Chin Raltlan Hrang Mizoram Ah Lamzawhnak An Nei – Bangladesh ram sungih um Chinmi ( bawm ) pawl khal an ramsung buainak ruangah an khua ah an um ngam lo ih,mi tamzet Mizoram lamah an tlan rero zo.
Tu ahcun Bangladesh Chin raltlan pawl cu India ramri kil pawlin Mizoram sung luh an rak siang lo ih, Mizoram lamah lut thei loin ramri ah an hrantang. Ramri ih an hrantang ruangah Pastor pakhat khal a thih phah zo ih, raltlan tamzet mangbang vansang in an um. Bangladesh Chin raltlan pawl mangbang vansang ih an um cu Mizoram unau pawlin an zangfak tukih Mizoram luh siansak dingin ramri kil pawl nornak ah Mizoram mipi pawlin Bangladesh Chin raltlan hrang lamzawh duhphorhnak an nei.
Bangladesh Chin raltlan hrang lamzawh duhphorhnak cu Mizoram sungih mino pawlkom tumbik YMA in an hoha ih, hmun tinkim ah Bangladesh Chin raltlan hrang lamzawh duhphorhnak an nei.
YMA hotu Pu Hngaka cun “India ramri kil BSF pawlin kan unau Bangladesh chinmi pawl cu Mizoram sung luh an siang lo ih, ramri ah hrantang in an um. Kan dung khalah Bangladesh CHin raltlan lakin pastor pawkhat a rak thi zo. A san cu ramri ah reizet ei ding nei loin an um. Kan unau pawlin harsat an tuarmi cu kannih mizoram mipi in kan zoh men thei lo. Bangladesh Chin raltlan pawl Mizoram ih luh nan sian hlansung lamzawh duhphorhnak kan nei ding a si,” tin thucah a sim.
2022, November thla hrang ihsin Bangladesh ih um chin ralkap le Bangladesh ralkap an rak do aw thok. Bangladesh Chinmi pawl cun Bangladesh ih chinmi hrang ramthen pakhat an dil ve. Cucu, Bangladesh cozah in an pek sian lo ruangah Chinmi pawl cun ralthuam an kai ih, doawknak a suak. Tu khalah boruak a felfai thei hrih lo tin an sim.
Chin Hnenum Thattu Singapore Nufa Hremnak An Pe – Singapore ram ih Chin hnenum thattu Singapore nufa cu ralhrang in hremnak an pe veve.
Chinnu Paing Ngaih Don hi Singapore ah hnenum hnatuan in a rak um ve ih, kum 1 sung rori inntek tei nupa cun nasaten an rak hrem. Inntek nufa ih hremnak ruangah Paing Ngaih Don cu 2016 kum, July 26 ah a rak thi. A thok ahcun inntek nufa in an pha rero nan, an cangvaihnak pawl le an sulhnu pawl hmuh a si tikah an nufa in thubuai rak tuahsak an si.
Inntek nu GaiYathiri cu a hnenum a thah ruangah Singapore Court cun 2022, June 22 ah kum 30 sung thawngtla dingin hremnak an rak pe zo. Inntek pi Prema ( kum 64 ) sawn ih 2023, January 9 ah Court cun kum 14 sung thawngtla dingin hremnak an pe ve.
Paing Ngaih Don (Kum 24 ) hi fate pakhat ih nu a sinan, innsang harsat tuk ruangah Singapore rak feh a si ih, a ruang cu Chinram an khua ah a rak tlun thei.
Inntek tei nupa cun a phunphun in an hrem tlunah rawl khal an rak pe duh lo ih, a thih khalah a rihnak a rak tla thluh zo. Tu ahcun an hnenum hrem thattu Inntek tei nupa cu hramnak pekfel an si.
Kalay Ah Ralhrang Bomb An Puah – Sagaing ramthen Kalaymyo Tahan lamzin ah ralhrang pawl bomb puah an si ih ralhrang 3 hnakin mal lo thi an um ding tin Kalay PDF cun thu an suah.
Kalay PDF cun “January 9 zingah Kalaymyo Tahan le Varpi lamzin ih vakkual ralhrang ralkap pawl cu kannih Kalay PDF in zinglam nazi 7 hrawngah bomb kan kamciami hmangin bomb kan rak puah. Ralhrang pawl bomb kan puahmi ahcun ralhrang pathum hnakin mal lo an thi thei. Bomb puah tuar ralhrang ralkap pawl cun minute 10 sung kiangkap an kap ciamco.
“Zinglam nazi 11 hrawngah Tahan Wesley lamzin pengih um ralhrang pawl kan va kap ih,ralhrang ralkap thi an um thei nan, kan fiah thei lo. Kannih PDF pawl cu dung kan sip hngal. Ralhrang ralkap cun kiangkap an kap ciamco ih, mi pakhat an kap that. Ralhrang pawl ih kah thatmi sungte pawl cu kannih Kalay PDF in kan lo tuarpi tuk a si,” tin thu an suah.
Hmin Cazin La Ralhrang An Kap That – Tanintharyi ramthen Launglung myone ah ralhrang hrilawknak hrang hmin cazin latu ralhrang pawl cu Launglung pDF in an kap ih ,ralhrang pakhat a thi tin mipi an theihter.
Launglung PDF cun “January 9, zinglam nazi 11 hrawngah a si ih, ralhrang pawl cun tlawnginn ah mipi an komkhawm. Cumi hrang duty hnatuan ralhrang pakhat kan kap that ih, ralhrang dang pakhat hriamhma a ngah. Ralhrang thi ih meithal zunkhat le cerek kan laksak.
“Meithal a puak tikah mipi an tih zet nan, kannih cu kan hna kan rak theh zo. Zamrang zetin kan cangvai ih kan himnak hrang zamrangten dung kan sip. Neta ahcun ralhrang hmin cazin laknak hmunih feh mipi khal pakhat khat nan tong asile tuanvo kan la lo ding a si,” tin thu an suah.
Taiwan Ramri Ah China An Cangvai – Ram pahnih boruak tha thei hrih lo China le Taiwan thuhla khal reizet thawmvang nei loin an um hnuah China lam an cangval sal ih, Taiwan ramri ah ni 2 peh in raldo zirnak an nei.
China cun Taiwan Tipi kiangah ni 2 peh in raldo an zir ciamco ih,tlunzuang kahnak phunphun zohsinnak an nei. China raldonak vanzam 28 cu Taiwan tipi tlunah an zam phah rero ih, thiamthil pholangnak an nei.
A hlan khalah China cun Taiwan ramri ah raldo zirnak an rak nei hrim theu ih, Taiwan ramri an lan ahcun Taiwan lamin vanzam an rak thlah cih hngal theu. Tuitum ahcun Taiwan lam thawmvang an nei hrih lo. China cun kum tampi sung Taiwan an rak hel rero zo nan,tutiang cu a takin Taiwan an kap ngam hrih lo.
US le Japan cun China in Taiwan an kap asile Taiwan kan humhim hngal ding tin thu an rak suah rero zo ih, US cun ralthuam thathah khal Taiwan a leiter rero zo. Tuitum ah China lam cangvai in Taiwan ramri an pholang aw ih ziangtin an cangvai peh vivo dingti cu theih a silo.
Tawan hi mahten ram pakhat si duh fel, zalennak felfai duh an si ih, China cun kan ram in nan suak thei lo, ka thuneihnak hnuaiah um ringring ding nan si tin an kham ringring ve. Hivek ruangah ram pahnih caan reipi sung buai zo an si.
Leave a Reply