Ralhrang ralkap in rampi thuneihnak an lak hnuah Chin ramkulh sungin dothlengnak ralthuamkai tampi an suak ih, ralhrang do loin mah le mah buai khal tampi an rak um ve.
Tu khalah CDF Zotung pawl cu anmah sung remawklonak ruangah pawlkom pahnih ah an thekdarh aw ih, ralthuam le sumpai an cuh aw rero. Neta bik thusuak dan vek asile ralthuam an cuhawk ruangah anmah le mah nasa ten do aw thei dinhmun ah an um. An hmin cu CDF Zotung in an feh veve nan, pakhat sawn in Supreme Council an hmang.
CDF Zotung Supreme Council sawn cun “Ro Thang Ling, Pa Bawi, Aa Bawi , Moses ,Benjamin le William tei pawlih hohami mipum 40 hrawng umnak Zotung CDF hmin thotho cun 23 Feb, 2022 ah CDF-Zotung, ZOtung Organization (Supreme Council) bylaw an thiat.
23 Feb, 2022 ah CDF-Zotung, Zotung Organization (Supreme Council) in Offical zetin Commander-in-chief kan retmi cu a sinak in an hlon thu an suah.
CDF-Zotung, Zotung Organization (Supreme Council) hrang NGO ih bomnak sumpai ting 50 cu CDF-Zotung hmin in an suah ih CDF-Zotung, ZOtung Organization (Supreme Council) hnenah ap loin tuni tiang cazin an tifel lo.
26 Sep, 2021 laiah Ro Thong Ling cu CDF-Zotung, Zotung Organization (Supreme Council) aiawh in CJDC palai ah hril a si ih CJDC hnatuanmi pawl CDF-Zotung, Zotung Organization (Supreme Council) hnenah simthannak zianghman a neih lo ruangah 17/01/2022 ah CJDC palai a sinak hlulihsal Asinan amai’ thuten CJDC a pehtlai thotho ih a thupten CDF-Zotung palai vekin tuni tiang a um.
Ralthuam ka lei ding tin Ro Thang Ling cun ting 1500 a suah ih ralthuam a lei lo tlunah sumpai cazin khal a hmuh thei lo. 2022, June 10 ah CDF-Zotung, Zotung Organization (Supreme Council) ih tatyin pakhat an do ih,ralhtuam an cuh. Thisen thawn thukamnak a tuahpmi pawl phatsan in Gangaw-PDF an va kom ih CDF-Zotung, Zotung Organization (Supreme Council) tatyin pakhatnak in do ih, ralthuam tam zet a la.
Zotung khua pawl ah feh in CDF-Zotung, Zotung Organization (Supreme Council) cu zohman zum lo dingin khuami pawl a bum ih an kokhawm hai. Cumi ahcun khuami pawl hnenin Inn khatah Ks. 5000 ciar an dil. CDF-Zotung, Zotung Organization (Supreme Council) ih fialnak tel loin Zotung ramsung ah check-gate an tuah ih motor le khualtlawng pawl sumpai an dil hnuah anmai hlawknak hrang an hmang.
Zotung hrinhnam le dothlengnak ah lungrualtlang dingin a lubik a simi CDF-Zotung, ZOtung Organization (Supreme Council) in vei tamzet thurelpinak kan nei nan, thungai duh loin CDF-Zotung, Zotung Organization (Supreme Council) sawn an ngiar ih, ngaithiam theih loin an cangvai. Cumi ruangah mi 45 pawl cu CDF Zotung sinak in kumkhua daih kan hlon.
Thusuah kan tuahhnu ni 14 sungah ralthuam an an lakmi pawl cu CDF-Zotung, Zotung Organization (Supreme Council) hnenah ap dingin kan theihter duh ih, an ap lo asile an parih thilthleng ziangkim ah tuanvo kan la lo ding a si,” tin thu an suah.
Ralhrang in rampi thuneihnak an lak hnuah Chin ramkulh sungin CNA le ZRA an do aw rero zo ih, CDF mara le Mara army khal an do aw zo. CNDF sungin Hualngo le Zanniat an suak ih, CDF Hakha khalin Senthang pawl an suak ve. Hitin, Chin ramkulh sung dothlengnak ralthuamkai lakah buainak a um hnuaihni thlang.
Leave a Reply