Chin ramkulh Paletwa myone Tanthuang khua ih ralhrang sakhan hrang eiin phurtu ralhrang Helicopter a tumzawng ah Rakhine ralkap AA cun may15, sun nazi 12 hrawngah an rak kap.
Paletwa peng Tanthuang khua cu Rakhine Ramkulh Myiuk Oo tlunih um khua a si ih, tivapi thawn naiaw te a si. Tanthuang khua kiang ahcun ralhrang pawl umhmun hnget zet an nei ih, an cangvai phah theu tin khuami pawl cun an sim.
Ralhrang helicopter a tumzawng ah AA cun khatlam in ralhrang Helicopter an kap ciamco. Ralhrang lam khalin an umhmun khuarnak ihsin AA pawl umnak hmunih an ruahnak cu ralthuampi 20 tlukin an kap ve.
Hivek ruangah Tanthuang khua thar le khua hlun ih um mipi pawl cu khua ah um ngam loin hmunhim ah an tlanduak. Ziangahtile, an khua sungah ralhrang kahmi ralthuampi a tla ih, an him lo. Tanthuang khua hlunah innkhi 200 hrawng an um ih, Tanthuang khua thar ah inn 50 hrawng an um. Khat le khat an kahawknak ah mithi an um maw timi cu theih a si hrih lo.
Kalaymyo Ah Nupinu Sualpitu An Kai – Sagaing ramthen Kalaymyo sungah nupinu kum 50 sualpitu mi pakhat cu Kalay mipi palik le an tuanpi mipi ralkap pawlin theitawk ih an hawl hnuah an kai ngah tin mipi theihtenrak an nei.
Nupinu sualpitupa cu kalay palik KPS, Pah Khah pHah le Zomi PDF pawl tangrualin an kai. Ziangtin Kaihmi an hrem dingih, ziangtin an tuah ding timi cu mipi theihternak an nei hrih lo.
Zomi PDF cun “Tuvek ram buai caan ah ralhrang do lawng siloin dik lo zetih cangvai pawl khal kan thianfai vivo a tul. Ahleice in mipi ralkap kan si bangin mipi himnak hrang theitawk tuan ding kan si,” tin a sim.
Lailun ah tileuh zirnak a um ding – Falam khawpi CCIT Baibal tlawng ih neihmi Lailun hmuan tipi ah tileuh zirnak a um dingin tin tuanvo neitu lam cun mipi theihternka an nei ih, May thla sungah tileuh zirnak nei ding an si.
Tileuh zirnak ahcun mipum 20 lawng an cohlang dingih, hminpe hmaisa pawl duhsak an si ding. Tileuh zir duh hrang phone 09400305768 ah suhlam ding a si.
Tuanvo neitu pakhat cun “Tuvek ah tileuh zirnak nei ding kan si ih, hrekkhat cun an theithiam lo men ding. Asinan, laitlang ah tivai ih fen kan tam thei tukih khua khat le khua khat feh tikah tiva tan tul a um hnuaihni. Kum tin deuh thaw in tidai in fen that buaipimi kan nei ringring. Curuangah, tileuh kan thiam a tul zetin a langih, mipi himnak hrang tawlrel cu kan si,” tin a sim.
CDF Mindat Miraltha 46 An Thi Zo – Ralhrang ralkap in rampi thuneihnak an lak hnu 2021 February 1 in 2022 may thla tiangah Mindat CDF lamin miraltha 46 cun ram le miphun hrang an nunnak an hlan tin tuanvo neitu lam cun an sim.
CDF Mindat sungtel Salai Mang Om cun “Dothlengnak ah kannih Mindat CDf cu a thok ten ralhrang ralkap dotu kan si ih, ralhrang tampi kan thah bangin kanmah Mindat CDF sungtel lak khalin miraltha 46 cun ram le miphun hrang an nunnak a hlan zo.
“2021 sungah Mindat CDF sungin miraltha 41 kan can ih, 2022 kum sungah Mindat CDF sungin miraltha 5 kan can. Dothlengnak hrang nunnak hlantu pawl cu cazin felfai ten kan tuah. Ram le miphun hrang nunnak hlantu pawl cu upatnak kan pe ih, kannih a damlai pawlin theitawk in kan zuam vivo ding a si,” tin a sim.
Matupi in Mindat pan ralhrang pawl cu Mindat an thlen fel zo bangin, May 15 zing ahcun Mindat in Makui ramthen Kyauk Htuh lam an pan betih ,lamlak ah CDF Mindat cun bomb an rak puah. Bomb puak ah ralhrang thi an tam tin an sim. Khatlam ah Hakha in falam, Falam in Kalaymyo pan ralhrang pawl khal may 16 zingah kalaymyo sung an lut.
Kalaymyo pan Ralhrang mawtaw 20 tlun cu Hakha le Falam karlak ah nasa ten mipi ralkap pawlin an do ih,ralhrang thi 18 hrawng an um ding tin CDF lam cun an sim ih, mipi ralkap 8 khal doawknak ah an nunnak a cem ve. Ralhrang pawl cu Falam peng sungah CNDF in an do betih, ralhrang 12 an thi tin mipi theihternak an nei. Tedim le Kalay karlak ahcun ralhrang mawtaw kaptu an um lo ih, kalaymyo an thleng fel zo.
Ralthuam Leinak Ding Tangka Eithuptu An Hrem – Ralhrang donak dingah mipi ralkap pawl cun ralthuam an tul ih, ralthuam leinak hrang sumpai an hawl rero. Sumpai an hmuhmi cu ralthuam lei dingin tuanvo pekmi hnenah an hlan. Asinan, ralthuam lei loin tangka tlanpi an um hnuaihni thlang.
Sai Htin Aung timi khal DRPA mipi ralkap pawlin an hrang ralthuam lei dingin ting 120 an ap ih, ralthuam an leiter. Asinan, anih in ralthuam a lei dah lo ruangah, tangka cu khirhsal dingin an theihter. 2021, November thla ah ralthuam lei dingin an rak thlah ih,lei ti a neih dah lo ruangah tangka khirhsal dingin thla 2 sung caan an pe.
Caan an pek sungah phuangaw dingin le tangka kimten pe dingin an lem rero nan, a lang duh cuang lo ih, an hmu thei nawn lo. Cutikah DRPA cun Sai Htin Aung ih phunsang tlawngkainak tlawngta hotu pawl an theihter ih, annih cun Sai Htin Aung cu ziangtik hmah tlawng peh thei nawn loin a hmin an hlon cih.
Leave a Reply