Chin ramkulh paletwa myone Zukchuang wa khua kiangah ralhrang ralkap pawl anmah le mah an kap aw ciamco tin AA thuphuangtu Khai Thukkha cun Rakhine thuthang a simthei.
June 27, zinglam nazi 11 hrawngah kiangkap khua pawl cun meithal puak awn, bomb puak awn le ralthuampi puak awn tivek an thei ih, AA le ralhrang ralkap pawl an do aw ah an ruat. Puak awn ruangah kiangkap khuami pawl cu hmunhim an tlan man. Asinan, a hnuah AA lam cun ralhrang thawn an doawk lo thu, ralhrang pawl anmah le mah an kap aw sual tin an sim.
AA thuphuangtu Khai Thukah cun “June 27 ni ah doawknak a um lo. Kiangkap mipi in puak awn an theihmi cu kannih AA le ralhrang doawknak a silo. Ralhrang pawl anmah le mah theithiam aw loin an kap aw. Umdan cu tihnak in an khat thluh ih, anmah ralhrang khal AA ruatin an kap sual siko. Reizet an kap aw ih, thi an um rori ding a si,” tin a sim.
Ralhrang pawl cu anmah le mah minute 30 tluk an kap aw ih, meithal tlunah ralthuampi le bomb tiang an hmang. Anmah le mah AA ah ruat aw sualin kap aw an si tin AA cun an sim.
Khuami pakhat cun “A thok ahcun meithal puak awn kan thei. Cumi hnuah ralthuampi in an kap aw ih, cutheh in bomb an hmang. A thok ahcun AA le ralhrang an do aw ah ka ruat nan, AA lam thusuak vek asile ralhrang pawl anmah le mah kap aw an si,” tin a sim.
Kan dung May 26 ah AA le ralhrang ralkap pawl cu Abaungtar khua kiangah nazi 2 sung tluk an rak do aw ih, doawk hnuah ralhrang pawl cun khawlal le veng uktu an rak kai. May 30 ah Abuangtar khuami pawl cu ralhrang ralkap in an rak kai ciamco ih, hrekkhat an thlah hnuah hrekkhat cu ralhrang hmunah an hruaimi an um.
A tufang Rakhine ramkulh sung khalah AA le ralhrang ralkap an ngiar aw rero ih, an sungtel an kaihsak aw rero. AA lamin ralhrang pawl an kaih tikah ralhrang pawl cun khuami pawl an kai ciamco ve.
Thantlang Ah Ralhrang 2 An Thi – Chin ramkulh Thantlang khawpi sungah ralhrang ralkap le CDF Thantlang pawl an do aw ih, doawknak ah ralhrang 2 an thi tin CDF Thantlang cun June 27 ah thu an suah.
Ralhrang ralkap le CDF Thantlang pawl cu June 23 ah rak do aw an si ih, doawknak ah CDF Thantlang le CNA an tangtlang. Boruak sosang peh ruangah CDF Thantlang cun doawknak thuhla cu June 27 ni lawngah mipi theihternak an nei thei fang.
Doawknak sulhnu pawl cu June 24 ah CDF thantlang le CNA pawlin thianfainak an nei ih, ralhrang thisen le thuanhnaw sia hrekkhat an hmu. May 27 khalah CNA le CDF Thantlang cun Thantlang khawpi sungih ralhrang pawl an rak do zo ih, ralhrang 6 an thi tin mipi theihternak an nei. Thantlang ih doawknak a um hnuah Chin ramkulh Hakha khawpi ah ni 2 peh in ralhrang helicopter an ttum tin khuami pawl cun an sim.
Ralhrang hotu sang Soe Win Bomb An Puah – Shan ramkulh thlanglam Tuangkyi khawpi ih feh ralhrang ralkap hotu sang Soe Win ih tomi mawtaw bomb puah a si ih, Soe Win dungthlun palik 2 an thi ih, lamzin kil palik dang 2 khal hriam bese tuk an ngah tin Tuangkyi PDF cun thu an suah.
Ralhrang hotu sang Soe Win cu June 24 lamin Taungkyi a rak feh zo. Sun nazi 1 hrawngah PDF pawl cun Soe Win tomi mawtaw rori bomb puah an tum nan, an tum hnakin bomb a rak puak rangih, palik mawtaw sawn an puah ngah.
Tuangkyi PDF hotu cun “Ralhrang hotu sang Soe Win tomi rori bomb puah tum kan sinan, bomb a rak puak ol ih, palik mawtaw kan puah ngah. Bomb puak ah palik pahnih an thi ih, zinkil palik dang pahnih khal hriamhma bese tuk an ngah. Bomb puak cun ralhrang mawtaw pahnih a puah ngah fuh tuk tin thu felfai kan thei a si,” tin a sim.
Taungkyi PDF cun ralhrang ralkap pawl an do vivo ding ruangah mipi cu ralhrang naih ah um lo dingin an theihter.
Ralhrang Cawlkhawm Bomb An Puah – Sagaing ramthen Chaung Oo le Minmu ramri ah ralhrang pawl cawlkhawm bomb puah a si ih, ralhrang 11 an thi tin PDF cun thu an suah.
June 26, zan nazi 10:50 hrawngah ralhrang pawl lamzin sukso an vahnak ruangih bangtuk cawlkhawm pawl cu PDF komkhawm in bomb an puah. Bomb an puah hnuah an kap cih ih, ralhrang 11 an thih tlunah hriamhma ngah an tam tin PDF lam cun an sim.
PDF hotu cun “Chuang Oo lamin ralhrang pawl an rak ih, lamlak ah an cawl. Hmaisabik ah bomb 4 in kan puah ih, ralhrang 3 an thi. Cumi hnuah ralhrang mipum 80 hrawng umkhawmnak cu kanmai tuahmi bomb zamthei in kan kap ih, a fuh tukah ralhrang 8 an thi tin thuhla felfai zet kan thei a si,” tin a sim.
Tanintharyi Palaw myone Nantuang khua ih umhmun khuar ralhrang ralkap pawl cu June 27, zinglam nazi 6 hrawngah Palaw PDF pawlin an kap ih, ralhrang 6 an thi tin thu an suah.
Bomb an puah hnuah an kap aw ciamco betih, zinglam nazi 8 hrawng ahcun ralhrang pawlin ralthuampi an hmang cianco. Cumi ruangah Palaw PDF pawl cu an himnak hrang dung an sip tin thu an suah.
Ralhrag lamin ralthuampi an kah ciamco ruangah mipi inn siat phah a um nan, mipi thi an um le um lo felfai in theih a si hrih lo tin an tarlang.
June 27, zinglam nazi 10 hrawng khalah Pin Oo Lwin in Mandalay lamih feh ralhrang ralkap mawtaw 8 cu MRA mipi ralkap in bomb an rak puah ih, ralhrang 3 an thi tin thu an suah ve.
ASEAN Palai In Daw Suh Hrang A Dil – ASEAn pawlkompi aiawh in ASEAN palai ih an hrilmi Prak Sokhon cun Daw Suh hrang ralhrang pawl dilnak a nei ih, thawnginn sungah siloin a innpi ah retsal hram uh tin ca a kuat.
Ralhrang ralkap cun kan dung June 22 in rampi thuneihnak an lak hnuih an kaihmi Daw Suh Kyi cu a innpi ah kiltu nei men in an ret duh nawn lo ih, Naypidaw thawnginn sungah an khum. Hivek cu Myanmar mipi hrang thilthar a si bangin Daw Suh Kyi hrang khal thilthar a si ve.
Ziangahtile, ralhrang ralkap cun vei tampi Daw Suh Kyi a rak kai zo nan, Insein thawnginn sungah ni reilote sung lawng an khum ih, a innpi ah kiltu nei in an ret tlangpi. Tu ahcun Min Aung Hlaing thupek vekin Daw Suh cu Naypidaw thawnginn sungah khum a si ve thlang.
Thuhla a darh dan vek asile Min Aung Hlaing cun Daw Suh Kyi thla zalen a tum nawn lo tin an sim. Tu ah Daw Suh cu thubuai 6 hrang kum 11 sung thawngtla dingin ralhrang Court cun hremnak an pe zo ih, thubuai 13 a nei lai.
Hivekin ralhrang lamin Daw Suh Kyi thawnginn ih an khum hnuah ASEAN pawlkompi palai cun June 27 ah ca a suah ih, ralhrang pawl cu Daw Suh Kyi thawnginn in lasuak ih a innpi ah retsal dingin a dil hai. Tutiang cu ralhrang lamin an let hrih lo.
ASEAN palai cu June 29 ah Myanmar tlawng tum a si ih, cumi hrang Daw Suh Kyi ton a duh thu khal ralhrang pawl hnenah a hlankhan in a dil cia nan, ralhrang pawl cun Daw Suh kyi cu thubuai nei lai a si ruangah na tong thei lo ding tin an sim cia zo. Curuangah tuitum ih ASEAN palai dilmi khal ralhrang pawlin an pitlin sak zum a silo.
US Cangvaih Dan Ah N.Korea Thinphang – US cun Europe ram ih rualpitha NATO pawlkom an neih bangin a tufang Asia ramsung khalah ram khat hnu ram khat an kawm vivo ih, rualpitha tuah vivo an tum. Hivek ruangah N.Korea an rak thinphang zetih, US in N.Korea ram hlohter an tum tin an phunciar.
US cun Europe ram sungin ram 28 pawl cu NATO pawlkom ah lungkimnak a tuahpi ih ral dinhmun ah kan bawm aw ding, lungrualten ral kan dotlang ding timi remnak an nei. Tu ah US cun Asia ram sungin S.Korea, Japan, Australia pawl thawn raldo zirtlangnak an nei rero zo ih, remnak phunphun an nei.
Hivek cu US in Asia ram sung khalah NATO vek pawlkom din an tum ih, an tuanpi ram pawl thawn N.Korea thiatbal in tum a si tin an ausuak.
Asia ahcun China cu ralthuam le sipuazi ah dinhmun sang hleice bik a si ih, China hnuaiah ramdang pawl an um thluh. Hivek ruangah China in Asia pumhlum in a ciahneh thluh ding cu US in an ruat ngam lo ih, a tufang cu Asia ramsung ah US lam nasa ten an cangvai ngai. Cucu, N.Korea an rak thinphang tuk phahmi a si.
Leave a Reply