Chin ramkulh Falam peng Tio ih ralhrang sakhan kah a si thu ah Falam peng le Tedim peng hmun hrekkhat sungih um CDF Hualngoram pawl cun ralhrang kaptu mipi ralkap pawl an mawhthluk ih, an hmunram sungah duhduh ih cangvai nawn lo dingin thu an rak suah. Cumi thawn pehpar aw in CNDF le PDF Zoland cun thu an suah cih ve hngal ih, CDF Hualngoram ralrinnak an pe.
CDF Hualngoram cun “Kannih HOP central hmunpi ah JLAB le CDF Hualngoram pawl meeting kan nei ih, a hnuai vekin thu kan suah. CDF Hualngo ramin daan kan rak tuahmi thlun duh loin Mountain Eagle Defence Force tipawl cun Tio ih ralhrang sakhan cu drone in bomb an thlak ringring ih, mipi an thinphangter ruangah poi kan ti ngaingai. Cumen ah duhtawk hrih loi PDF Zoland, CDM Siyin le CNDF pawl an sawm ih, August 10 ah ralhrang sakhan lak tumnak nei cuang loin ralhrang sakhan an va kap ih, mipi pakhat a thih phah tlunah mipi hriamhma ngah khal an um. Mipi inn 5 hnakih tam a siat ih, poi kan tituk lawlaw. New Haimual ih um Mountain Eagle Denfence Force ( MEDF ) pawl ih cangvaih dan cu kan mawhthluk tuk lawlaw.
“August 6 ih thu kan rak suah zo bangin CDF Hualngoram theihpinak le rem tinak tel loin khualtlawng mipi hnaihnok ih, lamzin kham ,mipi thinphang ding zawngih cangvaihnak a um a si ahcun ziangvek pawlkom an si khalle ralhrang thazang hmangin thungrul an si ding. An parah ziangkhal thleng sehla anmai sersuakmi buainak a sisawn ding,” tin thu an suah.
CNDF cun “Falam peng sungih chinmi zaten lungrual zetih kan um theinak dingah CNDF cun Falam peng sungah dothlengnak ralthuamkai dang a um thei lo tin 2021 August 24 ah thu kan rak suah zo. Thu kan suah hnuah CJDC khalah Falam peng sungah dothlengnak ralthuamkai dang an um asile CNDF hnuai ah an um ding, culole CJDC ah pom an silo ding tin thuthencatnak a um zo.
“Asinan, tu ahcun Falam peng, Rihkhawdar khua mipi pawl harsa dingin le hnaihnok zawngin ralthuamkai hrekkhat an cangvai kan hmu. Cun, CDF Hualngoram khalin mipi duhdan ngai poimawh loin mipi ttih ding zawngin thu phunphun an suah ih, dothlengnak ralthuamkai dang thawn thenthekawknak suak dingin ca an suah hrim tivek kan hmuh tikah kan riahse tuk.
“Kannih CNDF ,MEDF , CDM Siyin le PDF Zoland pawl tlun pawlkom dangdang thawn khalin ralhrang uknak do cimit dingin lungrualten ke kan kartlang vivo dingih, mipi harsa ding zawngin, mii tih dingih cangvai ralhrang ralkap siseh pawlkom dang tivek an um asikhalle kan neihmi ralthuam in kan do thlang ding.
“A hlanih CNDF in thu kan rak suah zo bangin Falam peng sungah dothlengnak ralthuamkai dang dinsian a silo ih, CNDF hmunram sungah CNDF rem tinak tel lo cun raldonak, mipi tih ding zawngih cangvaihnak hrimhrim tuah lo dingin ralrinnak kan pe cih a si,” tin thu an suah.
PDF Zoland cun “August 10 ah kannih PDF zoland cun kan tuanpi MEDF, CDF Siyin le CNDF pawl thawn New Haimual khua kiangih Ciau ralhrang sakhan kan kap. Cumi thuhla ah CDF Hualngoram cun kan cangvaihnak in mawhthluk ih, ralrinnak in pek tikah kannih khal a hnuailam bang tukin thu kan suah ve.
“Dothlengnak mipi ralkap komkhawm in ralhrang kan do caan ah tohmun ih rak mawhthluk tivek cu mipi ralkap pawlkom pakhat dinhmun in tuah ding awm a silo. Mipi ralkap ti aw CDF Hualngoram cun mipi hnenah sumpai luarkai tukin an dil tikhal kan thei. Curuangah Tedim peng sung mipi uktu siannak tel loin Tedim peng sungah cangvai nawn lo dingin ralrinnak pek an si. Kan hmunram sung lakthen an tummi cu ziangtik hmanah kan pom dah lo ding a si,” tin thu an suah.
CDF Hualngoram cun Falam peng sung hmun hrekkhat le Tedim peng sung hmun hrekkhat cu kan ramsung a si tin an sim ih, anmai siannak le theihpinak tel lo cun an ramsung ah ralhrang do an siang lo tin thu an suah.’
Hi vekin mipi ralkap pawl khat le khat an buai caan ah ralhrang ralkap pawl an rak cangvai cih ve, August 14, zanlam nazi 4:45 hrawngah ralhrang ralkap pawl cun Falam peng le Tedim peng ramri Haimual khua sungin inn hrekkhat an urkang. Haimual khua in inn ziangzat ciah a kang timi felfai in theih a si hrih lo ih, mipi pawl cu kiangkap khua le Mizoram lamah an tlan.
Khuami pakhat cun “New Haimual ah mipi ralkap thenkhat an um ih, Tio ih ralhrang sakhan cu Drone in bomb an puah theu. August 12 ahcun Rihkhawdar ih ralhrang mipum 40 hrawng cu Haimual lamah an rak feh ih, August 14 ni ah Haimual khua in mipi inn hrekkhat an urkang. Inn ziangzat ciah a kang timi cu felfai in kan thei hrih lo a si,” tin a sim.
CNDF In Avei 3-nak Commando Zirnak An Theh – Chin miphun himhimtu CNDF cun avei 3-nak Commando zirnak an thehsuak thei thu August 13 ah mipi theihternak an nei.
CNDF cun “CNDF sungin avei 3-nak Commando raldonak cu August 13 ah Camp Rihli ah tluangten kan tuahsuak. Raldozirnak thehsuaktu pawl cu CNO GS Salai William Chin in thutawi simnak a nei ih, CNDF ralbawi Salai Peter Thang khalin thutawi a sim peh.
“Cumi thluh hnuah raldo zirnak thehsuaktu CNDF ralkap pawl cun an thiamthil pholangnak an nei ih, cumi hnuah Zalen Chinmi timi zaihla kan sak ih, kan caan kan khar. Raldo zirsuak theh lakah nunau 9 le mipa 36 an telih, an zaten 45 an si. Thla 2 sung raldo zinrak nei an si ih, khawpi sung cangvaih dan ding, hmaiton ih ralhrang do dan ding, cangvaih dan ding le ram dinhmun pawl zirh thluh an si tlunah sinak le Federal Democracy uknak pawl khal simfiang an si,” tin thu an suah.
Shan Tilian Ah Nupa An Thi – Shan ramkulh nisuahnak lam Kyaikdung myone Wansan khua a ti a lian thutthi ih, tilian thutti ruangah nupa an thi. August 13 zingah ruah a cen ih, tidai a lian thutthi. Tidai lian cun inn pakhat a fen cih ih, inn sungih um nupa khal a fen tel tikah an thi.
Ruang hawltu pakhat cun “August 14 zinglam nazi 9 hranwgah innsangpa sawn ih ruang kan hmu ih, zanlam nazi 5 hrawngah innsangnu ih ruang kan hmu bet. Zan ihsin ruah a cen ih,tilian an rak thei ngah lo si ding. Tilian cun an umnak inn tiang a fen cih. Hivek cu kannih lamah a um dah lo ih, tuitum veikhat thlennak a si.
“Innsangpa sawn cu khua in peng 2 hrawng hla ah a ruang kan hmu ih, innsangnu sawn cu khua in peng 5 hrawng hla ah a ruang kan hmu. Kyaikdung khawpi sung khalah tidai pi 6 tluk sangin a lut. Tu ahcun tilian a kangsal rero zo a si,” tin a sim.
Tui kum sungah Shan ramkulh in tilian an tuar tam zetih, ruah cen ruangah tilian a si tlangpi. Tilian an tuar caan ah inn tiang fen rori cu tuitum a veikhat a si thu an rel.
Leave a Reply