawn thaten an pehtlaih aw thei phah ding. India lawng siloin China khal an pehtlaih thei.

‘Curuangah Paletwa peng hi hmun poimawh tuk a si ih, in bawm hram uh. Paletwa uk theitu cun duhtawkin India an lekpi thei ding tlunah China khal an merh phah ding. Hivek caan ah mipi ih buainak tongtu men an si,” tin thu an suah.

Yangon Ah Mi Pakhat A Dawp That – Yangon ramthen Tharkitah myone kamakyi lilawnpi ah mi pakhat a dawp that ih, thuthang kan phuan tiang a ruang an hmu hrih lo.

September 14, zinglam nazi 10 hrawngah mi pakhat thirleng mawng cu lilawng parah a cawl ih, a kedam a phelh hnuah lilawn in tiva ah a dawp. A hnuah kedam le thirleng a tanmi lawng an hmu ih, a ruang cu an hmu thei hrih lo.

Ziangruangah Lilawn in a dawp that timi a san khal ca tantami a nei lo. Tufang ram buai le covid 19 natnak ruangah an harsa tuk beidong a that aw sipei maw? lole innsang buainak an nei sipei maw? A nupi thawn an buai sipei maw? tivek cu mipi thusuhnak a si.

Myanmar ram a buai hnuah mahte that aw an tam deuhdeuh ih, a tamsawn cu ei ding harsat tuk ruangah mahte that aw an um. Ram a buai tikah hna a vang, thilri man a kai ciamco ih, Yangon ah nikhat veikhat lawng rawl ei khal an um zo.

PDF In Misual Rapthlak An Kai – Sagaing ramthen Mungzua myone sungah duhduh in cangvai , mipi thilri ru, duhtawk in mipi that ih, nunau sualpitu suamhmang pawlkom sungtel pakhat cu Mungzua PDF in an kai ngah ih, thu an suh tikah an cangvaihnak pawl a relsuak thluh.

PDF pawlih kaihmi suamhmang Nyin Chan Oo cun “Ralhrang in rampi thuneihnak an lak hnuah kannih cu khawilam khawilam khalah tang cuang loin suamhmang pawlkom kan rak ding ve. Tutiang ah mi 34 kan that zo ih, nunau 24 kan sualpi zo. Kan sualpimi nunau 24 lakah nunau 13 pawl cu kan sualpi hnuah kan that cih. Inn 10 kan luhcilh zo ih, mipi thilri kan rukmi le kan lonmi zaten ting 650 kyats hrawng a si zo ding. Bike 65 kan ru zo ih, sui thilri 23 kan laksak zo,” tin a phuang aw.

Munguza pDF cun “Suamhmang sungtel kan kaihmi Nyin Chan Oo cu rittheihsi a ngai tuk ruangah a thi zo. Nyin Chan Oo ih phuanawk dan vekin suamhmang pawlkom hotu Zaw Oo khal a umnak Mungzua khawpi Zungkyi vengah kai dingin kan pan ih, in rak kah ruangah kannih khalin a hmunah kan kap that lawlaw,” tin thu an suah.

Suamhmang pawlkom ah mi ziangzat ciah an um timi felfai in theih a si lo ih, PDF kaihmi Nyin Chan Oo cu rittheihsi ngai tukin a thih zo. Suamhmang pawlkom hotu Zaw Oo khal amah kaitumtu PDF pawl a rak kah ruangah a umnak hmunah PDF pawlin an kap that lalaw zo.

Myanmar ram a buai hnuah mipi lamtang silo, ralhrang lamtang khal si cuang lo suamhmang le rukru pawlkom hrimhrim an rak um ve ih, ralthuam an neih ruangah ralthuam le hriamhrei kengin mipi an suah, mipi thilri an ru theu. Suamhmang le rukru pawlkom cu Mungzua myone sungah an tam ngaingai tin an sim.

S.Korea In N.Korea Ralrinnak An Pe – N.Korea in kan himnak hrang a si ahcun a tul asile Nuclear bomb khal kan hmang men ding tin thu an suahmi ah S.Korea cun N.Korea ralrinnak an pe cih ih, Nuclear bomb nan hmang asile nanmai thlankhur ding nanmah ten nan lai tinak men a si ding tin an theihter.

Kan dungah N.Korea cun a tul a si ahcun Nuclear ralthuam hman theihnak an neih thu leitlun an rak theihter. Cucu, S.Korea lamin tha an tilo tukih N.Korea hnneah hro nan suang rero asile US thawn kan tuantlangnak a tha sinsin ding tin an theihter.

S.Korea le N.Korea an thenawk hnuah US cun nasaten S.Korea an dinpi ih, ziangkimah an somdawl. Tui kum kan sung thla khalah S.Korea le US cun raldo zirtlangnak an rak nei.

S.Korea humhimnak vuanci zung cun “N.Korea in atthlakza daan thu an suah. Hivek cu zawi hrang khalah a tha lomi a si ih, N.Korea in an thihnak ding lamzin an hawl rero in a lang. Hivek in N.Korea lam hro an suang vivo asile kannih khal US thawn kan tuantlangnak a tha sinsin dingih, N.Korea hmailam a pit vivo sawn ding a si,” tin an theihter.

Be the first to comment

Leave a Reply

Your email address will not be published.


*