Chin ramkulh Thantlang khawpi sungih um ralhrang pawl cu meitei tapung pawlin nasa ten an bawm tin a kiangkap ih um pawl cun an sim.
Ralhrang ralkap cun 2021, September thla in Thantlang khawpi sungih mipi inn pawl an rak nawkkang ih , mipi pawl cu khua ah um ngam loin an tlansuak thluh. Mipi an tlansuah hlanah khawpi sung doawknak a rak um rero zo.
Mipi an tlansuah thluh hnu cun mipi ralkap lamin olsamten Thantlang khawpi sungih ralhrang pawl an neh ko ding ti ih ruah thluh a sinan, tutiang Thantlang khawpi sungih um ralhrang pawl cu mipi ralkap lamin an dawisuak thei hrih lo.
Himi thu ah thuhla theizettu pakhat cun “Thantlang khawpi sungih ralhrang umhmun khuarnak cu a tha tuk lawmmam ih, olsamten doneh theih a silo. CDF le CNA tangtlang khalin nasa ten an rak do rero nan,tutiang Thantlang khawpi sungin ralhrang pawl an dawisuak thei hrih lo.
“Mipi um nawn lo hman sehla inn thatha tampi a umlai ih, ralhrang cun doawknak a suah tinten mipi inn an urkang ringring. Cun, ralhrang pawl umnak hmun a that tuk tikah doawknak a suah le mipi ralkap lamin thi an um duhzet.
“Hivek tlunah thuhla kan theihfelmi cu Tamu le Tedim peng sung lawngah siloin Thantlang khawp sung rori khalah ralhrang pawl bawm in meitei tapung pawl an um rori a si,” tin a sim.
Chin ramkulh Thantlang khawpi sungah innkhi 2000 in 2500 hrawng an um ding tin an sim ih, tu ah ralhrang ralkap cun Thantlang khawpi sungin inn 1500 kiangkap an urkang sak zo.
Meitei tapung pawl cu ralhrang thawn remawknak nei an si ih, ralhrang hnenih siah an pek hnuah ramri ah umhmun khuarnak an nei. Manipur tapung PLA hnuaiah ralthuamkai dangdang an rak um vivo ve ih, cumi lakah meitei khal an tel ve.
Meitei tapung pawl cun Chin ramkulh sung le Sagaing ramthen sungah ralhrang ralkap pawl raldo an bawm ih, Tamu khalah ralhrang bawm in PDF pawl an rak do rero zo. Tamu PDF cun meitei miphun hrimhrim hrem ding hmin cazin ah an rak telh zo ih, ram buainak a fel tik ahcun Tamu peng sungah meitei miphun zohman an um thei lo ding tin thu an suah zo.
Chin ralkap CNA khalin Tonzang peng sungah meitei tapung thawn an doawk zo thu mipi theihternak an nei ih, meitei tapung pawl cu ralhrang thawn tuantlang in Chin ramkulh sungah bing cin ciamco an tum tin an rak sim ve zo.
Manipur tapung pawl cu ralhrang tuanpi lo dingin ralrinnak pek rero an sinan, ralhrang an tuanpi thotho. Curuangah, mipi ralkap komkhawm pawl cu ralhrang lawng do loin manipur tapung pawl thianfai dan khal ngaihtuah tel thlang dingin mipi cun an dil.
Ralhrang 15 An Thi – Sagaing ramthen Myaung myone sungih doawknak ah ralhrang 15 an thi tin mipi ralkap komkhawm hotu CDSOM cun thu an suah.
Ralhrang ralkap mipum 120 cun June 9 zingah Makui ramthen Yesagyo myone in Sagaing ramthen Myaung myone lam an rak pan ih, mipi ralkap komkhawm cun lamzin in an rak bawh cia. Zinglam nazi 6 hrawngah Mipi ralkap komkhawm cun ralhrang umkhawm cu bomb puah in an kap ciamco ih, ralhrang 10 an thi tin thu an suah.
Doawknak a suah veten ralhrang ralkap cun ralthuampi tlunah an neihmi ralthuam thatha an hmangih, doawknak ih thi lo ralhrang pawl cu hmailam an pan vivo. Cucu, mipi ralkap komkhawm in hmailam in an rak bawhsawng ih bomb 3 in an puah bet tikah ralhrang 5 an thibet tin an thutuahmi ahcun an tarlang.
Doawknak a um tinten mipi hnaihnok le mipi tuar ding zawngih cangvai ralhrang ralkap pawl cun doawknak kiangkap ih khua cu ralthuampi in an kap ciamco phah ih, mipi inn a kang phah. Cumi tlunah khuami 3 cu ralhrang ralkap in an kai ih, Myaung myone Minhla khua phungki tlawngah ralhrang ralkap pawl cu an hriamhma tuamhlawm in an um. Ralhrang pawl hmailam pan vivo ding an si ih, mipi cu fimkhur ten um cio uh tin mipi ralkap cun thu an suah.
Leave a Reply