Chinram Ah AA Le Ralhrang An Kap Aw

Kalay Ah Ralhrang 10 An Thi – Sagaing ramthen Kalaymyo thlanglam ah doawknak a sosang ih, doawknak sosang ah ralhrang 10 an thi tin Kalay PDF cun mipi theihternak an nei.

Kalay PDF cun “August 2 zingah ralrhang mipum 200 hrawng cu Kalay thilthiam zirnak phunsang tlawng sungin an suak ih, thlanglam Kalay an pan. Cucu Kannih Kalay PDF, CNDF, CDF KKG le RKDF pawl cun kalaymyo thlanglam Tayakung khua kiangah ralhrang ralkap pawl cu zinglam nazi 6 in zanlam nazi 3 tiang kan do. Doawknak ah ralhrang 10 hnakin mal lo an thi ih, hriamhma ngah tampi an um.

“Ralhrang thi an tam tikah Kalay thilthiam zirnak phunsang tlawng sungih um ralhrang pawl cun Tayakung khua lam cu ralthuampi in an kap ciamco. Ralhrang ralkap thi le hriamhma ngah pawl cu Kalay thilthiam zirnak phunsang tlawnginn sungah an phurlut ih, cutawk in kalay khawpi sungah an phurlut bet. Doawknak ah kannih mipi ralkap komkhawm lam cu kan him.

“Ralhrang ralkap pawl cu sun nazi 2 hrawngah Tayakung khua sungah an lutih, mipi 10 hrawng an kaih hnuah an lakin mi pakhat an that. Culo midang an kaihmi pawl cu ralhrang pawlin ralphaw ah an hmangih lamzin tluanah an hruai vivo. Doawknak a sosan tuk lai ruangah Kalay le Gangaw lamzin cu zohman zawh hrih lo dingin mipi kan lo theihter duh a si,” tin thu an suah.

August 2, zan nazi 7 hrawng khalah Tahan ih um mipi pawl cun puak awn phunphun an thei. Puak awn cu ralhrang le mipi ralkap doawknak maw, ralhrang pawlin anmahten an puah men timi cu felfai in theih a si hrih lo.

Chinram Ah AA Le Ralhrang An Kap Aw – Chin ramkulh thlanglam Paletwa myone Hna-mah khua le Le-hlah Ta-Hti khua karlak ah AA le ralkap ralkap ni 2 peh in an do aw zo ih, doawknak ruangah ralhrang cun tlawngta nauhak pahnih an kap that ngah tin khuami pawl cun an sim.

August 1 ni ih an doawknak ahcun mipi lamin an tuar lo nan, August 2 ih an doawk ah tlawngta nauhak 2 an thi ih, tlawngta nauhak pahnih dangin hriamhma an ngah. August 2 ahcun zinglam nazi 11 hrawngin nazi 2 tiang hrawng khua mipi cun puak awn phunphun an thei.

Paletwa ih um pakhat cun “Doawknak a um tikah ralhrang cun an hmunpi in ralthuampi an kap ciamco. Ralhrang ih ralthuampi kahmi cu AA umnak lam thleng ban loin tipar ih tlawngta nauhak pawl tomi lawng kiangah a tla. Lawng ahcun tlawngta nauhak 10 an to ih, an lakin tlawngta nauhak 2 an thi. Tlawngta nauhak dang pahnih khal hriamhma a ngah.

“AA le ralhrang do aw an si ih, kannih khua mipi cun ralthuampi puak awn, bomb puak awn le meithal puak awn pawl kan thei. Doawknak a um ruangah Paletwa khawpi sung ahcun fangfai lei an cuh aw ciamco ih, dawr ah fangfai lei ding a um nawn lo tluk a si thlang. AA le ralhrang an do aw peh vivo ahcun mipi cu kan buai thluh dingin a lang. Tuhman ah kan harsa tuk zo a si,” tin a sim.

Hakha Ah An Kap Aw – Chin ramkulh Hakha khawpi sungah ralhrang pawl umhmun khuarnak hmun 2 cu August 2 sun ah CDF Hakha in an va kap ih, ralhrang lam khalin an rak kap ve tin khua sungih um pawl cun an sim.

August 2, zanlam nazi 3:20 hrawngah Hakha pidawta vengih ralhrang umhmun khuarnak cu CDF Hakha in an va kap ih, ralhrang lamin an rak kah ve tikah kiangkap inn siat phah a um tin kiangkap ih um pawl cun an sim. Zanlam nazi 3:30 hrawng khalah Hakhathar vengih ralhrang umhmun khuarnak cu CDF Hakha in an va kap peh ih, ralhrang lamin an rak kap ve.

Khawsung ih kahawknak ahcun CDF Hakha lam cun thi le hriamhma ngah kan um lo tin mipi an simthei ih, ralhrang lam thi an um le um lo khal an fiah thei lo.

Hakha ih um pakhat cun “A tufang cu kannih Hakha khalah boruak a sosang tuk. Hakha le Thantlang karlak ah CNA kaihhruinak in mipi ralkap komkhawm cun timit lilawn tuah dingih timtuahnak nei ralhrang pawl an kap phah rero ih, Hakha khawpi sung khalah CDF Hakha in ralhrang umhmun khuarnak an kap phah rero ve. Mipi cu duhduh in leng kan suak ngam lo ih, Hakha le Thantlang karlak tla cu feh an kham a si,” tin a sim.

Khawlal Nupa An Kap That – Yangon ramthen Mingaladung myone Shwe Nantar khawlal le a nupi cu August 2 zingah meithal in kah that an si.

Ruang tuamhlawmtu cun “Khawlal tei nupa cu an fate tlawng thlah an si. an fate cu an kap lo ih khawlal le a nupi cu mawtaw sungah an kap that. Kiangkap khuami pawlin bomb puak awn le meithal puak awn an thei ih, a hmun an pan tikah bike 3 ih phur aw pawl an tlan cih.

“A hnu reilo ah ralhrang pawl an thleng cih. khawlal kap thattu pawl cu bike 3 ah mi 6 an phur aw tin mit hmutu pawl cun an sim. Neta ih thuhla kan theih vivo dan asile khawlal cun kiltu ralhrang pahnih a nei ih, amah khalin meithal an kol tin an sim. Asinan, nauhak tlawng an thlahnak ahcun amah kiltu pawl an tel lo ve. Cumi ruangah olsamten an kap that thei in a lang. Bomb an puah hmaisa ih ,mawtaw a feh thei nawn lo hnuah an kap that. Cucu, thuhla kan theih dan a si,” tin a sim.

Russia Palai Myanmar A Feh Ding – Ralhrang in rampi thuneihnak an lak hnu khalih ralhrang tuanpi thotho Russia ramdang palai cu August 3 ah Myanmar a feh dingih Myanmar ramdang palai thawn an kawm aw ding tin Russia cun thu an suah.

Ram pahnih palai cun sum tuahtlangnak , ram pahnih pehtlaihawknak, humhimawknak thuhla le bomnak thuhla pawl an rel ding tin Russia lam cun thu an suah. Cumi pawl an rel thluh hnuah a tufang Myanmar ram buainak khal an rel ding.

Russia cun Myanmar ram a buai hnu khalah ralhrang an tuanpinak an bansan duh cuang lo ih, ziangkimah an tuanpi peh. Kan dungah ralhrang hotu Min Aung Hlaing khal Russia a rak feh ih, tuitum ah Russia palai khal Myanmar ah a tlawng ve ding. Ram pahnih cu ralhrang in rampi thuneihnak an lak hnuah an tlawng aw rero zo.