CNO In Zirlai Bu An Tuah

CNO In Zirlai Bu An Tuah – Chin National Organization CNO cun an hmunram sungih tlawngta pawl hrang zirlai bu an tuah rero lai ih, a rei hlanah a zem thlang ding.

CNO CNDF cu Chin ramkulh Falam peng sung le Kalay kabaw lamah ralhrang uknak doin cangvai an si. Tuitum CNO ih tuahmi zirlai bu cu KG in phun 11 tiang hrang a si ih, an hmunram sung mipi tlawnginn umnak khua pawlah a zem ding.

Sungtel pakhat cun “Kan hmunram sungah tlawngkai tampi an um ih, cupawl hrang zirlai bu buaipi kan si. Kan theh rero thlangih a rangthei bikin khuatin ah kuat kan tum. Cabu hrang khalah sumpai pek theih ringring a si,” tin a sim.

CNO Head Quarter khal sak theh rero thlang a si ih, a leng duh mipi hrang len theih a si thu CNDF ralbawi Salai Peter Thang cun mipi sawmnak a rak nei ve. CNO CNDF hi nasaten ralhrang ralkap do rerotu an si ih, Chin ramkulh sung hmun tinkim tlunah Sagaing ramthen lam tiang ralhrang dotu an si.

Ralthuamkai Mi 2 In Khuathlir Khuami An Suam – Chin ramkulh Falam peng Khawthlir khua ram, Mizoram ramri kiangah zoti theilo hmaituam mi 2 meithal keng cun khuathlir khuami Pu Ram Muan Thang an suam ih, a bag an lonsak.

Pa Ram Muan Thang cun “September 16 ni ah Mizoram state Bulfekzawl khua ihsin Khawthlir lamah ka tlung. Tio ti kan in Khawthlir khua ram sung tikua ih ke ka kholh lai, sun 12:30 kiangkap hrawngah zoti theilo hmaituam mi 2 cun meithal in tin ih ka paimi bag in long.

“Tikua ih kan umlai ah ka sak ihsin thawm ka thei ih ka zoh tikah angki dum, boot dum le mask bun mi mi 2 cun an kenmi auto meithal pakhat thawn in tin zo. Pakhat cun hlaral ihsin in tin ih pakhat sawn cun ka bawngbi zal pawl tiang cekin ka paimi bag in long. Tio tiva ka kan laiah a ciar ding phan ruangah ka phone cu ka tai ah ka rak cepih ka phone cu in long ngah lo.

“Ka bag in lon hnuah ka bag laktu sawn cun kan khua zinpial umnak lamah in tul ih keikhal kan khaw lam panin ka feh cih. Keimah hi lungnat nei ka si ruangah ka thin a phang tuk, ka lung a hlo thluh ih tikua ah an um rero maw an fehve cih tikhal ka zoh ngam nawn lo. In hmuh banlonak ding cin ka thlen ihsin a tlan in ka tlan ciamco.

“Ka bag in lonmi ahcun ka hnipuan hrukmi pawl le India tangka Rupee 14700 a tel. In suamtu pa 2 hi feet 5 kiangkap hrawng veve an si ih mask an bun ruangah an hmel ka hmu lo nan, pakhat cu mino te a bang. Kamkhat hman an tong lo ih biak khal in be lo. Meithal thawn in tin ih ka thilri in long, in tul ih in tlungter siko.” tin a sim.

Pu Ram Muan Thang hi tui hlan zarhkhat hrawngah Bulfek ih um a sungkhat damlo besia veh dingah a feh ih a va vehmi damlo a cangkang deuh thlang ruangah an khua lam pan in ra tlung a si.

Mindat Ih Tlawng Saya 16 Cu Phatsantu Ah An Ret – Chin ramkulh Mindat peng sungah ralhrang hnuai ih tlawng saya/mah tuan peh rero lai 16 pawl cu Mindat mipi uktu in miphun phatsantu nan si tin September 16 ah thu an suah.

Mindat Mipi uktu cun “Mindat peng sungah ralhrang phuanmi tlawngih saya/mah a tuantu mipum 16 pawl cu kannih Mindat mipi uktu ,Mindat CDF le Mindat cun miphun phatsantu ah kan lo ret zo. Vei tampi CDM tuah dingin kan lo leem rero nan, nan thlun duh lo ruangah Mindat mipi hrang ahcun phatsantu taktak nan si,” tin thu an suah.

Mindat mipi uktu cun Mindat peng sungih pawlkom 19 pawl khal tutiang ralhrang nan tuanpi ruangah tin miphun phatantu sinak an pe.

AA In Ralhrang Lawng An Kap – Rakhine ramkulh Taungkuk myone ah ralhrang ralthuam le ralhrang mipum pawl phurtu ralhrang lawng pakhat cu AA in September 16 sun ah an rak kap tin kiangkap ih hmutu pawl cun an sim.

Khuami pakhat cun “Hmaisabik ahcun ralthuampi puak awn kan thei. Cumi hnu ahcun ralthuampi puak awn le meithal puak awn kan thei ih, nazi 1 sung hrawng a rei. Ralhrang pawl cun lawngin ralthuam le ralhrang mipum an phur ih, Shwe Linzung lawng cawlhnak thlen hlanah AA pawlin an rak kap. Tu ih an doawknak hmun cu Shwe Linzung in peng hruk tlukfang lawng hla a si,” tin a sim.

A tufang Rakhine ramkulh sung hmun tinkim ah ralhrang ralkap le AA doawknak a sosang zetih Maungtaw myone lamah AA cun ralhrang sakhan pakht hnu pakhat an kap vivo. Rakhine ramkulh sungih doawknak a sosan tuk ruangah ralhrang pawl cun Rakhine ramkulh sungin myone 6 pawlah ramleng le ramsung pawlkom mibawmtu pawl khal feh an siang lo.

Ralhrang in Rakhine ramkulh sungin ramleng le ramsung pawlkom pawl feh an sianlonak myone 6 pawl cu Buti Tuang, Maungtaw, Ratih Taung, Miauk Oo, Minpia le Mipung pawl an si.

Ramleng pawlkom sungtel pakhat cun “September 15 ah ralhrang hnenin cakuat kan dong. Cumi ahcun Rakhine ramkulh sung myone 6 ah feh sukso a theih lo thu in sim ih, ziangtik tiang an kham timi a tel lo. Eiin bomnak khal nan pe lo ding tin ca ah a tel ih, ziangruangah timi a san pakhat hman an ngan tel lo a si,” tin a sim.

Raltlan buaipitu pakhat cun “Rakhine ramkulh sungah raltlan an tam deuhdeuh ih, a tamsawn cu raltlan umnak hmunah an um cih. Tu ah ralhrang in raltlan bawmtu pawl Rakhine ramkulh sungih luh an sian nawn lo tikah ralhrang hrang bomnak kan dong nawn lo dingih, raltlan pawl cu seherh um tuk an si,” tin a sim.

China Ah Innpi A Kang – China ram Hunan Province Changsha khawpi ih innpi cu September 16 sun hnuah a kang.

Innpi ahcun China rampi neihmi China Telecon zungpi khal a um. Meter 200 tlukih sang innpi kangah mi paziat an thi ih, mi paziat hriamhma an ngah tivek cu China cozah lamin an than hrih lo.

Ziangtin innpi a kang tikhal China lam cun an than hrih cuang lo. Innpi cu a kang lio tuikih hlaral hmangin tihnung dinhmun a si. Innpi a kang veten mitat le kilhim hnatuan pawlin an pan ih, an mi rero hngal. Tutiang ahcun China cozah lamin innpi kang ruangih siatnak thleng pawl mipi an theihter hrih lo.

Be the first to comment

Leave a Reply

Your email address will not be published.


*