Chinram Ih Lut Ralhrang Pawlin Rittheihsi An Ei Nasa

Makui ramthen in Chin ramkulh Matupi le Mindat ih lut ralhrang pawl cun raldonak ah raltha dingin phurnak rittheihsi an ei ih, an rualpi thi tivek khal uinak nei loin an hnihsan men theu tlunah ralhrang thi ruang lakah rittheihsi an paimi khal CDF Mindat in an hmu.

CDF Mindat hotu pakhat cun “Raldonak hmunih ralhrang pawl cun rittheihsi an ei nasa. An hmaiah an rualpi ralhrang thi ruang a um khalle an hni thei thotho ih, ralthuampi an kahsuah caan khalah an hni durdo men. An rualpi thi ruang hmaiah an hni thei timi cu a ruahnak tokthaitu a um ruangah a si.

“Kan dungih kan doawknak khalah ralhrang pakhat naa tukin hriam a ngah ih, ui pakhat cun a thisen a liah sak rero. Cucu, a rualpi ralhrang dang pawlin an hmu ih, an hnihsan men. Culo khalah ralhrang thi ruang ihsin le ralhrang mawtaw siat ihsin rittheihsi an kenmi tivek kan sar hnuaihni zo. Tu ahcun Matupi in suak ralhrang pawl cu Mindat ralkap hmunpi an thleng fel zo a si,” tin mipi a simthei.