Ralhrang in dothlengnak ruangih an kaihmi mi 4 pawl thihdan an pek hnuah an thlaithat zo thu an suah bangin leitlun hmun tinkim ah ralhrang cangvaih dan dokalh a si ih, India ram New Delhi khawpi ih um Myanmar mipawl khalin ralhrang cangvaih dan duhlonak langter an tum nan, India palik pawlin an kham.
Tawlreltu pakhat cun “A hlankhan ni 3 ah siannak ca kan rak dil cia ih, anmah Delhi palik khalin siannak in rak pe. Asinan, a ni a thlen tikah a ngahsal lo tin palik lam cun in sim ih,ziangruangah a ngah lo timi in simfiang duh lo. Tawlreltu 12 pawl cu palik zungah ralhrang dokalhnak kan tuah lo ding timi lungkimnak hminkhen in nganter ih, in tlungter thluhsal a si,” tin a sim.
Delhi ih hruaitu pakat cun “Tuitum cu CRPH le NUG hmin in ralhrang duhlonak langter tum an si ih, Delhi ih Myanmar Embassy lamin thuhla an rak theih tikah Delhi palik hnenah siang lo dingin an rak hek. Cumi ruangah duhphorhnak tuah ngahsal lo an si.
“Hruaitu pawl cun sun nazi 12 in zanlam nazi 4 tiang ralhrang duhlonak langter an tum. Asinan, an tum bangin palik lamin an siansal lo ruangah palik lam thawn thuhla an tifel sungah mi hrekkhat cun video tawite le zuk an rak la ih, online ahcun an tar thotho.
“Refugee hruaitu pawlkom in raltlan dinhmun thawn pehpar aw in duhphorhnak an rak tuah theu ih, palik lamin siannak an rak pe ringring ko. Asinan, tuitum cu CRPH le NUG lamih tawlrelmi tin an dil tikah palik lamin rem an rak tisal loin a lang. Ziangahtile, India cu leitlun theih ah ralhrang tuanpitu an si,” tin a sim.
Delhi ih reizet um zo hruaitu pakhat cun “Kan ram a buai hnu ahcun Delhi khal kan polhcok aw thluh. Politics tuah duh rori ih Delhi thleng an um ih, Chin raltlan mipi an hmang tangkai. Cutikah buainak kan tong vivo khal a si thei. Ziangahtile , UN cun refugee hrimhrim cu Politics ih hrolhawk a siang lo ih, an duh lo. Tu cu kan hnok thluh zoin a lang,” tin Delhi dinhmun a sim ve.
Hakha le Thantlang Karlak Ah An Kap Aw – Chin ramkulh Hakha khawpi le Thantlang karlak ah Chin ralkap komkhawm lam cun Hakha le Thantlang karlak ih timit lilawn tuah dingih feh ralhrang ralkap pawl cu July 30 ah an rak kap ih, ralhrang lam hmai an nor thei hrih lo tin mipi ralkap lam cun an sim.
Hakha in Timit lilawn tuah ding feh ralhrang ralkap pawl cu Rual U thlanmual lamah mipi ralkap kokhawm in zinglam nazi 11 hrawngin an rak kap thok. Sun nazi 2:30 tiang hrawng an kap aw ciamco ih, cumi hnuah ralhrang pawl cu hmainor peh loin Hakha lamah an kirsal hrih tin mipi ralkap lam cun an sim.
Doawknak a um tikah Hakha ih ralhrang hmunpi cun mipi ralkap pawl umnak lam cu ralthuampi thawn an kap ciamco nan, mipi ralkap lam thi le hriamhma ngah an um lo tin mipi ralkap pawl cun an sim. Doawknak ah anmah ralhrang ralkap lam sawn thi an um rori nan, a zat an fiah thei hrih lo tin mipi ralkap cun mipi simtheihnak an nei.
Hakha ih um pakhat cun “July 30 cu sunvu deuh thaw siko meithal puak awn, bomb puak awn le ralthuampi puak awn pawl kan thei. Doawknak ah ralhrang lam thi an tamih, ralhrang pawl dung an sip phah tin thuhla kan thei. July 31 ahcun doawknak thawmvang a reh hrih nan, Hakha le Thantlang karlak lamzin cu mipi ralkap lamin zawh an kham hrih ih, doawknak sualsal thei ringring a si,” tin a sim.
Timit lilawn cu Hakha in Thantlang fehnak lamzin tluanih um a si ih, 2021 ,October 21 ah ralhrang pawl ralthuam le eiin phur thei hlah haiseh tin mipi ralkap pawl cun Timit lilawn bomb an rak puahsiat. Cucu, tuitum ah ralhrang pawlin tuah an tumih, mipi ralkap lamin duh loin an rak kham. Cumi ruangah kap aw an si.
Kalay Ah Ralhrang 15 An Thi – Sagaing ramthen Kalaymyo in Tamu lamih feh ralhrang ralkap mawtaw pawl cu Kalay PDF in lamlak ah vei hnih pehin bomb an rak puah ih, ralhrang 15 an thi tin mipi theihternak an nei.
Kalay PDF cun “Kalay in Tamu lamih feh ralhrang ralkap mawtaw 4 le ke 12 nei ralhrang ralkap mawtaw pawl cu zinglam nazi 9 hrawngah kannih Kalay PDF cun peng 56-nak hrawngah bomb kan rak puah. Bomb kan puahmi ruangah ralhrang mawtaw pawl an cawl thluh ih, duhtawkin kiangkap an kap ciamco. Cumi hnuah ralhrang mawtaw pawl cu Tamu lam panin an feh peh ih, zinglam nazi 9:30 hrawngah kannih Kalay PDF cun bomb kan puah nonsal.
Tuitum ah ralhrang mawtaw pawl kan puah fuh tukih,ralhrang mawtaw pathum an let. Neta sawn ih ralhrang mawtaw bomb kan puahmi ah ralhrang 10 an thi ih, hriamhma ngah tampi an um tin kan thei. Sun nazi 1 hrawngah Kalay lamin mawtawpi 2 Tamu lamah an fehsal ih, ralhrang thi le hriamhma ngah pawl an phur. Cumi laifang ah ralhrang mawtaw pawl bomb kan puahsal ih, ralhrang 5 an thih tlunah ralhrang tampi hriamhma an ngah.
“Ralhrang thi le hriamhma ngah pawl cu ke 12 nei mawtawpi ah an san ih, ralhrang mawtaw dang pawl cu Tamu lamah an feh peh. Bomb kan puahmi ralhrang pawl cun lamzin tluanin mipi hrekkhat an kai vivo phah. Tui dinhmun ahcun Kalay le Tamu lamzin cu zan nazi 9 in zinglam nazi 5 tiang zawh hrih lo dingah mipi kan lo theihter duh a si,” tin thu an suah.
Kalay PDF Hrang Ting 850 An Ngah – Sagaing ramthen Kalay peng sungih ralhrang ralkap do rerotu Kalay PDF hrang July 30 ah online in sumpai hawl a si ih, mipi hnenin ting 850 kyats hrawng an ngah.
Tuitum cu Kalay PDF kum 1 kim lompinak hrang online in sumpai an hawlsakmi a si ih, US dollar 23620, Singapore dollar 6045, India tangka 99200, Myanmar tangka ting 110, Australia dollar 1870, Japan tangka 57800, Thailand tangka 600 ,Korea tangka 580000 le malaysia tangka 200 an ngah ih, a zate kom cun ting 850 hrawng a suak ding tin an sim.
Sumpai hawlnak cu July 30, zinglam nazi 7:30 in an thokih, hlasakthiam Chit Thu Wai, Daung, Thuan Kham, Shin Bia, Rebecca Fanai, Guys From Chin in Benjamin Sum , David Lai le Thawng Bawi pawl cun mipi an awi. Hlasakthiam pawlin mipi an awi lai ih bomnak tangka petu an um bangin hrekkhat cu hlasak dingih hla dilnak hrang bomnak petu khal an um.
Kalay PDF cu ralhrang ralkap in rampi thuneihnak an lak hnu 2021, May ah felfai zetin an rak din ih, 2022 June thla tiang vei 100 tlun an doawknak ah ralhrang 300 tlun an thi zo tin anmah Kalay pDf lam cun an sim.
Yangon Ah Japan Mino An Kai – Yangon ih thleng Japan mino pakhat cu July 30 ah ralhrang ralkap pawlin an kai ih, an thlahsal hrih lo. Japan mino Kubota Toru cu Yangon mino pawl duhphornak kiangah an kai.
Japan mino Toru ( kum 25 ) cu leitlun thuthanglar Yahoo le Al Jazeera tivek pawl thawn hnatuan tlang pakat a si. A zukmi siseh video a lakmi khalin leitlun huap laksawng rak ngah zotu khal a si. Tukhal Yangon mino pawl duhphornak an tuahmi an rak zuk rero laiah an kai ngah in a lang.
Ralhrang pawl cun Japan mino pakhat lawng an kai lo ih, duhphornak nei mino lak khalin kaihmi an nei tel. Ralhrang pawl cun an kaihmi pawl cu ralhrang mihremnak hmunah an ret hrih ih, ngaihtuah umzet an si tin kiangkap umpawl cun an sim.
C.Ronaldo In Puai Cem Hlanah Bualrawn A Suahsan – A leknak club Man United in tui season Champions league an lek thei lo ding ruangah Man United suahsan tumih club thar hawl rero C.Ronaldo cu club thar a hmuh thei hrih lo ruangah Man United ah a kirsal ih, rualremnak puai khalah Man United hrang a lek ve.
Asinan, C.Roanldo ih thuhla cu a dai thei hrih lo ih, tui season sung Man United ah a umpeh vivo pei maw timi khal theih a si hrih lo. Man United le Vallecano cu July 31, Zarhpi zan ah rualremnak hrang bawhlung sit an si ih, C.Ronaldo khal Man United hrang hram a thok ve.
C.Ronaldo cu minute46-nak ah Man United coach in midang thawn a thlengih, C.Ronaldo a lungawi lemlo in lang. Video le zuk ih langdan vek asile Man United coach thawn mallai tongkam an el aw. Puai cem ah Man United le Vallecano cu 1-1 in an duhtawk aw. C.Ronaldo cun puai cem hlanah leknak bualrawnpi a rak suahsan zo ih, rel a hlawh.
Asinan, hrekkhat cun Man United coach rem tinak Bualrawn suahsan a si titu an um ih, hrekkhat cun Trafic lam ruangah suak hmaisa a si titu khal an um ve. Asinan, puak cem hlanih Bualrawn suahsan tivek hmuh a khat zet ruangah mipi rel a hlawh ngaingai.
Leave a Reply