Mipa 4 In Chin Raltlan An Sualpi – India ram New Delhi khawpi ih um chin raltlan nupinu pakhat cu Autor driver telin mi 4 in an kaih hnuah an sualpi tiah amah cun Delhi palik hnenah thubuai a thehlut ti’n India thuthang lar ANI le NDTV cun thuthang an suah.
Amah ih a reldan vek asile February 28 ah a fanu damlo sizung an fehpi ih, Autor Driver cun minung rehnak hmunah a fehpi ih midang pathum a sawm hnuah in sualpi ti’n Delhi palik zung ah a hek. Delhi palik cun mibur ih sualpinak ti’n thubuai an ngankhum zo nan, Chin raltlan nupinu sualpitu pawl cu zo an si ti theih a si hrih lo ih an kai thei hrih lo.
Thilthleng thawn pehparaw in Delhi Commission for Women khalin palik hnenah thuhla an thlen ve ih, sual tuahtu pawl a rangthei bikin kaih si haisehla sual tuahtu pawlih thuhla cipciar khal March 3, netabik ah retin in theihter uh ti’n DCW cun Delhi palik an theither.
Thilthleng thawn pehparaw in Delhi ih Chin raltlan pawlkom pibik CRC president thusuh a si ih, CRC president cun hitin a sim, “Kannih CRC ahhin Chinmi sungin Community 12 kan umkhawm. Thuhla ka theih tikah Community tin ih palai pawl khal thu ka sut hai ih, zohman in kan thei hrih lo.
“India thuthang picang pahnih ah a thuhla an ngan zo nan, CRC hnen ahcun ziang thu hman in thlen lo. Pawlkom le kawhhran ih theih a duh lo khal a si thei. Bom theinak tla kan theih pangah ti’n a thuhla cu zingzoinak kan nei ding. UN lam kan be dingih,Delhi palik khal kan be ding a si,” ti’n a sim.
Passport Diltu An Tam – Ralhrang in Online passport dilnak siseh ramkulh le ramthen tin ih Passport zung an on hnuah Passport diltu an tam tuk ih hnatuan pawl an buai phah tuk tikah an khar phahphah ti’n thu an suah.
Yangon cun Online Passport dilnak cu February 24 ah a rak ong ih diltu an tam tuk ruangah lailak ah an khar phahphah. February 24 lawngah Online in passport diltu mipum 8049 an um ih February 27 in 28 tiangah online in passport diltu mipum 44801 an kim ih a zate kom cun Online ih passport diltu thawng 52 an kim zo.
Curuangah hnatuantu pawl cun a dil zo pawl tifel a tul ti’n mithar lakluhmi an khar phahphah ih , an onsal theu. Online ih passport dilnak hmunah thuthannak an nei ringring. Online in dil hnuah nikhiah an pek caan a kim cun Yangon Passport sungah an feh ih Passport tak ngah dingin tlarawk a tul bet tin an sim.
Passport diltu pakhat cun “Online in kan dil hnuah a caan in sim ih ,zung kot ahcun zinglam nazi 6 in zan 11:45 tiang hrawng tlar aw in kan hngak. Tlarawknak khalah sumpai hmangih thamawknak a um bet. Thawng 30 pe theitu cu kan ko hmaisa ding tin an fehpi. Tlarawknak khalah buainak a tam ih, sualaw khal an um. Palik pawl khal tangka pek lo cun daiten an ummen.
“A sungah bek ken luh a theih lo ih, a sungah zukawknak hmun 8 a um nan, hmun pahnih lawng an on tikah hngah sung a rei tuk. Zingpitten feh khalle zan sim hnu lawngah kan tlung thei. Zung sung ahcun anmah hnatuan pawlin rawl,tidai le a phunphun an zuar. A lengih bek retnak khalah tangka pek a tul, ziangkim tangka cemnak hlir siko,” tin a sim.
Chin ramkulh hrang Hakha khawpi khalah February 27 in Passport zung an ong ih a on ni ah Passport diltu 400 tlun an um hngal. Asinan, ramkulh zung ahcun nikhat ah passport diltu mipum 100 lawng lak hrih an tum tikah ni neta hrang khal dil cia an um.
Hakha ahcun Chin ramkulh sung silo khal Passport dil a theih nan, ramthen dang le ramkulh dang ihsin diltu cu dil man a tam cuang tin an sim. Chin ramkulh sung hrang ahcun thawng 50 an si hrih tiah tuanvo neitu pawl cun an sim.
Yangon Ah Bank Luhcilhtu An Kai – Yangon ramthen Pazuntuang myone ihCB bank cu March 1, zinglam nazi 10 hrawngah kum kim hrih lo tleirawl pahnih in meithal lemin an luhcilh ih kaih ngah an si.
Bank hnatuan pakhat cun “A thok ahcun kum an kim le kim lo kan thei lo,meithal lem an kengih bank sungih um pawl in tin hnuah Courter ih tangak ting 650 an la. Tuanvo neitu dangin palik an rak phone man ih bank an suahsan ding zawngah an kai ngah. An kaih hnuah kum kim lo an si ih, meithal lem an hmang timi kan theifang.
“Kaihmi pahnih cu Pazun tuang ih um an si ih,kum 14 le kum 15 fang an si. Tu ahcun palik sakhan an hruai ih thu an sut fel ding. Dunglam ihsin fialtu an um maw? ziangruangah , ziang duhdan in bank an luhcilh tivek felfai zetin an sut ko ding. Meithal lem pakhat le nam pahnih an kenmi khal palik lamin an laksak zo,” tin a sim.
Thilthleng thawn pehparaw in mipi cun mak an ti tukih ralhrang lemcannak si thei men ding, ralhrang in lemcang dingin an fial si thei men ding titu khal an um.
A kiangih um pakhat cun “Nauhak te kum kim hrih lo an si ih, meithal lem in bank an luhcilh ngam. Thilthleng cu mak kan tizet. Kan ram boruak setuk ruangah nauhak pawl an sisual thluh khal a si thei. Khatlam ah lemcannak khal a si thei. Asinan, lemcang dingin an nauhak tuk tiak ruah cu a har. Kum kim lo ih bank luhcilh tivek cu kan veikhat theihnak a si,” tin a sim.
Ralhrang Ruangah Mitat In Bang An Tam – Ayeyarwaddy ramthen pathein myone sung ahcun ralhrang in mitat pawl khal raldonak an zirter ruangah mitat tuan paih lo ih bang phah an tam ti’n a tlansuak pawl cun an sim.
Mitat pakhat cun “Ralhrang thu a suak tikah mitat 10 tivek khal kan kuat theu. Mitat pawl cu raldo dan zirter an si tlunah raldonak hmunih hruai an tum caan a tam. Curuangah , mitat lut dingih um, cazin lak zomi lakin suaksal tampi an um. Thenkhat tla cu an suak men lo ih hmundang ah an vai, an umnak inn khal an thleng phah. Cucu an himnak hrang siko ding,” tin a sim.
Pathein ih um pakhat cun “Mitat pawl an kaawh tikah an ko men lo ih raldo dan an zirter. Kan dungah khuate lamin uksuh 75 sungin mipum 30 hrawng cu raldo dan zir dingin a nko. Pathein ah ralhrang an mal ih, palik pawl khal an duty phah. Cutikah mitat pawl tiang raldo dan an zirter ih a paih lo cu an suak rero a si,” tin a sim.
Jeriko Ah Israel Mi An Kap That – Israel le palestine buainak ah remnak um dingin Jordan, US le Egpyt palai pawl cun ram pahnih thu an relpi rero nan,karlak ah mipi in buainak an rak tuah tikah remdaihnak taktak an nei thei hmel loin a lang.
Zarhpi ni ah Israel palai, Palestine palai ,Jordan palai, US palai le Egypt palai pawl cun Israe le Jordan palai thu an relpi ih ram pahnih karlak ah remnak um dingin an tawlrel sak. Ram pahnih khal remnak tuah dingin an lungkim tiah Jordan lam cun thu an suah nan, a thurel ih a thaisun ah Palestine ram Jeriko khuami pawl cun Israel le US mi sinak nei mi pakhat an that. Palestine mipawl cun Israel mi lamzin sukso an rak kap ciamco menih mi pakhat a thih phah.
Cumi ruangah West Bank ramthen khuate lamih um Palestine pawl cu Judah mipawlin an rak an tibuai ve ih, Palestine pawlih umnak inn urkang sakmi khal an nei. Palestine ram, West Bank ramthen sungah Judah mi tampi an um ve ih, Palestine pawl thawn cokpolh aw an si tikah buainak a suak deuhdeuh ringring.
Israel cun West Bank ih um Judah pawl hrang inn an sak ih palestine lamin an duh lo tikah buainak a luar. Ram pahnih an biakawk hnuah West Bank ih Judah pawl hrang inn sakmi khal remnak duh ruangah cawlhsan a si hrih ding ti’n Jordan lam cun an suah nan, buainak a suahsal tikah Israel lam khalin West Bank ih Judah pawl hrang inn an sakmi an sak pehsal ding cu an simsal. Cutikah ram pahnih an buai peh vivo dingin a lang.
Leave a Reply