Chinram Ah Phun 10 Ong 605 An Um

Ralhrang ralkap cun June 17 ah a liamcia fimzir kum hrang phun 10 ong cazin an phuangih, Chin ramkulh sung khalin phun 10 ong 605 an um.

Myanmar ram a buai hlan ahcun rampi huap phun 10 phitu ting 9 lenglo an rak um nan, ralhrang hnuai ahcun a liamcia fimzir kum ah phun 10 phi ting 3 thafang lawng an um. Rampi huap in Rakhine, Ayeyarwaddy , Yangon le Mandalay pawl ah phun 10 phitu an tam bangin phun 10 ong khal an tam.

Rampi huapin Rakhine ah phun 10 ong 19729 an um ih, Ayeyarwaddy ah 19423 ,Mandalay 16747, Yangon 15409 tipawl cu phun 10 ong um tamnak an si. Buainak hmun Makui ah phun 10 ong 8144 an um ih, Sagaing ah 5736 an um ih, Kachin ah 5325, Karen ah 2391 , Kaya ah 222 an um ve.

Chin ramkulh sungah phun 10 phitu 2259 an um ih, mi 605 in phun 10 an ong. Chin ramkulh sungin Falam, Tedim, matupi, Paletwa le Tonzang peng sung lawngah phun 10 camibuai an rak phi thei ih, Hakha, Thantlang , Mindat le Kanpetlet pawl ahcun phun 10 camibuai an phi thei lo.

Tui kum fimzir caan ahcun ralhrang in Chin ramkulh sungin Hakha, Falam, Tedim, Tonzang, Matupi, Paletwa le Mindat pawl ah tlawng an phuan zo ih, Kanpetlet le Thantlang ah tlawng an phuan thei lo.

Ralhrang Pawl Anmah le Mah An Kap That aw – Sagaing ramthen Shwebo myone Makhuak khua kiangah thing phur pawl siah diltu ralhrang palik pawl cu anmah le mah an kap aw ngah ih, palik pakhat le dalan pakhat an thi.

Khuami pakhat cun “June 15 zingih thilthleng a si. Ralhrang pawl anmah le mah an kap aw ih, palik pakhat le dalan pakhat an thi. Palik pakhat thi cu Shwebo dawr neitu tei makpa a si ih, midang pakhat thi cu Koe Chuang ti ih an kawhmi dalan a si.

“Dalan cu palik hnenih thuhla simhei ringringtu a si ih, palik pawl fehnak khal a thlun. An tuah bikmi cu tipi ih thing phur pawl siah an dil. Cucu, kalhthlak in siah an dil theu ih, siah dil ding cun lawng an hmang theu. Ziangruangah an kap aw ngah, ziang buainak an nei timi cu kan thei lo. Asinan, anmah le mah an kahawk ruangah palik pakhat le dalan pakhat cu an thi rori a si,” tin a sim.

Ralhrang Le PNLO An Tongaw – Ralhrang ralkap hotu Min Aung Hlaing le Pa Oh ralthuamkai hotu PNLO pawl cu May 16 ah Naypidaw khawpi ah hmaiton in an be aw ih ,thuhla phunphun kan rel in Pa Oh lam cun thu an suah.

PNLO lam cun Min Aung Hlaing an ton hnuah remdaihnak pawlkom pawl khal hmaiton in an biak vivo ding thu an sim. Min Aung Hlaing thawn an tonawknak ahcun Federal Democracy uknak le Pa Oh hmunram thatsohnak ding kan rel tin PNLO lam cun thu an suah.

Ralhrang ralkap hotu Min Aung Hlaing cun remdaihnak hrang tlangpar ralthuamkai hotu pawl ka tong duh tin sawmnak a rak nei ih, pawlkom 10 in Min Aung Hlaing sawmnak cohlang in hmin an rak pe.

Tu ah Min Aung Hlaing cun Shan ralkap RCSSA, Mon Party NMSP, Karen remdaihnak KNLA PC, Rakhine Party ALP, Pa Oh ralthuamkai PNLO, Wah party UWSP le Kokang ralthuamkai NDAA pawl a tong zo ih, hminpe 10 lakin Karen budish ralkap DKBA le Shan ralkap SSPP cu ralhrang hotu Min Aung Hlaing an tong lai ding.

Kachin ralkap KIA, Chin ralkap CNA, Karen ralkap KNU, Rakhine ralkap AA, Palawng ralkap TNLA, Kokang ralkap MNDAA le Kaya ralkap KA pawl cun ralhrang hotu Min Aung Hlaing an biak lo ding thu mipi theihternak an nei rero zo.

Mipi Inn Urkangtu Ralhrang 35 An That – Sagaing ramthen Shwebo myone sungah mipi inn urkangtu ralhrang pawl cu mipi ralkap komkhawm in a do ih, ralhrang 35 an thi tin MDF Shwebo cun thu an suah.

MDF Shwebo cun “June 12 ah Ye Oo lamih ra ralhrang ralkap pawl cun Shwebo myone Zuasoe’ khua le Puakchaing, khua cu ralthuampi in an kap ciamco ih, inn 107 a kang. Khua dang siatsuah dingin ralhrang pawl cu hmailam an feh vivo ih, kannih mipi ralkap komkhawm cun bomb puah in kan rak do. Doawknak ahcun ralbawi Aye Win Htun telin ralhrang 35 an thi ih, hriam ngah tampi an um. Kannih mipi ralkap komkhawm lam khalin miraltha 2 kan can ve.

“Dothlengnak hrang nunnak hlantu miraltha Kyaw Lwin (Shwebo PDF ) le miraltha Min Naing ( Depayin PDF ) tei pahnih cu kannih mipi ralkap komkhawm cun upatnak kan pe ih, kan uituk rori timi kan langter duh. Mipi ralkap komkhawm pawl cu Shwebo PDF, Snake Aye, Alpha, Dragon Army, Depayin PDF le Shwebo MDF pawl kan si,” tin thu an suah.

Malaysia In Myanmar Mipi Dinpi Dingin India A Sawm – June 16 ah ASEAN pawlkom ih tel ramdang vuanci pawl le India cozah meeting an nei ih, cumi ahcun Malaysia cun India cozah cu Myanmar mipi dinpi dingin sawmnak a nei ih,Myanmar thuhla kan buaipi dan khal kan thleng danglam a tul tin meeting ih tel pawl sawmnak an nei.

ASEAM sungtel lakah Myanmar palai a tel lo ih, culo ASEAN sungtel dang pawl cu India cozah thawn thureltlangnak an tel. Malaysia cun India cozah cu Myanmar mipi dinpi dingin a sawm ih, ASEAn sungtel hrekkhat pawl cu Myanmar thuhla kan buaipi dan thleng danglam a tul tin sawmnak a nei bet.

Myanmar ram a buai hnuah Malaysia cu Myanmar mipi lamtang an si ih, ralhrang an tuanpi lo. Cutilai in India cu palap thinlung nei an si ih, ralhrang lam an tuanpi. Curuangah, Malaysia palai cun India cu Myanmar mipi dinpi dingin a sawm.

ASEAN pawlkompi sungtel khalah Malaysia cu thungai thlak takin Myanmar mipi dinpitu an si ih, NUG palai khal an rak kawm zo. Myanmar ram a that theinak dingah theitawk suah rero ram pakhat an si.