Chinram Ah Ralhrang 9 An Thi

Chin ramkulh kanpetlet peng sungah CDF Kanpetlet le an tuanpi pawl cun June 9 ah ralhrang ralkap vei 2 an do ih, ralhrang 9 an thi tin thu an suah.

Kanpetlet CDF cun “June 9 ah ralhrang mipum 185 hrawng fehkhawm cu kannih Kanpetlet CDF thawn Kanpetlet peng sungah kan do aw ih, The Youth Force, PDF Ngioyan le Saw PDF pawlin ralhrang do in bawm.

“Zinglam nazi 10 in 11 tiang veikhat kan do aw ih, zanlam nazi 5 in 6 tiang vei hnihnak kan do aw. Nikhat sung vei hnih ih kan doawknak ah ralhrang 9 an thi ih hriam ngah an tam. Kannih mipi ralkap komkhawm lam cu thi kan um lo.

“Doawknak ruangah doawknak kiangih Letmun khua zaten an tlan thluh. Mipi um lonak khua ahcun ralhrang pawl an lutih, mipi thilri an fir tlunah mipi zuatmi tilva pawl khal an fir ih, an eisak.

“Doawknak ih hriam ngah ralhrang pawl cun an hmuhmi mipi pawl cu an kai ih, ralphaw ah an hmang. Tu ah ralhrang pawl cu Letmon khua tlunlam ah an um hrih a si,” tin thu an suah.

Thantlang Baptist Biakinn A Ziamral – Ralhrang ralkap cun Chin ramkulh Thantlang khawpi sungih Baptist biakinnpi cu June 9 sun ah an nawkkang betih, Baptist biakinnpi a kangral tin TBC cun thu an suah.

Ralhrang ralkap cun 2021, September thla in Thantlang khawpi an rak nawkkang thok zo ih, 2021 December thla ah ralhrang ralkap cun Thantlang Baptist biakinn hmuansung ih Memorial Hall le Meeting Hall an rak nawkkang zo. Cumi caan ah biakinnpi cu a rak him nan, June 9, 2022 ahcun biakinnpi khal a kangral tin Thantlang Baptist Church cun thu an suah.

Thantlang Baptish Church cun “2021 October 29 ah ralhrang ralkap cun Thantlang Baptist biakinn hmuan sungih Office le Quarter an rak nawkkang. 2021 December 17 ah ralhrang ralkap cun Thantlang Baptist biakinn kulhsung ih Community Hall, Evan umnak , darvuan umnak, coka le thlacamnak hmun pawl a rak kang. 2021, December 30 ah Memorial Hall, Meeting room, mikhual room le mucu inn pawl a kang. 2022 ,June 9 ahcun Thantlang Baptist biakinnpi cu ralhrang kutah a ziamral a si,” tin mipi an theihter.

Thantlang Baptist Vice president cun “June 9, zanlam nazi 5:30 hrawngah a kiangkap ih um pawlin Thantlang Baptist biakinnpi a kang tin in simthei. Cuveten, Thantlang kiangih Thlualam khua le Congthia khua ih um pawl thuhla kan sut ih, annih khalin Thantlang Baptist Biakinnpi a kang tin in sim ve. Cucu, kan theih dan a si,” tin a sim.

Thantlang Baptist Biakinn ahcun innkhi 600 tlun an um ih, Thantlang khawpi ah hmin nei biakinn pakhat a si. Hitin, ralhrang ralkap in rampi thuneihnak an lak hnuah Thantlang khawpi sungin Inn 1500 kiangkap le biakinn 11 an nawkkang zo tin hminsin tuahtu pawl cun an sim.