Chin miphun humhimtu CNDF cun Falam khawpi sungih ralhrang pawl lemcan dan mipi theihternak an nei ih, ralhrang pawl cun mipi ralkap le mipi hua aw dingin a phunphun an tawlrel tin an tarlang.
CNDF cun “Chin ramkulh Falam khawpi hrambun ralhrang pawl cun June 15 zan ah tlawnginn kiangah bomb an puah ih, mipi an thinphangter. Ralhrang in bomb an puahmi cu mipi ralkap le mipi hua aw haiseh tin lem an cang. Bomb puah tlunah ralhrang cun “Nan fale ruang nan lak duh lo asile tlawngkaiter hlah uh tin ca an tar bet.
“June 17 ,zan nazi 10 hrawng khalah Falam khawpi tlanglo vengih ah-htah-kah tlawng kiltu ralhrang pawl khal an mah le mah an kap aw ih,a hmunah ralhrang pakhat a thi tin kan thei. Ralhrang pawl cun mipi ralkap thawn kap aw vekin kiangkap an kap ciamco. Ralhrang in duhduh in meithal an kah ciamco ruangah mipi pakhat hriam ngah a um ih, inn pakhat khal ralthuampi in a tlaksiat ngah.
“June 19, zan nazi 10 hrawng khalah Falam khawpi ih ralhrang hmunpi cun ralthuampi vei 5 tluk an kap. Hivek in Falam khawpi sungah ralhrang pawl an cangvai ciamco cu mipi le mipi ralkap karlak ah huatawknak umseh tin lem an cang hrim. Kannih CNDF cu leitlun ralkap daan thlun kan si ih, tlawngta siseh tlawnginn khal kan siatsuah lo ding. Curuangah, Falam tlawnginn kiangih thilthleng khal kannih tuahmi a silo,” tin thu an suah.
ZRA In CDM Tlawng Saya/mah 3 An Hrem – Chin ramkulh Tedim peng sung Keizang khua le Muizawl khua ih tlawng saya/mah tuan CDM 3 pawl cu Zomi Army ZRA pawlin an kai ih, naa tukin an hrem.
Ralhrang ralkap in rampi thuneihnak an lak tikah Myanmar ramsung hmun tinkim in ralhrang uknak do a si ih, cozah hnatuan le zirhtu pawl cun CDM hmangin ralhrang an do. Chin ramkulh sung khalah CDM tuah tampi an um. CDM tuah zirhtu pawl cu ralhrang ih tlawng phuanmi hnuaiah tlawng an kai ve lo.
Tedim peng Keizang le Muizawl khua ih CDM tuah tlawng zirhtu 3 khal ralhrang hnuai ih tlawng an kai lo ruangah Zomi Army ZRA pawlin an kai ih , an hrem ciamco. CDM zirhtu 3 lakin pakhat cu ZRA pawlin an hrem naa tuk deuh ih, amah ten a vak thei lo, a to thei nawn lo tin khuami pawl cun an sim.
ZRA cun an hremmi CDM zirhtu pawl cu tlawng nan kai cuang lo ding asile ni 7 lawng caan kan lo pe, ni 7 sungah khua suahsan uh, Ni 7 sungah khua nan suahsan lo asile kan lo that thluh ding a si tin an hro bet.
ZRA cun ralhrang phuanmi tlawng cu NLD phuanmi tlawng thawn zianghman danglamnak a um lo, zirhmi ziangkim a bangaw thluh. Curuangah kum 2 sung tlawng cawl zo, kan fale pawl cu tlawngkaiter ding kan si tin thu an suah.
Hivekin ZRA in Tedim peng sungah CDM tuah an kai ih, an hrem ciamco tikah Tedim mipi lak khalah ZRA mawhthluktu tampi an um ve. ZRA cun Tedim le Tonzang peng sung cu kan ram a si, zohman ralthuamkai dang nan um thei lo tin thu an rak suah zo.
Hivek cingin Tedim le Tonzang peng sung ahcun dothlengnak ralkap PDF Zoland, CDM Siyin le CDF Tonzang pawl an um ih, ZRA cun PDF Zoland ih sakhan cu vei 2 rori an rak siatsak zo. ZRA in CDM zirhtu 3 an kai timi cu Tedim thuthang Phualva Lungtuak Media ih thlahmi a si ih, Muizawl khuami pawl khalin a dik ko tin an sim ve.
Leave a Reply