Chin Ramkulh Ah Eiin A Harsa Deuhdeuh

Chin Ramkulh Ah Eiin A Harsa Deuhdeuh – Chin ramkulh Mindat peng, Kanpetlet peng, Matupi peng , Thantlang peng le Paletwa peng pawlah ralhrang ralkap cun lamzin sukso nasaten an cek ih, duh vekin thilri phurh an sian lo tlunah thilri man a kai tukih mipi lam ei ding an tlasam deuhdeuh tin raltlan pawl cun an sim.

Eiin man a let thum rori’n aman kai ih, Fangfai, siti le cet datsi pawl khal lei ding a um mumal lo. Hivek ruangah raltlan tamsawn cu vainim ei dingin an um thlang.

Raltlan pakhat cun “Kannih cu a hlan ihsin vainim ei miphun kan si ih, tlanglo kan tuah ringring. Vainim kan pholang theu ih, a car cu duh tiktikah kan deng cip ih, ei a theih ringring. Asinan,san a cangkang vivo ih, vainim ei lo dingin buh kan einak a rei tuk zo. Asinan, tu ahcun ram buainak ruangah kan harsa tukih fangfai lei thei dinhmun ah kan um nawn lo. Curuangah hlansan ah kan kirsal dingih vainim ei dingin timtuahnak kan nei rero a si,” tin a sim.

Mindat ih raltlan pakhat cun “Tu cun sumlut um lo ih kan um caan a rei tuk zo. Datsi man a kai tukih duhnak hmun duhduh in a feh theih nawn lo. Kannih tlangpar ahcun datsi lei ding khal a um nawn lo. Nitin kan tulsammi fangfai lei ding rori hman, leinak ding kan nei nawn lo. Hivek a si vivo ahcun kannih raltlan pawl cu rilrawng in caurau thluh thei kan si,” tin a sim.

Paletwa ih um pakhat cun ‘Fangfai man le datsi man a kai tuk lawmmam ih, kannih mirethei hrangah lei a theih nawn lo. Dip khat hnih lei duh khal sehla kan hawl hmu thei lo. WFP ih bomnak fangfai khal paletwa ah a thleng zo tin an sim nan,tutiang in zem hrih lo. A san khal kan thei lo. Cumi bomnak lo ahcun a lei ih lei ding khal a um lo a si,” tin a sim.

Thantlang peng ih um pakhat cun “Thilri man a kai tikah a tuartu bik cu kanmah raltlan pawl kan si. Ziangahtilehte cu zamrang zetin sizung fehpi an sinan, kan runsuak man nawn lo a si,” tin BBC a simthei.