Chin ramkulh Thantlang in Mizoram ramri ih raltlan hrekkhat pawl cun zu in ding an neih lo ruangah zu aiah Hand Sanitizer an in tin buaipitu pawl cun an sim.
Ralhrang cun 2021, September thla in Thantlang khawpi an rak urkang thok ih, cumi ruangah Thantlang khawpi sungih mipi pawl cu Thantlang khawpi sungah um mgan loin an rak tlan thluh. Hrekkhat cu Mizoram sungih tlan a um bangin hrekkhat cu Chin ramkulh hmundang le Mizoram ramri ih tlan khal an um.
Mizoram ramri ih tlan pawl lakin zu atcilhtu hrekkhat pawl cu zuin ding an neih lo ruangah zu aiah Sanitizer an in ih, mi tamtuk an buai phah zo.
Chin Chin Thantlang cun “Zuin ding an neih lo ruangah kan tlangval pawlin Hand Sanitizer an in hi ziangtin kan kham ding? Caan a rei zet thlangih, thungai thlakin kan ruah tulmi a si. Culole an thih thluh ngaingai ding,” tin mipi a simthei.
Thantlang peng sung Mizoram ramri ih um raltlan pakhat cun “Tuikum 2022 kum thokin zu aiah Sanitizer an in thok. Hivek thuhla ka theih tikah ka mangbang tuk lawlaw. Zu aiah Sanitizer in mi 5 ka thei ih, midang khalin tampi an thei ve. Mi pakhat tla cu sanitizer a in ruangah pumna in a buai ih, a thik tete. Ka zum dan ahcun Sanitizer ah zu 70% a tel timi an ngan ruangah an in an siko ding.
“Mizoram lamah zu zuar an kham ih, kannih raltlan pawl umnak khalah zu suang le zuar an um lo. Cutikah zu lo ih um thei nawn lo, zu atcilhtu hrekkhat pawl cun zu aiah sanitizer an in. A rei cun thih phah khal an tam ding,” tin a sim.
Tamu Ah Ralhrang Le Pyu Saw Htee 8 An Thi – Sagaing ramthen Tamu myone Pantar khua ih umhmun khuar ralhrang ralkap le Pyu Saw Htee pawl cu Tamu PDF pawlin June 22 ah nazi 4 sung an do ih, ralhrang ralkap le Pyu Saw Htee komkhawm 8 an thi tin Tamu PDF lamin mipi an simthei.
Kalay le Tamu karlak ih um ralhrang ralkap le Pyu Saw Htee pawl cu Tamu PDF tatyin 4-nak le Special Task Force komkhawm in an do. Doawknak ah ralhrang le Pyu Saw Htee komkhawm 8 an thih tlunah ralhrang ralkap le Pyu Saw Htee komkhawm 15 hrawng hriam an ngah tin an sim.
Tamu PDF hotu cun “Pantar khua cu ralhrang dinpitu Pyu Saw Htee pawl tamnak khua a si. Zinglam nazi 11 in ralhrang ralkap le Pyu Saw Htee umkhawm pawl kan kap thokih, zanlam nazi 3 tiang kan kap aw. Kannih PDF lam khalin mi 6 hriam ngah kan um ih pakhat cu a bese ngaingai a si,” tin a sim.
Ralhrang Bawi Cawlh Hmang An Kap That – Sagaing ramthen Kawlin Khawpi Nga-pui’ Kyi vengih amai inn ih tlungduak ralhrang bawi Htun Lin cu inn ih a umlai ah mipi ralkap pawl in an va kap that.
Ralhrang bawi Htun Lin inn ih mipi ralkap pawl an feh tikah ralbawi Htun Lin cun mipi ralkap pawl cu kutden bomb in an rak deng. Cutikah mipi ralkap pawl khalin ralhranh bawi Htun Lin cu meithal in an kap ve ih,a hmun ah a cih thi.
Mipi ralkap lam cun “Daiten va kai tum kan sinan, daiten a pe aw duh lo ih, ralthuam hmangin in rak kham. Curuangah , kan kap ve hngal ih,a taksa ah vei 5 kan kap ngah. A hmunah a thi cih ih, a hnenin cerek, namsau, pistol le kutden bomb pawl kan laksak. Inn sung ahcun a nu le nau khal an um ve nan, a nu le nau cu ziangtin hman kan tuah lo ih, kan tlansan a si,” tin mipi an theihter.
Tlawng Sayakyi Le Sayamah An Tlen – Rakhine ramkulh Mawtaw myone Tinbaw hlah khua ih tlawng sayakyi le zirhtu pakhat an kaihmi cu a kaitu pawl ih dilnak vekin sumpai thawn an tlen zo ti’n fimzirzung lam cun thu an suah.
Tinbaw Hlah khua ih tlawng sayakyi le zirhtu pakhat cu June 16, sun nazi 1 hrawngah ralthuamkai hrekkhat in hramlak lamzin ah an kai ih, myone fimzirzung hnenah ting 1000 kyats lole Bangladesh tangka ting 50 in nan thlen thei ti’n an theihter.
Zarh khat a rei hnu ahcun fimzirzung lamin misual pawlih dilzat ting 1000 pe dingin an lungkim ih, June 22 ah tlawng sayakyi le zirhtu khal Bangladesh ramsung Rakhine ramri Rakhine khua an thleng zo tin fimzirzung lam cun mipi an simthei.
Maungtaw fimzirzung hotu cun “Tlawng sayakyi le zirhtu an kaihmi cu June 22, mani nazi 12 hrawngah Rakhine khua an thleng zo. An pahnih in an harhdam tha ih, kan va hmuak. Anmah tlawng sayakyi le zirhtu khal phone in ka be hai a si,” tin Rakhine thuthang a simthei.
Myone fimzirzung lam cun tlawng sayakyi le zirhtu zoin an kai timi an relsuak lo. Khuami pawl le AA cun Tlawng sayakyi le zirhtu kai ih, sumpai diltu pawl cu Bangladesh ramri ih um ARSA Muslim ralthuamkai pawl an si tin an sim. Anmah ARSA lam cun thusuahmi zianghman an nei lo.
Hivek ruangah Maungdaw myone sungin zirhtu hrekkhat tlawngkai ngam lo an um phah ih, an him lo ruangah tlawngkai lo an si thu an rel. Rakhine ahhin Rakhine AA le ralhrawng lawng an um lo ih, Rohingya army ARSA pawl khal an cangvai phah theu.
Khuami pakhat cun ‘Tuini tiang cu khua ah an thleng hrih lo,ramri ah Bangladesh cozah lamin an hruai ih, thu kan sut hmaisa ta ding an tive. Anmah kaitu le buaipitu lam cu an rem aw zo nan, tu ah Bangladesh lamin ram pahnih remawknak dan vekin kan kuat ding ti’n thu a um. Khua ah an thleng cing ko ding,” tin a sim ve.
Ralthuampi In Palik Sakhan An Kap – Sagaing ramthen Salinkyi khua ih myonmah palik sakhan cu June 23, zingah PDF komkhawm in ralthuampi in an kap ciamco ih, ralhrang 5 hrawng an thi ding tin thu an suah.
Myone palik sakhan cu PDF komkhawm in ralhrang palik le ralhrang ralkap pawl an ralrin lo laiah ralthuampi in vei 11 tlukin an kap ciamco. Ralthuampi 11 hrawng an kahsuak hnu cun PDF komkhawm lam cu himdam tein dung an dip ih, ralthuampi in palik sakhan an kahmi ah ralhrang 5 hrawng an thi ding tin thu an suah.
PDF sungtel pakhat cun “PDF komkhawm 3 in myomah palik sakhan kan kap. Ralthuampi kahnak 2 kan hungih, cumi in ralhrang pawl umnak sakhan kan kap ciamco. Ralthuampi 11 tluk kan kapsuak ih, an umnak hmun kan kapfuh tuk tikah ralhrang 5 hnakin mal lo an thi rori ding a si,” tin a sim.
Leave a Reply