Chin Raltlan Hrang Ting 400 Hmang Zo Mizoram – Mizoram cozah cun an ram sungih beu Chin raltlan pawl hrang ting 414 rupee an hman zo thu an sim.
Mizoram sunglam vuanci cun “January 27 tiang hminsin kan tuah dan vek asile raltlan umnak hmunih um Chin raltlan pawl hi mipum 31508 an si. Chin raltlan lakah Myanmar ihsin ra mipum 31050 an um ih Bangladesh ihsin ral mipum 458 an um. Myanmar ihsin ra Chin raltlan pawl bomnak ah ting 384 rupee tlun kan hmang zo ih, Bangladesh ihsin ra chin raltlan pawl hrang ting 30 rupee kan hmang zo. Chin raltlan zate hrang sumpai kan hmanmi zaten ting 414 tlun a si.
“Chin raltlan pawl hrang sumpai kan hmannak pawl cu an umnak ih inn saknak, meisa peknak, tidai peknak, sivai hrang, eiin hrang le a dang tulsammi pawl hrang an si,” tin a sim.
Mizoram ahhin Chin raltlan thawng 40 tlun an um zo ti’n raltlan buaipitu pawl cun an sim ve ih, raltlan zaten raltlan umnak hmunih um lo, hmin cazin pe lo, sungkhat inn ih um le mahte innsang tivek khal an um ti’n an sim.
Min Aung Hlaing In Chin Mipi A Bum Tum – February 20 hi Chin phunpi ni a si bangin hmuntin ramtin ah Chin phunpi ni hman a si. Ramsung ahcun ralhrang ralkap ruangah hlunghlai zetin hman a um lo.
Chin phunpi ni ahcun ralhrang hotu Min Aung Hlaing khalin Chin mipi hrang thucah a nei ve ih, cumi ahcun Chinram thansohnak hrang 10 billion kan pe ti’n Chin mipi bum a tum.
Min Aung Hlaing cun “Rampi thansohnak dingah Billion 400 hmangsuak dingin kan um ih, cumi sungin Chin ramkulh thansohnak ding hrangah 10 biilion kan pe. Curuangah Chin ramkulh sungih um mipi nan zaten Chin ramkulh thansohnak hrangih kan pekmi sumpai a takih hmansuah a si theinak dingah rak zuampi ve hram uh. Chinram thangso sinsin dingih kan duh ruangah Tedim le Paletwa khal District kan pe zo. Chinram thansohnak dingih hnatuannak ziangkim ah chin mipi in theitawkin rak bawm cio uh,” tin Min Aung HLaing cun Chin phunpi ni thucah a nganmi ah a telh.
Chin ramkulh Hakha khawpi ahhin Chin phunpi ni lunghlai zetih tuah a um lo ih, ralhrang ruangah thlacam khawmnak khal an nei thei nawn lo. Asinan, ralhrnag cozah le an kuthuai pawlih hnatuan pawl cun anmahten Chin phunpi ni an hmang tin an sim.
Min Aung Hlaing in Chinram thansohnak hrang 10 Bilion kan pe a timi cu a takin hmuh ding a um lo ih, Chin miphum a bum tumnak men a si ti’n Chin ralkap pawl cun an sim.
Ralhrang In PDF Nei Aw Ding An That – Makui ramthen Yesakyo myone Tetaung khua ah nei aw ding PDF pahnih cu ralhrang pawlin an kaih hnuah an that ih an urkang ti’n Yesagkyo PDF cun thu an suah.
Yesagyo PDF cun “Zinglam nazi 6:45 hrawngah a si ih, ralhrang pawl cun Tetuang khua in mipi kaihmi khal an nei. Zinglam nazi 8:25 hrawngah ralhrang in Tetuang khua in pengkhat hla ih um Yesakyo PDF skhan pakhat an luhcilh. Ralhrang pawl an ra ti kan thei tikah bomb kan rak puah ih ralhrang pahnih an thih tlunah ralhrang 3 hriamhma an ngah.
“Ralhrang cun nupa si dingin nei aw zikte PDF pahnih an kai ngah ih an that cih. PDF pahnih cu February 18 ah nei aw ding an si ih, ralhrang pawl cun February 17 ah an that. An ruang khal an urkang. Ralhrang in kan sakhan an urkang tikah kan thilri tampi a kangral ih ting 300 hrawng kan hloh a si,” tin Yesakyo pDF cun thu an suah.
Linghnin Runsuahnak An Cawl – Turkey le Syria ram ih linghnin ruangah runsuah hna an tuan reromi cu February 19 in an cawlh thlang thu runsuah hnatuantu pawl cun an sim.
February 6 ah Turkey le Syria ah ling a rak hnin ih linghnin ruangah mithi ruang thawng 46 an hmu zo. Linghnin ruangah inn tamtuk a cim ih umnak ding nei lo tamtuk an um. Runsuah hna zarh hnih tluk an tuan hnuah nungdam an um nawn lo digah ruah a si ih, runsuah hna an duhtawk hrih. Cuti rualin linghnin ruangah inn cim le lamzin siat pawl cu thianfainak an nei peh ih ,remthat lam hram an thok thlang ding.
Linghnin ruangah ram pahnih in mipi ziangzat ciah an hlo timi felfaiten cazin an suah thei hrih lo. Tu ah runsuah hna an cawlhsan thlang nan, thianfainak an neih tikah mithi ruang an hmuh bet vivo an zum hrih. Tu ahcun linghnin ruangih tuartu pawl somdawknak lam theitawkin buaipi an tum thlang.
Leave a Reply