Ralhrang kuthnuai ih Chin ramkulh sung fimzirnak hotu pawl cun 2022-2023 hrang Chin ramkulh sungin myone 9 lakah Myone 7 ah tlawng an phuan ding tin thu an suah.
Ralhrang ralkap in rampi thuneihnak an lak hnuah Chin ramkulh sungin zirhtu pawl CDM tuah tam zetih zirhtu an daih aw lo asile tlawng phuan theilonak myone 2 sungin zirhtu pawl cu tlawng phuannak myone 7 ah nauhak ca an zirh ding tin Chin ramkulh sung fimzirzung cun an sim.
Chin ramkulh fimzirzung hotu cun “Chin ramkulh sung ahcun may 27 in tlawngta pawl kan cohlang thok. Tlawngkai dingin hminpe tlawngta nauhak an tam asile hmundang in zirhtu pawl kan ko ding ih, tlawng phuan theilonak hmunih zirhtu pawl khal kan ko ding. Cuvekin kan tuah a si ahcun zirhtu pawl kan daih aw ding tin kan ruat.
“Hakha khalah tlawng 6 kan phuan dingih, ah-htah-kah 1 in ah-thah-kah 4 tiang tlunah muluan tlawng 2 khal kan phuan ding. Hakha myone telin Chin ramkulh sungin myone 7 ah tlawng kan phuan ding. Tu ahcun Kanpetlet myone le Thantlang myone ah tlawng kan phuan thei hrih lo ih, culo myone dang ahcun tlawng kan phuan thluh ding a si,” tin a sim.
Ralhrang ralkap cun Chin ramkulh sungin Hakha , Falam, Tedim, Tonzang, Paletwa, Mindat le Matupi pawlah tlawng an phuan tumih, Thantlang le Kanpetlet ahcun tlawng an phuan thei hrih lo.
Ralhrang ralkap cun May 26 in June 1 tiang tuitum hrang tlawng hminpek a theih tin thu an suah ih, June 2 ah tlawng phuan an tum. June 2 lawngah ram sung hmun tinkim ih tlawngkai zat theih a si ding.
NUG In Mipi Ralrinnak An Pe – NUG Cozah cun ralhrang ralkap ih dinmi mipi humhimtu pawlkom ah tel lo dingin Myanmar mipi theihternak an nei.
Ralhrang ralkap cun pituhsit, pyu Saw htee le tuitauh( thisen in) pawlkom an neih hnuah mipi kilhimtu, khua kilhimtu pawlkom kan din ding tin thu an suah betih, cumi pawl cu khua tin ah ret vivo an tum. Cucu, NUG cozah in ralhrang dinmi pawlkom ah zohman tel lo dingin mipi an theihtermi a si.
Ralhrang thuphuangtu Zaw Min Tun cun “Tu ah kan ram a buai ih, mipi kan humhim tin mipi hnaihnoktu pawlkom tampi an suak. Curuangah ,khua tinah khua kilhimtu lole mipi kilhimtu pawlkom kan din a tul. Cucu, rampi huap khua tin ah kan din tummi a si,” tin media pawl a rak simthei.
NUG cun “Ralhrang cun mipi himnak timi thupi hmangin pawlkom din an tum. Tu ah pawlkom din dingin khua tinah sawmmi an nei zo ih, zirhnak an pe rero zo. Hivek cu mipi le mipi buai haiseh tin ralhrang ih tumtahnak dang a si. Kannih NUG cun ralhrang dinmi pawlkom ih tel pohpoh an hmin cazin kan la thluh ih, an phu tawk hremnak kan pe ding a si,” tin thu an suah.
Ralhrang lamtang pituhsit pawl cu ram buai hnuah sulhnu ciamco an nei hrihlo. Pyu Saw Htee pawl cu ralhrang lamtang in raldotu an si tlunah mipi lam cangvaihnak phunphun ralhrang hnenah sim ringringtu an si. Tuitauh pawlkom pawl cu NLD cozah sungtel le NLD dinpitu pawl that rerotu an si ih, dothlengnak ih tel pawl khal an huam tel vivo. Hivek tlunah ralhrang cun khua tin ah khua kilhim dingin pawlkom thar an din tummi a si.
Yangon Lamzin ah Ralhrang Mawtaw Bomb An Puah – Mon ramkulh Bilin myone Alu khua in Yangon fehnak lamzin ah ralhrang ralkap mawtaw bomb puah a si ih, ralhrang 5 an thi tin Bilin PDF cun thu an suah.
Ralhrang ralkap mawtaw 5 cu May 26, zinglam nazi 9 hrawngah Bilin PDF le KNLA komkhawm in bomb an rak puah. Bomb an rak puahmi ah ralhrang ralkap mawtaw 5 lakin ralhrang mawtaw pakhat a siat ih,cumi ah ralhrang 5 an thi tin Bilin PDF cun thu an suah.
Bilin PDF hotu cun “KNLA thawn tangtlang in ralhrang mawtaw bomb kan puahmi a si ih, ralhrang mawtaw pakhat siat ah ralhrang 5 an thi. Kannih PDF le KNLA cu thi um loin kan him a si,” tin mipi a simthei.
Pungki Ruang Phurtu A Thi – Ayeyarwaddy ramthen Caungkung myone ah phungki mawtaw cun thingkung a pah ih, phungki pakhat a thi. Phungki thi cu mibawmtu pawlkom in mawtaw in an phur ih, mibawmtu pawlkom mawtaw cu mawtaw dang in a pah ngah tikah mawtaw mawngtu a thi bet.
Shwe mikta mibawmtu pawlkom hotu cun “Phungki thi phur in an fehsuak ih lamlak ah mawtaw dangin mibawmtu pawlkom mawtaw an pah. Cumi ah mibawmtu pawlkom mawtaw mawngtu a thi bet. Mawtaw mawngtu Naing Kyaw cu kan rinsan zetmi le kan sor zetmi a si,” tin a sim.
Pago in Ayeyarwaddy ih feh mawtaw ahcun phungki 5 an to ih, lamzin zir ih thingkung an pah ngah. Cumi ah phungki pakhat a thi ih, mibawmtu pawlkom in an buaipi. Mibawmtu pawlkom in phungki thi ruang an phur ih, mawtaw dangin cumi mawtaw a pah ngah tikah mibawmtu mawtaw mawngtu thi bet a si.
Ralhrang Ih Thahmi Ruang 5 An Sar – Makui ramthen Myiang myone Kyauk Khuat khua kiangah Myiang PDF pawl cun May 26 ah hmunram thianfainak an nei ih,ralhrang thahmi khuami 5 ruang an sar.
May 25 ah ralhrang ralkap le Myaing PDF pawl cu Kyauk Khuat khua kiangah an do aw ih, may 26 ah Mying PDF pawlin hmunram thianfainak an nei. Cumi ah mipi ruang 5 an hmu. Mipi ralkap pawl cun ruang an sarmi 5 pawl cu vuinak an nei cih.
Khuami pakhat cun “Kyauk khuat khua kiangah mipi ralkap pawlin mipi thi ruang 5 an sar, Ralhrang ralkap pawl ih thahmi an si. Kiangkap khuami zaten kan tlan ih, ziang khua in an si timi fiahnak nei dingin theitawk an zingzoi rero lai. Doawknak ah ralhrang ralkap lam thi an tamih, cumi ruangah ralhrang ralkap cun kiangkap khua an nawkkang vivo. Mipi an thahmi pawl cu khua pawn ah a bur in an rak hlon men. Cucu, an sarmi a si,” tin a sim.
AA Lamin Ralhrang Thawn An Doawknak San An Sim – May 26 ah ralhrang ralkap le Rakhine ralkap AA cu Chin ramkulh Paletwa myone Abaungtar khua kaingah an kap aw ih, AA lamin an kahawknak san an sim.
AA thuphuangtu Khai Thukkha cun “Mani , zinglam nazi 10 hrawngah do aw kan si. Kan doawknak san cu ralhrang ralkap in kan umnak hmunih an ruahnak hmun cu ralthuampi thawn in kap ciamco. Cumi ruangah, minute tawkfang sung do aw kan si. Kan doawk hnu khalah ralhrang lam cun ralthuampi thawn in kap bet. Doawknak ih thilthleng cipciar cu kan ralkap pawlin in simthei hrih lo a si,” tin a sim.
A tufang Rakhine ramkulh tlunah Chin ramkulh Paletwa ah AA le ralhrang ralkap an ngiar aw rero ih, may 26 ahcun a takin an kap aw phah. Tukhalah an boruak a sosang peh ih, kap aw lo dingin remawknak zianghman an nei thei lo. Curuangah, doaw sal thei rigring an si tin Rakhine mipi pawl cun an sim.
Leave a Reply