Chin Ramkulh Sungin Tlawng Ap Tambik An Phuang

Ralhrang ralkap cun June 2,2022 in tui kum hrang tlawng kan ong ding tin thu an suahnak a rei zo ih, May 26 in tlawngta nauhak an cohlang zo.

Tu ahcun tlawng aptu hmin cazin phuannak an nei ih, Myanmar rampi huapin Chin ramkulh cu tlawngap malbik an si. Chin ramkulh sungah tlawngap 22000 fang lawng an um . Ralhrang ralkap cun Chin ramkulh myone 9 lakin myone 7 ah tlawng kan phuan ding tin thu an rak suah zo ih, tlawng an phuan tumnak Hakha, Falam, Mindat, Matupi, Tonzang, Tedim le Paletwa lakin Paletwa cu tlawngap tambik an si.

Chin ramkulh fimzirzung hotu cun “Tutiang ih Chin ramkulh sung tlawngap hmin kan cazin kan neihmi cu 22000 an si. Tlawng cu June 2 in kan phuan ding. Chin ramkulh sungin tlawngap tamnak bik cu Paletwa an si ih, tlawngta nauhak pawl cu thla 9 sung tlawng an kai ding. Zirhtu pawl khal a remcan dan in zirhter an si ding,” tin a sim.

Chin ramkulh sungin Thantlang peng le Kanletpet peng ah tlawng kan phuan thei lo dingin tin ralhrang ralkap cun thu an rak suah zo ih, zirhtu an daih aw lo asile tlawng phuan theilonak hmunih zirhtu pawl cu tlawng phuan theinak hmunah thawnter an si ding thu khal an rak than zo.

Ralhrang ralkap cun Ayeyarwaddy myone ah tlawngap ting 9 tlun an um ih, Yangon ah tlawngap ting 7 tlun an um. Cucu, rampi huap dinhmun in tlawngap tambik an si ih, rampi huapin tlawngaptu tlawngta nauhak 5.2million an um tin ralhrang ralkap cun thu an suah.